ప్రశ్నిస్తే కేసులా?

- సల్మాన్ఖాన్ను వెంటనే విడుదల చేయాలి
- బీఆర్ఎస్ ప్రధాన కార్యదర్శి ఆర్ఎస్ ప్రవీణ్కుమార్
సైదాబాద్, నవంబర్ 21 : అక్రమ కేసులు బనాయించి జైలుకు తరలించిన బీఆర్ఎస్ నాయకుడు సల్మాన్ ఖాన్ను వెంటనే విడుదల చేయాలని బీఆర్ఎస్ ప్రధాన కార్యదర్శి ఆర్ఎస్ ప్రవీణ్కుమార్ డిమాండ్ చేశారు. చంచల్గూడ జైలులో ఉన్న సల్మాన్ ఖాన్ను శనివారం పరామర్శించి మీడియాతో మాట్లాడారు. ఎమ్మెల్సీ మీర్జ్జా రహమత్ బేగ్ ఒక పేద మహిళ ఆర్థిక పరిస్థితి బలహీనతను ఆసరా చేసుకొని ఆమె వేధించారని సోషల్ మీడియాలో ప్రచారం అవుతున్నా వ్యవహారంపై సమగ్ర విచారణ జరిపించాలని సల్మాన్ఖాన్ డీజీపీ, నగర సీపీ, డీసీపీ క్రైమ్, అసెంబ్లీ స్పీకర్ దృష్టికి తీసుకెళ్లారని ..ఆయన చేసిన తప్పేంటని ప్రశ్నించారు. మహిళలు, బాలికలపై దాడులు జరుగుతున్నాయని ప్రచారంలో ఉన్న ఘటనలకు సంబంధించిన వీడియోలపై విచారణ జరపాలని కోరడమే ఆయన చేసిన తప్పా అని ప్రశ్నించారు.
సల్మాన్ ఖాన్ను రాత్రికి రాత్రే అరెస్ట్ చేసి జైలుకు పంపించడాన్ని తీవ్రంగా విమర్శించారు. బాధిత మహిళపై కేసు నమోదు చేసి జైలుకు పంపించారని, బాధితుల గొంతు నొక్కి ఎమ్మెల్సీని రక్షించే ప్రయత్నం జరుగుతుందని ఆయన మండి పడ్డారు. ఎమ్మెల్సీతోపాటు నాంపల్లి ఎమ్మెల్యేపై విచారణ జరపాలని డిమాండ్ చేశారు. సల్మాన్ఖాన్పై సుమారు 36 కేసులు నమోదయ్యాయని, అందులో 24కేసులను కోర్టులు కొట్టివేశాయని తెలిపారు. సల్మాన్ ఖాన్ కుటుంబానికి బీఆర్ఎస్ పూర్తిగా అండగా ఉంటుందని అన్ని విధాలా ఆదుకుంటామని భరోసా ఇచ్చారు.

Comments (0)