5 కార్లుంటే.. మీరే అగ్రిగేటర్‌!

• 50 కార్ల నిబంధనలకు స్వస్తి
• ఐదింటితోనే రెంటల్‌ క్యాబ్‌ వ్యాపారంలోకి..
• ఆసక్తిగల దరఖాస్తుదారులకు ఆర్టీఏ సూచనలు
• క్యాబ్‌ వ్యాపారంలో కొత్త శకానికి కేంద్రం ప్రతిపాదనలు
• రూ. 25వేలు ఫీజు చెల్లిస్తే నిర్వహణ లైసెన్స్‌
• రెంట్‌ ఏ క్యాబ్‌ స్కీంతో వచ్చే ఏడాది జనవరి నుంచి అమల్లోకి..
• లైసెన్స్‌ కాలపరిమితి ఐదేండ్లు.. కార్లకు తొమ్మిదేళ్ల వయోపరిమితి
• జీపీఎస్‌ ట్రాకింగ్‌, ఫస్ట్‌ ఎయిడ్‌ కిట్‌ తప్పనిసరి
• 24 గంటల ఫిర్యాదుల పరిషార వ్యవస్థ ఏర్పాటు కీలకం

ఇప్పటి వరకు 50 కార్లు ఉంటేనే.. రెంటల్‌ క్యాబ్‌ బిజినెస్‌కు ఆస్కారం ఉండేది. కానీ ఇప్పుడు కేవలం 5 కార్లు ఉంటే చాలు మీరే చిన్నపాటి అగ్రిగేటర్‌గా మారొచ్చు. క్యాబ్‌ రంగంలో వినూత్న మార్పులకు కేంద్రం శ్రీకారం చుట్టింది. చిన్న తరహా రవాణా సేవలు అందించే వారికి సరికొత్త అవకాశాన్ని అందించడానికి ‘రెంట్‌ ఏ క్యాబ్‌’ స్కీంను తెరపైకి తీసుకొచ్చింది. దేశ ప్రధాన నగరాల్లో కార్ల వినియోగం ఇటీవల పెరుగుతూనే ఉంది. వ్యాపారాలు హద్దులు దాటి దేశవ్యాప్తమవుతున్నాయి. వ్యాపారులు తమ కంపెనీలను బ్రాంచీలుగా విస్తృతం చేస్తున్నారు.

సిటీబ్యూరో, నవంబర్‌ 14 (నమస్తే తెలంగాణ) : ఈ పరిస్థితుల్లో నగరవాసుల వినియోగాల కోసం అనేక క్యాబ్‌ ఆపరేటర్లు, అగ్రిగేటర్లు వందలాది వాహనాలతో రాకపోకల సేవలు అందిస్తున్నాయి. ఈ కార్లన్నీ బడా కంపెనీల ఆధ్వర్యంలో నడుస్తున్నాయి. వారు నిర్దేశించిన ధరలతోనే ట్రిప్స్‌ సాగుతున్నాయి. అయితే ఇక మీదట రెంటల్‌ క్యాబ్‌ బిజినెస్‌లోకి సామాన్యులు కూడా వచ్చేలా రోడ్డు రవాణా,రహదారుల కేంద్ర మంత్రిత్వ శాఖ ‘సెల్ఫ్‌ డ్రైవ్‌- షాఫర్‌ డ్రివెన్‌’ కార్‌ రెంటల్‌ వ్యాపారంలోకి ప్రవేశించడానికి లైన్‌ క్లియర్‌ చేసింది.

ఇప్పటి వరకు 50 కార్ల ఉంటేనే రెంటల్‌ క్యాబ్‌ బిజినెస్‌కు వీలుండేది. ఇక మీదట కేవలం 5 కార్లు ఉంటే చాలు దేశ వ్యాప్తంగా మీరు రెంటల్‌ బిజినెస్‌ చేయొచ్చు. అందుకు అవసరమైన లైసెన్స్‌ కేవలం రూ. 25వేలు మాత్రమే ఉంటుందని కేంద్రం ముసాయిదాలో పేర్కొంది.ఐదేండ్ల పాటు చెల్లుబాటులో ఉంటుంది. కాగా, ఈ ప్రతిపాదనలు ట్రాక్‌ ఎక్కితే వచ్చే ఏడాది జనవరి నుంచి రెంటల్‌ క్యాబ్‌ ఆపరేటర్‌ బిజినెస్‌కు గ్రీన్‌ సిగ్నల్‌ వచ్చినట్టేనని రవాణా శాఖ అధికారులు తెలిపారు.

నిబంధనలు పాటించాల్సిందే!

రెంటల్‌ క్యాబ్‌ బిజినెస్‌లోకి అడుగుపెట్టాలంటే ప్రయాణికులు, డ్రైవర్ల యోగ క్షేమాలనే ప్రధానంగా నిబంధనల్లో చేర్చారు. వాహనాల ఫిట్‌నెస్‌ విషయంలోనూ సూచనలు చేశారు. ‘ది రెంట్‌ ఏ క్యాబ్‌ స్కీం- 2026’ ముసాయిదా ప్రకారం 5 కార్లు తప్పనిసరి. ఇందులో కనీసం రెండు మోటార్‌ క్యాబ్‌లను కార్యనిర్వహణ ప్రాంతంలో అందుబాటులో ఉంచాలి. ఇందులో వినియోగించే కార్ల గరిష్ఠ వయోపరిమితి 9 ఏండ్లు దాటొద్దు. ఒకవేళ 9 ఏండ్లు దాటిన తర్వాత రెంటల్‌ క్యాబ్‌లో ఆ కారును వినియోగించడానికి వీలుండదని షరతులు విధించింది.

ఉదాహరణకు 2020లో కొనుగోలు చేసిన కారు అయితే 2029 వరకు మాత్రమే వినియోగించాల్సి ఉంటుంది. నిర్ణీత కాలపరిమితి దాటితే ఆ వాహనాలను సేవల్లో నుంచి తొలగించాల్సి ఉంటుందని అధికారులు వివరించారు. అంతేకాదు ఈ పథకం కింద వాహనాలు సమగ్ర బీమా పాలసీని పొంది ఉండాలి. ఈ పాలసీలో మోటార్‌ క్యాబ్‌ ప్రయాణికుల సామర్థ్యం మేరకు, దానిని అద్దెకు తీసుకున్న వ్యక్తికి, డ్రైవర్‌కు లేదా అందులోని ఇతర ప్రయాణికుల కూడా కవరేజీ చేర్చబడి ఉండాలని నిబంధనలు చేశారు. వాహనాల చట్టం ప్రకారం ఏదైన నేరం లేదా ఉల్లంఘనకు సంబంధించిన పెండింగ్‌ చలాన్లు ఏవీ ఉండకూడదు. ముసాయిదా ప్రకారం, ఆ వాహనాలను జాతీయ నేర రికార్డుల బ్యూరోకు సంబంధించి.. పోలీసు నేర సమాచార పత్రంలో నమోదు చేసి ఉండకూడదు.

ప్రతిపాదిత ఫ్రేమ్‌ వర్క్‌ ఒకే రుసుముతో రాష్ట్రం, దేశమంతా లేదా కేంద్ర పాలిత ప్రాంతం అంతటా చెల్లుబాటు అయ్యే ఒకే లైసెన్సును అనుమతిస్తుంది. క్యాబ్‌లకు లొకేషన్‌ ట్రాకింగ్‌, అందులో ప్రథమ చికిత్స కిట్‌లను తప్పనిసరి చేస్తుంది. దీంతోపాటు ఆపరేటర్లు తప్పనిసరిగా ఒక వెబ్‌సైట్‌ 24 గంటల ఫిర్యాదుల పరిష్కార మద్దతు ఇవ్వాల్సి ఉంటుంది. అంతేకాదు క్యాబ్‌ సర్వీస్‌ ఎక్కడ నిలిచిపోయినా అత్యవసర మరమ్మతులు, బోయింగ్‌ సేవలను అందించాల్సి ఉంటుంది.

స్థానిక ఆపరేటర్లకు కలిసొచ్చేలా..!

నగరంలో రెంటల్‌ క్యాబ్‌ బిజినెస్‌ ఇప్పటి వరకు ఇష్టానుసారంగా ఉండేది. ఎటువంటి గైడ్‌లైన్స్‌ పాటించకుండా ట్రిప్పులు చేసేవాళ్లు. చిన్న ఆపరేటర్ల వ్యాపారం నష్టాలను మూటగట్టుకునే పరిస్థితి ఉంది. పెద్ద కంపెనీలు, విదేశీ కంపెనీలు సైతం ఇక్కడ కార్లను వందల్లో దించి అగ్రిగేటర్‌ సేవలు అందించేవాళ్లు. ప్రధాన కార్యాలయం పరిధిలో కనీసం 50 కార్లు ఉండటంతో పాటు అందులో 50 శాతం ఏసీ కార్లు ఉండేవి. వాహనాలకు సంబంధిత టూరిస్ట్‌ పర్మిట్లు ఉండాలి.

వీటితో పాటు దేశంలో ఐదు పర్యాటక ప్రాంతాల్లో బ్రాంచ్‌ ఏర్పాటు నిబంధన ఉండేది. అయితే ఈ నిబంధనలను సులభతరం చేస్తూ ప్రస్తుతం క్యాబ్‌ రెంటల్‌ బిజినెస్‌లోకి స్థానికులను ప్రోత్సహించేలా కేంద్రం అవకాశం కల్పించింది. దీంతో చిన్న పారిశ్రామికవేత్తలు, స్టార్టప్‌లు, స్థానిక ఆపరేటర్లను ఈ రంగంలో రాణించేలా నిబంధనలు సులభతరం చేశారు. డ్రైవర్లతో ,డ్రైవర్లు లేకుండా వాహనాలను అద్దెకు అందించొచ్చు. ఎటువంటి బ్రాంచీల ఏర్పాటు అవసరం లేదు.

ముసాయిదా పథకం ప్రకారం, అద్దెకు ఇచ్చే అన్ని వాహనాలకు చెల్లుబాటు అయ్యే రిజిస్ట్రేషన్‌, ఫిట్‌ నెస్‌ మరియు కాలుష్య నియంత్రణ ధృవపత్రాలు తప్పనిసరిగా ఉండాలి. అలాగే, వర్తించే అన్ని పన్నులు చెల్లించి ఉండాలని నిబంధనలు ఉన్నాయి. ఈ రెంటల్‌ క్యాబ్‌ పట్టాలెక్కితే నగరంలో క్యాబ్‌ ప్రయాణం కొంత చౌకగా మారే అవకాశం ఉందని నిపుణులు చెబుతున్నారు.

9 ఏండ్ల నిబంధనపై కొంత అసహనం..!

కేంద్రం తీసుకొచ్చిన ఈ రెంటల్‌ క్యాబ్‌ విధానంలో కారు వయోగరిష్ఠ పరిమితి 9 ఏండ్లు దాటితో సేవల్లో నుంచి తొలగించాల్సి ఉంటుంది. ఈ లెక్కన ఈ బిజినెస్‌లోకి వచ్చిన వారు 9 ఏండ్లకు ఓసారి కొత్త కార్లు కొనుగోలు చేయడం భారంగానే ఉంటుందని చెబుతున్నారు. ఒక్క వాహనం గరిష్ట కాలపరిమితి 15 ఏండ్లుగా ఉన్నప్పుడు ఈ స్కీంలో మాత్రం 9 ఏండ్లను మాత్రమే ప్రామాణికంగా తీసుకోవడంపై ఆర్టీఏ అధికారులకు పలు విజ్ఞప్తులు అందాయి.

నిబంధనలు సులభతరంగా ఉన్నా 9 ఏండ్ల నిబంధన మాత్రం చిన్న తరహా వారిని కొంత ఆలోచించేలా చేస్తుందని వాపోయారు. మరోవైపు రెంటల్‌ నుంచి తొలగించిన కారును సొంత వాహనంగా వినియోగించుకోవచ్చని అధికారులు తెలిపారు. కాగా, ఈ ముసాయిదాపై ఆర్టీఏ అధికారులు దరఖాస్తుదారులు, ప్రజల నుంచి సూచనలు కోరుతున్న విషయం తెలిసిందే.