నియంత్రించండి.. నిషేధం వద్దు!

- కర్ణాటకలో బైక్ ట్యాక్సీలకు సుప్రీంకోర్టు అనుమతి
న్యూఢిల్లీ: కర్ణాటకలో బైక్ ట్యాక్సీ సేవల కొనసాగింపునకు సుప్రీంకోర్టు అనుమతి ఇచ్చింది. ఈ విషయమై హైకోర్టు తీర్పునకు వ్యతిరేకంగా రాష్ట్ర ప్రభుత్వం దాఖలు చేసిన అప్పీల్ను కోర్టు గురువారం కొట్టివేసింది. దీంతో ఓలా, ఉబర్, ర్యాపిడో వంటి యాప్ ఆధారిత అగ్రిగేటర్లు నియంత్రణ నిబంధనలకు లోబడి సేవలు నిర్వహించేందుకు మార్గం సుగమమైంది. న్యాయమూర్తులు ఎన్ కోటీశ్వర్ సింగ్, సతీష్ చంద్ర శర్మల ధర్మాసనం ఈ తీర్పు వెలువరించింది. సరైన నియంత్రణ విధానం ద్వారా సమస్యలను పరిష్కరించవచ్చని, పూర్తిస్థాయి నిషేధం అవసరం లేదని ధర్మాసనం పేర్కొన్నది.
బైక్ ట్యాక్సీలు మహిళలకు తక్కువ ఖర్చుతో సౌకర్యవంతమైన ప్రయాణ ప్రత్యామ్నాయంగా ఉన్నాయని కోర్టు గమనించింది. ‘జీపీఎస్ సదుపాయం ఉండటంతో యువతులకు బైక్ ట్యాక్సీ సురక్షితం. నిషేధించడం కంటే నియంత్రించడం మేలు’ అని న్యాయమూర్తి శర్మ వ్యాఖ్యానించారు. ఆటో రిక్షా చార్జీలు చాలా ఎక్కువగా ఉండటంతో తన కార్యాలయంలోని యువతులు బైక్ ట్యాక్సీలనే ఎంచుకుంటున్నారని ఆయన తెలిపారు.
Comments (0)