శంకర్‌గౌడ్‌ కుమారుడికి ఆర్టీసీ ఉద్యోగం

హైదరాబాద్‌, నవంబర్‌ 12 (నమస్తే తెలంగాణ): కార్మికుల కోసం ప్రాణత్యాగం చేసిన ఆర్టీసీ డ్రైవర్‌ శంకర్‌గౌడ్‌ కుమారుడికి ప్రభుత్వం రికార్డ్‌ ట్రెజర్‌గా ఉద్యోగాన్ని కల్పించింది. రవాణా శాఖ మంత్రి పొన్నం ప్రభాకర్‌, ఆర్టీసీ ఎండీ వై నాగిరెడ్డి గురువారం సచివాలయంలో శంకర్‌గౌడ్‌ కుమారుడు హేమంత్‌కు నియామకపత్రాన్ని అందించారు. తెలంగాణ ఆర్టీసీ ఉద్యోగులను ప్రభుత్వంలో విలీనం చేయాలని డిమాండ్‌ చేస్తూ కార్మికులు ఇదే ఏడాది ఏప్రిల్‌లో సమ్మెకు పిలుపునిచ్చారు.

అదేనెల 22న సమ్మె ప్రారంభం కాగా, కార్మికులందరూ సమ్మెలో భాగస్వాములయ్యారు. సమ్మె నిర్వీర్యానికి ప్రభుత్వం కుట్రలు చేస్తూ ప్రైవేట్‌ డ్రైవర్లను రంగంలోకి దించింది. ఈ తరుణంలో తీవ్ర మనస్తాపం చెందిన ఆర్టీసీ నర్సంపేట డిపో డ్రైవర్‌ శంకర్‌గౌడ్‌ పెట్రోల్‌ పోసుకొని ఆత్మార్పణ చేసుకున్నాడు. శంకర్‌గౌడ్‌ ప్రాణత్యాగంతో దిగొచ్చిన ప్రభుత్వం చర్చలు జరిపింది. ఈ క్రమంలో శంకర్‌గౌడ్‌ కుటుంబానికి ప్రభుత్వం న్యాయం చేయాలని కార్మికులు, కార్మిక జేఏసీ నేతలు ప్రభుత్వాన్ని డిమాండ్‌ చేశారు. వారి ఆందోళనలతో నాడు మాట ఇచ్చిన మంత్రులు.. నేడు ఆ హామీని నెరవేర్చుకున్నారు.