వేముగంటి నరసింహాచార్యులు.. కవిబ్రహ్మ జీవితం కమనీయ కావ్యం

ఆధునిక తెలుగు పద్య సాహిత్య చరిత్రలో వేముగంటి నరసింహాచార్యులది ముఖ్య అధ్యాయం. కావ్య పరిభాష, భావ సాంద్రత, వస్తువుల ఎంపిక, విశిష్టాద్వైత చింతన, దేశభక్తి భావజాలం, కవి జీవితాల అనురక్తి, ప్రకృతిపై అనంతమైన ప్రేమ, బాల సాహిత్య సృష్టి.. ఇలా విభిన్న అంశాలను తన సాహిత్యంతో సమన్వయించి, నాలుగు కాలాల పాటు నిలిచే సమున్నత సాహిత్యాన్ని సృష్టించిన తెలంగాణ గర్వించదగ్గ సృజనశీలి, ధీశాలి, భాషా ప్రేమికుడు, సరస్వతీ సేవకుడు ఆయన.
1930 జూన్ 30న సిద్దిపేటలో రామక్క, రంగాచార్య దంపతులకు జన్మించిన వేముగంటి నరసింహాచార్యులు ప్రకృతి ప్రేమికుడు. లలిత కళారాధకుడు. చరిత్ర పిపాసి. లలిత పదార్చనాశీలుడు. మృదుమధుర శైలి ఆయన సొంతం. వరంగల్లోని విశ్వేశ్వర సంస్కృతాంధ్ర కళాశాలలో ఆయన చదువుకున్నారు. సంస్కృతం, తెలుగు భాషలపై అపారమైన పట్టు సాధించారు. జీవితకాలమంతా తెలుగు రచనల వైపే అధిక శాతం మొగ్గు చూపారు.1946లో పండిట్ మదన్ మోహన్ మాలవీయ మరణించినపుడు, అడవి బాపిరాజు సంపాదకత్వంలో వస్తున్న ‘మీజాన్’ పత్రికలో ‘బాష్పాంజలి’ పేరుతో ఆయన ఒక ఎలిజీ రాశారు. ఆ రోజుల్లోనే వేముగంటికి మంచి పేరు తెచ్చిపెట్టింది.
వేముగంటి మంజీర నాదాలు చాలా ప్రసిద్ధమైన పాటల కావ్యం. మహాత్మాగాంధీ జీవితం, అహింసా పోరాటంపై రాసిన ఒక చిన్న కావ్యం బాపూజీ. మన చరిత్ర, సంస్కృతిని వివరించే పద్య కావ్యం ఆంధ్ర విష్ణువు. ‘శ్రీ వేంకటేశ్వర ఉదాహరణము’, ‘గణేశ ఉదాహరణము’, సంస్కృతంలో ‘శ్రీ గోపాలకృష్ణ సుప్రభాతం’ వంటి భక్తి రచనలు ఆయన చేశారు. ‘ప్రబోధం’, ‘కవితాంజలి’, ‘భావ తరంగిణి’ వంటివి ఆయన రాసిన ఇతర ముఖ్యమైైన పుస్తకాలు.
తెలుగులో కవి జీవితాలపై వచ్చిన రచనలు అరుదు. వేముగంటి నరసింహాచార్యులు ముగ్గు రు తెలుగు కవుల జీవితాలపై కావ్యాలు రాయడం ఆయన విశాల హృదయానికి, సృజనాత్మకతకు నిదర్శనం. ఆ మూడు కావ్యాల్లో తిక్కన, రామదాసు రచనలు లభ్యం కాగా అన్నమయ్యపై రాసిన కా వ్యం అముద్రితం, అలభ్యం. వేముగంటి ‘తిక్క న’ కావ్య ప్రణాళిక అద్భుతం. ఈ కావ్యాన్ని చ దువుతున్నప్పుడు తిక్కన జీవితం, ఆయన రచనలు, వాటిలోని సారాన్ని వేముగంటి తన ప్రతి రక్తకణంలోకి ఇంకించుకున్న కవిపండితునిగా దర్శనమిస్తారు. అందుకే ఒకసారి ఈ కావ్యాన్ని చదివిన వారెవరైనా దాని ప్రేమలో పడిపోతారు. తిక్కన కావ్యంలోని పద్యాలు రసగర్భితాలు.
చక్కని ప్రబంధశైలితో ఉన్న అవి పాఠకులను ఆకట్టుకుంటాయి. సందర్భానుసారంగా సం స్కృత పదాలు, అచ్చ తెలుగు పదాల మేళవింపు, వర్ణనాశక్తి, అంత్యానుప్రాసలు, కంద పద్యాల పరుగులు, నుడికారాలు, సామెతలు, సహజ సంగీత శబ్దజాలం ఈ కావ్యానికి ప్రాణాలు.
వేముగంటి నరసింహాచార్య సాహిత్య రంగానికి చేసిన సేవలకుగాను కవి కోకిల, విద్వత్కవి, కావ్య కళానిధి వంటి బిరుదులు పొందారు. ప్రాచీనుల్లో తిక్కనను, ఆధునికల్లో జాషువాను వేముగంటి ఎంతో ఆరాధించారు. ప్రపంచ తెలుగు మహాసభల సందర్భంగా నరసింహాచార్యుల జీవితం, సాహిత్యం మీద చిప్పెళ్ల హరినాథ్ శర్మ మోనోగ్రాఫ్ రాశారు. దీనిని తెలుగు అకాడమీ ప్రచురించింది. తెలంగాణ భాషా సాంస్కృతిక శాఖ లేదా తెలంగాణ సాహిత్య అకాడమీ అయినా ఆయన రచనా సర్వస్వాన్ని ప్రచురించే పనికి పూనుకోవాలి. నేటి తరానికి ఆయన రచనలను అందుబాటులోకి తీసుకురావాలి. వాటి గురించి నాలుగు మాటలు మాట్లాడుకోవాలి. ఆయన జీవితాన్ని, సాహిత్య సేవను స్మరించుకోవాలి. అదే మనం వేముగంటికి ఇచ్చే నిజమైన నివాళి.
Comments (0)