నేటి నుంచి ఇన్వెస్ట్‌ తెలంగాణ రిజిస్ట్రేషన్ల ప్రక్రియ

హైదరాబాద్‌, నవంబర్‌ 10 (నమస్తే తెలంగాణ) : తెలంగాణ ప్రభుత్వం ప్రతిష్ఠాత్మకంగా నిర్వహించనున్న ‘ఇన్వెస్ట్‌ తెలంగాణ గ్లోబల్‌ సమ్మిట్‌ 2026’ (ఐటీజీఎస్‌ 2026) రిజిస్ట్రేషన్ల ప్రక్రియ అధికారికంగా ప్రారంభంకాబోతున్నది. పరిశ్రమలు,వాణిజ్య శాఖ ఆధ్వర్యంలో డిసెంబర్‌ 7 నుండి 9 వరకు హైదరాబాద్‌ లోని భారత్‌ ఫ్యూచర్‌ సిటీలో మూడ్రోజుల గ్లోబల్‌ సమ్మిట్‌ జరుగనున్నది. 2047 నాటికి తెలంగాణను 3 ట్రిలియన్‌ డాలర్ల ఆర్థిక వ్యవస్థగా తీర్చిదిద్దే ‘తెలంగాణ రైజింగ్‌ 2047’ లక్ష్యంలో భాగంగా ఈ సదస్సును నిర్వహిస్తున్నారు. ఆసక్తిగల డెలిగేట్లు, పెట్టుబడిదారులు, పారిశ్రామికవేత్తలు, స్టార్టప్‌లు ఇన్వైట్‌ -ఐటీజీఎస్‌ 2026.telangana.gov.in అధికారిక పోర్టల్‌ ద్వారా ఆన్‌లైన్‌లో బుధవారం నుంచి తమ పేర్లను నమోదు చేసుకోవచ్చని ప్రభుత్వం వెల్లడించింది.

ఈ సమ్మిట్‌లో భాగంగా రక్షణ, ఏరోస్పేస్‌, ఏఐ రంగాలతో కూడిన రక్షా ఎక్స్‌పో విన్యాసాల ఎయిర్‌ షో, 136 అంకుర సంస్థలతో స్టార్టప్‌ పెవిలియన్‌, యానిమేషన్‌-గేమింగ్‌ రంగాలకు సంబంధించి ఇండియాజాయ్‌ 2026, ఫార్మా అండ్‌ లైఫ్‌ సైన్సెస్‌ ఎక్స్‌ పో, తెలంగాణ పెవిలియన్‌ సహా మొత్తం తొమ్మిది ప్రధాన ప్రదర్శనలు కొలువుదీరనున్నాయి. దీంతోపాటు వ్యవసాయం, ఇంధనం, ఆరోగ్యం వంటి రంగాల్లోని సమస్యలకు పరిషారాలు చూపేందుకు ‘తెలంగాణ ఇన్నోవేషన్‌ స్టార్టప్‌ చాలెంజ్‌’ (టీఐఎస్‌సీ) దరఖాస్తులను కూడా ఆహ్వానిస్తున్నారు.