టెమ్రిస్‌ను ‘యంగ్‌ ఇండియా’లో కలుపొద్దు

15 November 2026 - 05:30
0 0
టెమ్రిస్‌ను ‘యంగ్‌ ఇండియా’లో కలుపొద్దు
Brss
  • మొండిగా ముందుకెళ్లాలని చూస్తే పెద్ద ఎత్తున పోరాటం

  • బీజేపీతో దోస్తీ కట్టి సీఎం రేవంత్‌రెడ్డి ధోకా చేస్తున్నడు

  • బీఆర్‌ఎస్‌ మైనార్టీ నేతలు ముజీబ్‌, ఇంతియాజ్‌

హైదరాబాద్‌, నవంబర్‌ 14 (నమస్తే తెలంగాణ): నిరుపేద ముస్లిం మైనారిటీ పిల్లలకు మెరుగైన విద్యనందించే లక్ష్యంతో తెలంగాణ తొలి ముఖ్యమంత్రి కేసీఆర్‌ హయాంలో ఏర్పాటుచేసిన మైనారిటీ గురుకులాలను యంగ్‌ ఇండియా స్కూళ్లలో విలీనం చేసే నిర్ణయాన్ని ఉపసంహరించుకోవాలని బీఆర్‌ఎస్‌ మైనారిటీ సెల్‌ అధ్యక్షుడు ముజీబ్‌, కార్పొరేషన్‌ మాజీ చైర్మన్‌ ఇంతియాజ్‌ రాష్ట్ర ప్రభుత్వాన్ని డిమాండ్‌ చేశారు. మొండిగా ముందుకెళ్తే పెద్ద ఎత్తున ఉద్యమిస్తామని హెచ్చరించారు.

హైదరాబాద్‌ తెలంగాణ భవన్‌లో శనివారం వారు మీడియాతో మాట్లాడారు. గతంలో ఏబీవీపీలో పనిచేసిన సీఎం రేవంత్‌రెడ్డి కేంద్రంలోని బీజేపీతో దోస్తీకట్టి తెలంగాణకు ధోకా చేస్తున్నారని ధ్వజమెత్తారు. కేంద్ర ప్రభుత్వ కనుసన్నల్లోనే హజ్‌భవన్‌ గేటుకు తాళమేసి ప్రజలను అనుమతించడంలేదని ఆరోపించారు. మైనారిటీలకు ఏటా బడ్జెట్‌లో రూ.4వేల కోట్లు కేటాయిస్తానని, సబ్‌ప్లాన్‌ అమలు చేస్తామని, ఇమామ్‌, మౌజన్‌ల వేతనాలను రూ.10 వేలకు పెంచుతామని ఝుటా మాటలు చెప్పి అధికారంలోకి వచ్చిన కాంగ్రెస్‌, మూడేండ్లు కావస్తున్నా వాటిని అమలు చేయకుండా దగా చేసిందని మండిపడ్డారు. ఆ వేతన పెంపు దేవుడెరుగు కేసీఆర్‌ ఇచ్చిన రూ.5 వేలు కూడా ఇవ్వడంలేదని ఆరోపించారు.

అధికారం ఎక్కడో అసదుద్దీన్‌ అక్కడే!

బతికున్నంతకాలం కేసీఆర్‌తో కొనసాగుతామని నాడు గొప్పలు చెప్పిన ఎంఐఎం చీఫ్‌ అసదుద్దీన్‌ ఒవైసీ ఆచరణలో అందుకు విరుద్ధంగా వ్యవహరిస్తున్నారని ముజీబ్‌, ఇంతియాజ్‌ మండిపడ్డారు. ‘అధికారం ఎక్కడుంటే అసదుద్దీన్‌ అక్కడుంటారు.. పొద్దునలేస్తే వారి పాటే పాడతారు’ అని దెప్పి పొడిచారు. ఆయనకు ఓ విధానం, సిద్ధాంతమే లేదని.. అవకాశవాదమే ఆయనకు ప్రధానం’ అని తూర్పారబట్టారు. ఇక్కడ రేవంత్‌తో కొనసాగుతూ ఢిల్లీలో బీజేపీ కనుసన్నల్లో వ్యవహరిస్తున్నారని ఆరోపించారు. బీజేపీ గెలుపునకు పరోక్షంగా సహకరిస్తున్నారని విమర్శించారు. సీఎం రేవంత్‌రెడ్డి వేదిక ఏదైనా పాతబస్తీ ముస్లింలను అవనమానించేలా మాట్లాడుతున్నారని మండిపడ్డారు. అంతర్జాతీయ క్రికెట్‌లో సత్తా చాటుతున్న పాతబస్తీ యువకుడైన సిరాజుద్దీన్‌ను డీఎస్పీ చేశానని పదే పదే చెప్పుకోవడం సిగ్గుచేటని పేర్కొన్నారు.

సిరాజ్‌ ప్రతిభను, ముస్లింలను చిన్నచూపు చూడటం బాధాకరమని పేర్కొన్నారు. సీఎంగా రేవంత్‌ గద్దెనెక్కిన తర్వాత హజ్‌ యాత్రికులకు ఆర్థికసాయం అందించడమే లేదని వక్ఫ్‌ బోర్డు మాజీ చైర్మన్‌ మాసి ఉల్లాఖాన్‌ ఆరోపించారు. కాంగ్రెస్‌ సెక్యులర్‌ పార్టీ అని చెప్పుకోవడం తప్ప ఆచరణలో అందుకు విరుద్ధంగా వ్యవహరిస్తున్నదని మలక్‌పేట బీఆర్‌ఎస్‌ నియోజకవర్గ ఇన్‌చార్జి అజంఅలీ మండిపడ్డారు.

Comments (0)

User