జీన్స్‌ జాలీగా..

జెన్‌జీనే కాదు మిలినియల్స్‌ కూడా సౌకర్యంగా రోజువారీ ధరించే దుస్తుల్లో జీన్స్‌ ముందు ఉంటుంది. అందులోనూ లూజ్‌ ఫిట్‌ వచ్చిన తర్వాత దానికి మరింత ఆదరణ పెరిగింది. వదులుగా ఉండే ఈ తరహా జీన్సుల్లోనే ‘లేస్‌ డెనిమ్‌’లు మరింత ప్రత్యేకంగా ఆకట్టుకుంటున్నాయి. సాదాగా ఉండే జీన్సును మరింత ఫ్యాషనబుల్‌గా చూపించేలా జాలీలాంటి లేస్‌ను జత చేసి వస్తున్నాయివి.

మోకాళ్ల కింద నుంచి చీలమండ వరకూ పూల ఆకృతులు, సన్నని అల్లికలతో కూడిన లేస్‌ను జోడిస్తున్నారిందులో. మరికొన్ని మాడళ్లలో జీన్స్‌ మొత్తం పొడవునా లేస్‌ పొరను అమర్చి అందంగా తీర్చిదిద్దుతున్నారు. గంట ఆకారంలో కిందకు విస్తరించే జీన్స్‌ నమూనాలకు ఈ అలంకరణ మరింత ఆకర్షణ తెస్తున్నది. ఈ తరహా లేస్‌ జీన్స్‌లకు సాదాగా ఉండే పొట్టి చొక్కాలు, ఒంటికి అతుక్కునే టైట్‌ ఫిట్‌ మోడల్‌ టాప్‌లు, ఓపెన్‌ షోల్డర్‌ రకాలు కూడా చక్కగా నప్పుతాయి. హుందాగా కనిపిస్తూనే కొత్తదనాన్ని కోరుకునే వారు ఈ జీన్స్‌ను జాలీగా వేసుకుంటున్నారట.