పీటీ ఉషకు షాక్‌

న్యూఢిల్లీ: భారత ఒలింపిక్‌ సంఘం (ఐఓఏ) రాజకీయం ఊహించని మలుపు తిరిగింది. సంఘం ప్రస్తుత అధ్యక్షురాలు, లెజెండరీ అథ్లెట్‌ పీటీ ఉష తీవ్ర వివాదాల నడుమ సోమవారం జరిగిన మెరిట్‌ స్పోర్ట్స్‌ పర్సన్‌ (ఎస్‌ఓఎం) ఓటింగ్‌లో ఓడిపోయింది. మహిళా విభాగంలో ఆరుగురు పోటీ పడగా ఉష ఐదో స్థానానికి పరిమితమై ఎస్‌ఓఎంగా ఎన్నిక కాలేకపోయింది. మహిళల్లో సైనా నెహ్వాల్‌, అంజూ బాబీ, రాణి రాంపాల్‌ , డోలా బెనర్జీ గెలవగా.. పురుషుల్లో హైదరాబాదీ గగన్‌ నారంగ్‌, విజేందర్‌ సింగ్‌, యోగేశ్వర్‌ దత్‌, కమలేష్‌ మెహతా ఏకగ్రీవం అయ్యారు.

ఐఓఏ నిబంధనల ప్రకారం అధ్యక్ష పదవికి లేదా ఎగ్జిక్యూటివ్‌ కౌన్సిల్‌కు ఓ క్రీడాకారుడు పోటీ చేయాలంటే ముందుగా ఎస్‌ఓఎంగా ఎన్నికవ్వాలి లేదంటే ఏదైనా జాతీయ క్రీడా సమాఖ్యనుంచి జనరల్‌ అసెంబ్లీకి నామినేట్‌ కావాలి. 2022లో ఎస్‌ఓఎం రూట్‌లోనే ఉష అధ్యక్షురాలిగా ఏకగ్రీవంగా ఎన్నికైంది. ఇప్పుడు ఎస్‌ఓఎం ఎన్నికల్లో ఓడిపోగా భారత అథ్లెటిక్స్‌ సమాఖ్య నుంచి ఆమెకి నామినేషన్‌ దక్కడం దాదాపు అసాధ్యం కావడంతో డిసెంబర్‌ 5న జరగనున్న ఐఓఏ ప్రధాన ఎన్నికలకు ఉష పోటీ పడే అవకాశం కనిపించడం లేదు.