రుక్మిణి పరిచయం ముందు..

నితిన్‌ కథానాయకుడిగా నటిస్తున్న తాజా చిత్రం ‘అలియాస్‌ రుక్మిణి’. ‘దండోరా’ ఫేమ్‌ మురళీకాంత్‌ దేవసోత్‌ దర్శకత్వం వహిస్తున్న ఈ చిత్రాన్ని హీరో నాని సమర్పణలో ఆయన సోదరి దీప్తి గంటా నిర్మిస్తున్నారు. డిసెంబర్‌ 4న ప్రేక్షకుల ముందుకురానుంది. ఈ సినిమాలో నితిన్‌ కృష్ణ అనే రచయిత పాత్రలో కనిపించనున్నారు. తన భార్య రుక్మిణి పేరుతో ఆయన రాసిన కథలు ప్రచురితమవుతుంటాయి.

ఈ నేపథ్యంలో శనివారం కృష్ణ పాత్ర తాలూకు సరికొత్త వీడియోను విడుదల చేశారు. ఇందులో రుక్మిణి తన ప్రపంచంలోకి రాకముందు కృష్ణ జీవితం ఎలా ఉండేదనే అంశాన్ని ఆవిష్కరించారు. యువకుడైన కృష్ణ కలల్ని ఆవిష్కరిస్తూ ఈ వీడియో ఆసక్తికరంగా సాగింది. ఇప్పటికే విడుదల చేసిన ప్రచార చిత్రాలకు మంచి స్పందన లభిస్తున్నదని చిత్రబృందం పేర్కొన్నది. ఈ చిత్రానికి సంగీతం: విజయ్‌ బుల్గానిన్‌, రచన-దర్శకత్వం: మురళీకాంత్‌ దేవసోత్‌.