రహస్యంగా యూజీ కేబుల్‌ పనులు!

• ఫోన్లు బయటే పెట్టి ఆఫీసర్లతో ఆ గదిలో భేటీలు

• ఎవాల్యుయేషన్‌ వేళ వెల్లువెత్తుతున్న సమస్యలు

• మిస్టర్‌ 10%తో కంపెనీ యజమానుల ఒప్పందాలు

• ముందస్తు ఒప్పందముంటేనే కట్టబెట్టే యత్నాలు

• సాంకేతికంగా ఇతర కంపెనీలపై అనర్హత వేటు!

హైదరాబాద్‌ సిటీబ్యూరో, నవంబర్‌ 14(నమస్తే తెలంగాణ): దక్షిణ డిస్కంలో అంతా రహస్యంగా జరుగుతున్నది. అండర్‌గ్రౌండ్‌ (యూజీ) కేబుల్‌ టెండర్ల ప్రక్రియలో ఏ విషయమూ బయటకు పొక్కకుండా రహస్యంగా కట్టబెట్టే యత్నాలు జరుగుతున్నాయి. మిస్టర్‌ టెన్‌పర్సెంట్‌తో ఒప్పందాలు చేసుకొన్న ఓ కంపెనీకి టెండర్లు కట్టబెట్టేందుకు అధికారు లు, డైరెక్టర్లు మల్లగుల్లాలు పడుతున్నారు. విష యం బయటపడకుండా జాగ్రత్త పడుతూ త మను కలిసే అధికారులు, సిబ్బంది ఫోన్లు బ యటే పెట్టి రావాలని షరతు విధించారు. నగరంలో యూజీ కేబుల్‌ వేయడానికి మొదటి దశలో రూ.5,756 కోట్లతో పిలిచిన టెండర్ల వ్యవహారం రోజురోజుకూ ముదురుతున్నది. నిరుడు ఈ టెండర్లకు నిర్ణయించిన విలువకు 40శాతం ఎక్కువగా అంచనాలు పెంచి ఈ ఏడాది టెండర్లు పిలిచారు.

గత నెల 12న టెండర్ల ప్రక్రియ ముగిసింది. ఈ-ప్రొక్యూర్‌మెంట్‌లోనే టెండర్‌ జరిగిందని, ఎక్కడా అక్రమాలకు అవకాశం లేదని టీజీఎస్‌పీడీసీఎల్‌ సీఎండీ జితేష్‌ వీ పాటిల్‌ చెప్పారు. కానీ ఇప్పటివరకు బిడ్‌ ఎవాల్యూయేషన్‌ జరుగుతున్న ది. నెలరోజుల ప్రక్రియ ముగిసినా ఇంతవరకు టెండర్ల ప్రక్రియ ఒక కొలిక్కి రాలేదు. ఇందు కు కారణం ముందస్తుగా మిస్టర్‌ టెన్‌పర్సెంట్‌తో లోపాయికారీ ఒప్పందాలు కుదుర్చుకు న్న కంపెనీ వెనుకబడిపోయే అవకాశాలు ఉన్నట్టు తేలడంతో ఒక్కసారిగా అందరికీ షాక్‌ తగిలినట్టయింది. ఎవాల్యూయేషన్‌ అంటే టెండర్లకు కోట్‌ చేసిన కంపెనీల సాంకేతిక, ఆర్థిక అంచనాలు కట్టే సమయంలోనే ఈ సమస్య రావడంతో ఏం చేయాలో తెలియక రహస్యం గా సమావేశాలు పెట్టుకుంటున్నట్టు తెలిసింది.

పెరిగిన బడ్జెట్‌ అంచనాలు!

హైదరాబాద్‌లో విద్యుత్తు తీగలు, స్తంభా లు ఎక్కడా కనిపించకుండా మెట్రోజోన్‌ వ్యాప్తంగా మెగా భూగర్భ కేబుల్‌ ప్రాజెక్టుకు నిరుడు నవంబర్‌లో ప్రభుత్వం గ్రీన్‌సిగ్నల్‌ ఇచ్చింది. ఈ ప్రాజెక్టులో భాగంగా ఓవర్‌హెడ్‌ స్థానంలో వివిధ పద్ధతుల్లో యూజీ కేబుళ్లు అందుబాటులోకి తెస్తారు. ఇందులో భాగంగా తొలి విడతలో బంజారాహిల్స్‌, సికింద్రాబా ద్‌, హైదరాబాద్‌ సెంట్రల్‌, హైదరాబాద్‌ సౌత్‌ సర్కిళ్లలో 11కేవీ, 33కేవీ విద్యుత్తు లైన్లతో పాటు ప్రధాన రహదారులపై ఉన్న ఎల్‌టీ ఓవర్‌హెడ్‌ లైన్లను తొలగించి వాటి స్థానంలో యూజీ కేబుళ్లు వేయడానికి టెండర్లు పిలిచా రు. సెప్టెంబర్‌ 25న టెండర్‌ డాక్యుమెంట్లకు సంబంధించిన ప్రక్రియ ప్రారంభం కాగా అక్టోబర్‌ 12న మధ్యాహ్నం ముగుస్తుందని, అదేరోజు సాయంత్రం టెండర్లు తెరుస్తామని టీజీఎస్‌పీడీసీఎల్‌ అధికారులు తెలిపారు.

తొలివిడతలో 3,899 కి.మీ. మేర విద్యుత్తు లైన్లు యూజీగా మార్చాలనేది ప్రాజెక్టు లక్ష్యం. మొదట రూ.4,051 కోట్లతో రూపొందించిన ప్రణాళిక ప్రభుత్వ ఆమోదం పొందినప్పటికీ తాజాగా రూ.5,756 కోట్ల రివైజ్డ్‌ డీపీఆర్‌కు చేరింది. నవంబర్‌లో జారీ అయిన జీవోలో అప్పటి అంచనా ఎస్‌ఎస్‌ఆర్‌ రేట్ల ఆధారంగా రూపొందించారని, వాస్తవ పనుల సమయం లో ఫీల్డ్‌ కండీషన్లు, అమల్లో ఉన్న రేట్ల ఆధారంగా వ్యయం మార్చే అవకాశం ఉంటుందని పేర్కొన్నది. ఈ క్రమంలో ప్రాజెక్టు ప్రారంభం కావడానికి ముందే అంచనాలను విపరీతంగా పెంచారు. మొదటి అంచనాకు తర్వాత అంచనాకు రూ.1,705 కోట్ల పెరుగుదల అంటే సుమారు 42.1 శాతం అదనంగా పెరిగింది. మొదట ప్రతిపాదించిన అంచనా వ్యయంలో కిలోమీటరుకు రూ.1.04 కోట్లు ఖర్చయ్యేలా ప్రణాళిక రూపొందించారు.

కానీ మారిన అంచనాల ప్రకారం కిలోమీటర్‌కు రూ.1.48 కోట్లు ఖర్చవుతుంది. అంటే ఒక్కో కి.మీ.కు సుమారు రూ.44లక్షల తేడా ఉంటుంది. అయితే ఎంత పెరిగినా 10 శాతం వరకు తేడా ఉంటుంది తప్ప మరీ ఇంతస్థాయిలో మార్పు ఉండదని డిస్కం అధికారులే చెప్తున్నారు. ఇ దంతా మిస్టర్‌ టెన్‌పర్సెంట్‌ కోసమేనంటూ చ ర్చ జరుగుతున్నది. మొదట అంచనాలు పెంచి ఆ తర్వాత ముందస్తు అడ్వాన్సులు ఇచ్చి అందులో తమ వాటాలు తీసుకోవాలనే ఆలోచనగా డిస్కంలో ఈ మొత్తం వ్యవహారంలో కీలక పాత్ర పోషిస్తున్న ఒక సీనియర్‌ అధికారి తన సన్నిహితుల వద్ద చెప్పినట్టు తెలిసింది.

ఆ కంపెనీకి కట్టబెట్టే దిశగా అడుగులు!

గత నెలలో టెండర్‌ ప్రక్రియ ముగిసిన తర్వాత ఏరోజుకారోజు ఆయా కంపెనీల విషయాలు ప్రకటిస్తామని చెప్పిన సీఎండీ ఆ తర్వాత టెండర్ల గురించే మాట్లాడలేదు. ఇదే సమయంలో ఈ మొత్తం ప్రక్రియను మొదటి నుంచి ప్రత్యక్షంగా పర్యవేక్షిస్తూ ముందుండి నడిపిస్తున్న ఆ డైరెక్టర్‌కు సాంకేతికంగా ఆయా కంపెనీల అంచనాలు చూసే సమయంలోనే సమస్య ఎదురైంది. అంతకు ముందే ఆ కంపెనీతో మిస్టర్‌ టెన్‌పర్సెంట్‌ స్వయంగా ఒప్పందాలు కుదుర్చుకొని కొంత అడ్వాన్స్‌ కూడా తీసుకోవడంతో ఇప్పుడు ఆ కంపెనీకి ఎలా అవకాశం కల్పించాలో తెలియక వారం రోజులుగా ఆ డైరెక్టర్‌, అధికారులు ఆయన గదిలో నే రోజంతా చర్చలు జరుపుతున్నారు.

ఎవరైనా రికార్డు చేస్తారనే అనుమానంతో ఫోన్లు బయటే పెట్టి లోపలకు రావాలంటూ ఆదేశాలు జారీచేశారు. ఇదే సమయంలో మరో నాలుగు కంపెనీల ప్రతినిధులతోనూ లోపాయికారీ ఒప్పందాలు చేసుకుందామని ప్రయత్నాలు మొదలుపెట్టినట్టు తెలిసింది. ముందస్తుగా అడ్వాన్స్‌లు ఇచ్చి పనులు చేయించడానికి కూడా ప్రతిపాదనలు సిద్ధం చేసి ఆదిశగా ఆర్థిక అవకాశాలు అందిపుచ్చుకోవడానికి మిస్టర్‌ టెన్‌పర్సెంట్‌తో పాటు గతంలో పనిచేసి ఇటీవలే బదిలీ అయిన ఒక కీలక అధికారి, డైరెక్టర్లు పెద్ద ప్రణాళికే వేసినట్టు తెలిసింది. ఈలోగా ఆయన బదిలీ కావడం, ఎవాల్యూయేషన్‌ సమయంలో కంపెనీ బాగోతం బయటపడటంతో అనర్హత వేటు వేయకుండా మిగతా కంపెనీలు దారికొస్తా యా? లేక వాటిపై వేటు వేయాలా? అనే కోణంలో తీవ్రంగా చర్చిస్తున్నట్టు సమాచారం. మొత్తమ్మీద ఎవరిపై వేటు పడుతుందనే వ్యవహారంపై కీలక అధికారుల్లో చర్చ జరుగుతున్నది.