రైతులు పనిచేసేది 3 నెలలే!

• మిగతా 9 నెలలు పేకాట, మద్యం
• బీజేపీ ఎంపీ వివాదాస్పద వ్యాఖ్యలు

రేవా(ఎంపీ), నవంబర్‌ 10 : బీజేపీ ఎంపీ జనార్దన్‌ మిశ్రా రైతులపై చేసిన అనుచిత వ్యాఖ్యలు తీవ్ర వివాదానికి దారితీశాయి. రైతులు కేవలం మూడు నెలలు మాత్రమే పనిచేస్తారని, మిగిలిన తొమ్మిది నెలలు పేకాడుతూ, గుట్కాలు తింటూ, మద్యం తాగుతూ గడిపేస్తారంటూ మిశ్రా ఆరోపించారు. సోమవారం మధ్యప్రదేశ్‌లోని మోగంజ్‌ జిల్లా రేవా నియోజకవర్గ పరిధిలో జరిగిన గోవర్ధ్దన పూజ సందర్భంగా ఎంపీ ఈ వ్యాఖ్యలు చేశారు. రైతులను అవమానించారని ఆగ్రహిస్తూ కాంగ్రెస్‌ నాయకులు బీజేపీ ఎంపీ వీడియోను సోషల్‌ మీడియాలో షేర్‌ చేశారు. రైతులకు మిశ్రా క్షమాపణ చెప్పాలని వారు డిమాండ్‌ చేశారు.

ఈ కార్యక్రమంలో మిశ్రా ప్రసంగిస్తూ గతంలో మాదిరిగా ఇప్పటి రైతులు లేరు. సౌకర్యవంతమైన జీవనశైలికి అలవాటుపడ్డారు. ఏడాదిలో కేవలం మూడు నెలలు మాత్రమే పనిచేసి మిగిలిన తొమ్మిది నెలలు పేకాట ఆడుతూ, గుట్కా తింటూ, మద్యం తాగుతూ గడిపేస్తున్నారని ఆయన ఆరోపించారు. ఈ వ్యాఖ్యలపై ఏఐసీసీ కార్యదర్శి కమల్‌ చౌదరి ఎక్స్‌ వేదికగా స్పందిస్తూ రైతులు ఆదాయాన్ని రెట్టింపు చేస్తామని వాగ్దానం చేసిన బీజేపీకి ఇటువంటి ప్రకటనలు చేసే ఎంపీ ఉన్నారని విమర్శించింది.