హామీలపై మౌనం.. రాహుల్‌ పలాయనం!

• సంక్షేమం ముసుగులో సమస్యల నుంచి గాయబ్‌
• 2 లక్షల ఉద్యోగాలు, రూ.4వేల భృతి ఊసెత్తని వైనం
• రూ.15 వేల రైతు భరోసా 12వేలకు కుదింపుపైనా మౌనం
• రుణమాఫీ, కౌలు రైతుల సమస్యలపై మాట్లాడని రాహుల్‌గాంధీ
• భారత్‌ సమ్మిట్‌లో ఫాసిజం, మోదీ, అదానీలపై విమర్శలకే పరిమితం
• అర్ధరాత్రి వచ్చి అర్ధరాత్రే పోయిన రాహుల్‌

హైదరాబాద్‌, నవంబర్‌ 14 (నమస్తే తెలంగాణ): రాక రాక తెలంగాణ గడ్డపై కాంగ్రెస్‌ అగ్రనేత రాహుల్‌ గాంధీ పర్యటన.. రాష్ట్ర ప్రజలకు మరోసారి తీవ్ర నిరాశనే మిగిల్చింది. ఎన్నికల ముందు యూత్‌, రైతు డిక్లరేషన్ల పేరుతో అనేక హామీలిచ్చి మూడేండ్లు అవుతున్నా.. ఆ హామీలు అమలుపై ఒక్క మాటైనా మాట్లాడకుండా పలాయనం చిత్తగించడం విమర్శలకు దారి తీస్తున్నది. హైదరాబాద్‌ వేదికగా శనివారం గిగ్‌, ప్లాట్‌ఫామ్‌ వర్కర్ల కోసం ఒక సంక్షేమ పథకాన్ని ప్రారంభించినప్పటికీ, అదే సమయంలో రాష్ట్రంలోని కోట్లాది మంది రైతులు, నిరుద్యోగ యువత, భవన నిర్మాణ కార్మికులు ఎదురుచూస్తున్న కీలక హామీల అమలు ఊసెత్తలేదు.

నాడు అర్ధరాత్రి అశోక్‌నగర్‌ వీధుల్లో కలియదిరిగి యువతకు బంగారు భవిష్యత్తు ఇస్తామని శపథం చేసిన ఆయన, ఇప్పుడు కనీసం వాటిపై సమీక్షించకపోవడంపై నిరుద్యోగులకు ఆగ్రహం తెప్పిస్తున్నది. కేవలం జాతీయ రాజకీయాలు, కేంద్రంపై విమర్శలే ఎజెండాగా సాగిన రాహుల్‌ పర్యటన ప్రసంగం తెలంగాణ ప్రజలకు ఇచ్చిన హామీల మీద ముఖం చాటేశారని అనే విమర్శలు వెల్లువెత్తుతున్నాయి.

ఒక వర్గానికే ఇచ్చి.. కాంగ్రెస్‌ కలరింగ్‌
గిగ్‌ కార్మికుల సంక్షేమ పథకాన్ని రాహుల్‌గాంధీ శనివారం హైదరాబాద్‌లో ప్రారంభించారు. వారికి రూ.5 లక్షల ప్రమాద బీమా, రూ.10 లక్షల ఆరోగ్య బీమా, పెన్షన్‌ కోసం నిధి కేటాయింపు, విశ్రాంతి కేంద్రాలు, డాటా హకులు వంటి అంశాలను ఆయన స్వయంగా ప్రకటించారు. కేవలం గిగ్‌ కార్మికుల అంశాన్ని మాత్రమే హైలైట్‌ చేస్తూ 2023 ఎన్నికల సమయంలో ఇచ్చిన మాటను నిలబెట్టుకున్నామని కాంగ్రెస్‌ నాయకులు కలరింగ్‌ ఇచ్చుకుంటున్నారు. నాడు ఎన్నికల సమయంలో 8 రోజులపాటు రాష్ట్రంలో మకాం వేసి, యాత్రలు, సభల్లో పాల్గొన్నారు.

ఎన్నికల ప్రచారం చివరి దశలో, నవంబర్‌ 25న అర్ధరాత్రి వేళ అశోక్‌నగర్‌ ప్రాంతానికి వెళ్లి వందలాది మంది నిరుద్యోగ యువతను స్వయంగా కలిశారు. ఆర్టీసీ క్రాస్‌రోడ్స్‌ పరిసరాల్లో విద్యార్థులతో ముచ్చటించి వారి కష్టాలను ఆలకించారు. పదేండ్ల బీఆర్‌ఎస్‌ హయాంలో ఉద్యోగాలు రాక యువత తీవ్రంగా మోసపోయిందని, కాంగ్రెస్‌ అధికారంలోకి వస్తే ఏడాదిలోగా రెండు లక్షల ఉద్యోగాలు భర్తీ చేస్తామని ప్రకటించారు. ఏటా జూన్‌ 2న జాబ్‌ క్యాలెండర్‌ విడుదల చేస్తామని, సెప్టెంబర్‌ 17 నాటికి నియామకాలు పూర్తి చేస్తామని గొప్పలు చెప్పారు. ఉద్యోగం వచ్చేవరకు నెలకు రూ.4 వేల చొప్పున నిరుద్యోగ భృతి అందిస్తామని యూత్‌ డిక్లరేషన్‌లో స్పష్టమైన హామీ కూడా ఇచ్చారు. టీఎస్‌ పీఎస్సీని ప్రక్షాళన చేస్తామని, ప్రైవేట్‌ రంగంలో స్థానిక యువతకు 75 శాతం ఉద్యోగాలు కల్పిస్తామని నమ్మబలికారు. ఈ మాటలు నమ్మిన యువత కాంగ్రెస్‌ను గద్దెనెకించడంలో కీలక పాత్ర పోషించింది.

రైతుల గోడు పట్టని రాహుల్‌..
2022 మే 6న వరంగల్‌లో నిర్వహించిన రైతు సంఘర్షణ సభలో రాహుల్‌ గాంధీ రైతు డిక్లరేషన్‌ ప్రకటించారు. దేశ రాజకీయాల్లోనే ఇది చారిత్రాత్మకమని కాంగ్రెస్‌ పెద్దఎత్తున ప్రచారం చేసుకున్నది. ఎకరాకు ఏడాదికి రూ.15 వేల చొప్పున రైతు భరోసా అందిస్తామని, కౌలు రైతులకు కూడా అదే మొత్తంలో ఆర్థిక సాయం చేస్తామని, భూమిలేని వ్యవసాయ కూలీలకు ఏడాదికి రూ.12వేల చొప్పున భృతి ఇస్తామని హామీలు ఇచ్చారు. పంట రుణాలను ఏకంగా రూ.2 లక్షల వరకు బేషరతుగా మాఫీ చేస్తామని, అన్ని పంటలకు గిట్టుబాటు ధర కల్పిస్తామని డిక్లరేషన్‌లో చేర్చారు.

కానీ ప్రభుత్వం కొలుదీరిన తర్వాత ఈ డిక్లరేషన్‌లోని కీలక అంశాలన్నీ నీరుగారిపోయాయి. పెట్టుబడి సాయాన్ని రూ.12 వేలకు కుదించారు. అది కూడా ఒకటీరెండు సార్లు ఇచ్చి వదిలేశారు. కౌలు రైతులకు ఆర్థిక సాయం ఊసే లేకుండా పోయింది. కూలీలకు భృతి విషయంలోనూ నిబంధనల పేరుతో కొర్రీలు పెడ్తున్నారు. ఇక రుణమాఫీ పూర్తిస్థాయిలో అందక అనేక మంది ఇప్పటికీ బ్యాంకుల చుట్టూ తిరుగుతున్నారు. ఎరువుల కొరత కోలుకోలేని దెబ్బతీస్తున్నది.వరంగల్‌ సభలో గొంతు చించుకొన్న రాహుల్‌.. ఇప్పుడు హైదరాబాద్‌లో కనీసం రైతు సంఘాలతో సమావేశమై డిక్లరేషన్‌ అమలు తీరును సమీక్షిస్తారని రైతులు ఆశించినా ఎలాంటి ప్రయోజనం లేకుండా పోయింది. ఇచ్చిన హామీ ప్రకారం క్రమం తప్పకుండా పెట్టుబడి సాయం ఇవ్వాలని సీఎం రేవంత్‌కు సూచిస్తారని ఆశపడ్డారు. కానీ తన ప్రసంగంలో ఎక్కడా తమ ఊసెత్తకుండా వెళ్లిపోయారని రైతులు ఆవేదన వ్యక్తం చేస్తున్నారు.

భవన నిర్మాణ కార్మికులను పట్టించుకోలే..
గిగ్‌ కార్మికుల సంక్షేమాన్ని ఘనంగా ప్రచారం చేస్తున్న సరార్‌.. దశాబ్దాలుగా భవన నిర్మాణ కార్మికుల చెమటోడ్చి సంపాదించిన లేబర్‌ సెస్‌ తో కూడిన ప్రత్యేక నిధిని మాత్రం గాలికి వదిలేసింది. ఈ నిధుల వినియోగంలో, బీమా క్లెయిమ్‌ల మంజూరులో భారీ ఎత్తున అక్రమాలు జరిగాయన్న ఆరోపణలు రాష్ట్రంలో సంచలనం సృష్టించాయి. ఏకంగా రూ.150 కోట్లకు పైగా నిధులు దుర్వినియోగం అయ్యాయన్న విమర్శలు రావడంతో ప్రభుత్వం విజిలెన్స్‌ విచారణకు కూడా ఆదేశించాల్సి వచ్చింది.

ఇద్దరు అధికారులను సస్పెండ్‌ చేసినప్పటికీ, అసలు సూత్రధారులు, మంత్రి కార్యాలయ సిఫార్సుల పాత్రపై ఇప్పటికీ నీలినీడలు కమ్ముకున్నాయి. కాగ్‌ నివేదికలు సైతం ఈ నిధుల నిర్వహణలోని డొల్లతనాన్ని బయటపెట్టాయి. స్థానిక సంస్థలు వసూలు చేసిన కోట్ల రూపాయల లేబర్‌ సెస్‌ను బోర్డుకు జమ చేయకుండా ఆయా సంస్థల వద్దే నిలిపివేయడం, కార్మికులకు సంబంధం లేని ఇతర పథకాలకు ఆ నిధులను మళ్లించడం వంటి అక్రమాలు వెలుగులోకి వచ్చాయి. గిగ్‌ కార్మికులకు కొత్త పథకాలు ప్రకటించిన రాహుల్‌, భవన నిర్మాణ కార్మికుల నిధుల దోపిడీ, అక్రమాలపై మాట్లాడుతారని, బాధ్యులపై చర్యలకు సూచన చేస్తారని కార్మిక సంఘాలు ఆసక్తిగా ఎదురుచూసినా నోరు మెదపకపోవడంపై భగ్గుమంటున్నారు.

కేంద్రంపై విమర్శలకే పరిమితం..
హైదరాబాద్‌లోని హెచ్‌ఐసీసీలో భారత్‌ సమ్మిట్‌ ముగింపు సమావేశంలో రాహుల్‌ గాంధీ చేసిన ప్రసంగమంతా జాతీయ రాజకీయాలు, బీజేపీ, ఆర్‌ఎస్‌ఎస్‌ విధానాలు, ఫాసిజం, అదానీ-అంబానీల చుట్టూనే తిరిగింది. కేంద్ర ప్రభుత్వంపై విమర్శలు గుప్పించడం, జాతీయ స్థాయిలో ప్రతిపక్షాల పోరాటాన్ని నడిపించడం రాజకీయ నాయకుడిగా ఆయన బాధ్యత కావచ్చు. కానీ, అదే సమయంలో రాష్ర్టాన్ని పాలించే కాంగ్రెస్‌ ఇచ్చిన హామీల అమలు తీరును గాలికి వదిలేసి, ఢిల్లీ రాజకీయ ఎజెండాతో కాలం వెళ్లదీయడం తెలంగాణ ప్రజలను మోసగించడమే అవుతుందని రాజకీయ పరిశీలకులు చెప్తున్నారు. ఇప్పటికైనా ప్రతి హామీని చిత్తశుద్ధితో అమలుచేయకపోతే ప్రజాక్షేత్రంలో తగిన మూల్యం చెల్లించుకోక తప్పదని వారు హెచ్చరిస్తున్నారు.

జాబ్‌ క్యాలెండర్‌ ఊసేది?
కాంగ్రెస్‌ అధికారంలోకి వచ్చిన తర్వాత ఆ హామీల అమలు తీరు మాత్రం పూర్తిగా విరుద్ధంగా మారింది. జాబ్‌ క్యాలెండర్‌ పేరుతో నామమాత్రపు ప్రకటనలు వెలువడినా, ఇచ్చిన మాట ప్రకారం రెండు లక్షల ఉద్యోగాల భర్తీ లక్ష్యం ఎకడా సాకారం కాలేదు. నిరుద్యోగ భృతి ఊసే లేకుండా పోయింది. దీంతో మోసపోయామని గ్రహించిన నిరుద్యోగ యువత రోడ్డెకి నిరసనలు తెలుపాల్సి వచ్చింది. 2024 జూలైలో టీజీపీఎస్సీ కార్యాలయం ముట్టడి మొదలు.. సచివాలయం వరకు విద్యార్థులు అనేకమార్లు ఆందోళనలు చేపట్టారు.

అదే ఏడాది అక్టోబర్‌లో గ్రూప్‌-1 మెయిన్స్‌ వాయిదా కోరుతూ, జీవో 29ని సవరించాలని అశోక్‌నగర్‌లో ఆందోళన చేస్తున్న విద్యార్థులపై పోలీసులు లాఠీలు ప్రయోగించారు. 2025, 2026 సంవత్సరాల్లో కూడా దిల్‌సుఖ్‌నగర్‌, చికడపల్లి, అశోక్‌నగర్‌ ప్రాంతాల్లో జాబ్‌ క్యాలెండర్‌ అమలు కోసం యువత నిరసనలు కొనసాగిస్తూనే ఉన్నారు. నాడు అర్ధరాత్రి యువత వద్దకు వెళ్లిన రాహుల్‌ గాంధీ.. ఇప్పుడు వారు పడుతున్న యాతనలపై కనీసం స్పందించకపోవడం దారుణమని విద్యార్థి సంఘం నేతలు మండిపడుతున్నారు. జాబ్‌ క్యాలెండర్‌, నిరుద్యోగ భృతిపై ఎలాంటి ప్రకటన చేయకపోవటం తమను తీవ్ర నిరాశకు గురిచేసిందని నిరుద్యోగులు ఆందోళన వ్యక్తం చేస్తున్నారు.