నిశ్చలాకాంక్ష

16 November 2026 - 05:00
0 0
నిశ్చలాకాంక్ష
01

నీకోసం కొత్త రెక్కలు తెచ్చాను రా
ఆ వెలుగు నది ఒడ్డున
జ్ఞానేంద్రియాలు కుప్పలుగా
పడుంటాయ్‌

సజీవ కాలువలోనేమో
వాసనల ఒండ్రు నీళ్లు
ముక్తి ప్రవాహ దిశలో
తేటగా మారుతూ పోతుంటాయ్‌

మన ముఖాలు తూర్పు మొగులు
బంగారు వెలుతురులో
నిద్రలేచిన శిషువులై
పాల తెలుపు కొంగల వరుసనో

స్తబ్దుగా నింపాదిగా మెరుస్తున్న
చెట్ల ఆకుల తలలనో వీక్షిస్తూ
జీవరాశుల శబ్దాలను ఆలింగనం
చేసుకున్న ప్రకృతి సుగంధానికి
మైమరచి మనల్ని అప్పజెప్పినప్పుడు

మామూలు స్పృహలోంచి
ప్రగాఢ సృష్టి ఏకాగ్రతలోకి లాగబడి
నిశ్చలాకాంక్షులమై
ఇన్నాళ్లూ ఈడ్చుకొచ్చిన బతుకులోని
నిస్సార అర్థరహిత
విలువహీన చర్యలను
పాము కుబుసంలా విడిచిపెడుతూ

భారరహితమయ్యే సరికి
అప్పుడు అనుకోకుండానే
ఆ రెక్కలు మన భుజాలకు
మొలిచుంటాయ్‌!!
సిసలైన దృగ్గోచర స్వేచ్ఛాపటం
ఆవిష్కృతమవుతుంది!

రఘు వగ్గు

Comments (0)

User