200 అడుగుల ఎత్తులో మృత్యువుతో పోరాటం

• విద్యుత్‌ తీగల్లో రష్యన్‌ పైలట్‌ విలవిల

మండీ : హిమాచల్‌ ప్రదేశ్‌లో ఉత్కంఠ భరిత ఘటన చోటుచేసుకుంది. పారాైగ్లెడింగ్‌ చేస్తూ అదుపుతప్పిన ఓ రష్యా పైలట్‌ ఏకంగా 200 అడుగుల ఎత్తులో 33 కేవీ హైటెన్షన్‌ విద్యుత్‌ తీగల్లో చిక్కుకున్నాడు. మూడు గంటల పాటు గాలిలోనే వేలాడుతూ ప్రాణభయంతో గడిపాడు. చివరకు ఎన్డీఆర్‌ఎఫ్‌, ఎస్డీఆర్‌ఎఫ్‌ బృందాలు సంయుక్తంగా చేపట్టిన సహాయక చర్యలతో అతడిని సురక్షితంగా కిందకు తీసుకువచ్చారు.

మండీ-పధార్‌ హైవేపై టాండు సమీపంలో మంగళవారం ఈ ఘటన చోటుచేసుకుంది. పారాైగ్లెడింగ్‌ కేంద్రం బీర్‌ బిల్లింగ్‌ నుంచి మధ్యాహ్నం 2 గంటలకు పైలట్‌ గాల్లో ఎగిరాడు. అయితే కొద్దిసేపటికే నియంత్రణ కోల్పోయి, హైటెన్షన్‌ విద్యుత్‌ తీగల్లో చిక్కుకున్నాడు. ఎస్డీఆర్‌ఎఫ్‌ జవాన్‌ నవీన్‌ కుమార్‌ పైలెట్‌ వద్దకు చేరుకుని అతడిని సురక్షితంగా కిందకు తీసుకురావడంలో సహకరించారు.