1,109 మంది న్యాయవాదులుగా నమోదు

హైదరాబాద్‌, నవంబర్‌ 11 (నమస్తే తెలంగాణ): రాష్ట్ర బార్‌ కౌన్సిల్‌లో తాజాగా 1,109 మంది న్యాయశాస్త్ర పట్టభద్రులు న్యాయవాదులుగా నమోదయ్యారు. వీరిలో 1,059 మంది బుధవారం హైకోర్టు ప్రాంగణంలో నిర్వహించిన కార్యక్రమంలో వృత్తిపరమైన ప్రమాణ స్వీకారం చేశారు. బార్‌ కౌన్సిల్‌ ఆఫ్‌ ఇండియా ప్రత్యేకంగా ఏర్పాటు చేసిన మధ్యంతర నమోదు కమిటీ పర్యవేక్షణలో ఈ కార్యక్రమం జరిగింది. ఈ కమిటీలో తెలంగాణ బార్‌ కౌన్సిల్‌ చైర్మన్‌ రాంరెడ్డి సాముల, వైస్‌ చైర్మన్‌ చలకాని వెంకట్‌ యాదవ్‌, బార్‌ కౌన్సిల్‌ ఆఫ్‌ ఇండియా సభ్యుడు జీ కిరణ్‌కుమార్‌ ఉన్నారు. ఈ కార్యక్రమంలో ముఖ్య అతిథిగా పాల్గొన్న హైకోర్టు న్యాయమూర్తి జస్టిస్‌ తంగిరాల మాధవీదేవి.. తన వృత్తిపరమైన అనుభవాలను వివరిస్తూ యువ న్యాయవాదులకు మార్గనిర్దేశం చేశారు.

అనంతరం బార్‌ కౌన్సిల్‌ సభ్యులు పొన్నం అశోక్‌గౌడ్‌, ఆకుల మహేశ్‌కుమార్‌, హన్మంతరెడ్డి, సునీల్‌గౌడ్‌, రఘునాథ్‌ వేరోస్‌ తదితరులు నూతన న్యాయవాదులను అభినందించారు. వృత్తిపరమైన విలువలు, నిబద్ధతతో పనిచేయాలని వారికి సూచించారు