కార్మికుల నెత్తురుతో.. సమ్మిట్‌ సోకులు!

• భారత్‌ సమ్మిట్‌కు ఖర్చుచేసే రూ.50 కోట్లలో
• మేజర్‌ వాటా కార్మిక సంక్షేమ బోర్డు నుంచే
• నిరుడూ ఇదే సదస్సుకు రూ.30 కోట్ల ఖర్చు
• సర్కార్‌ సొమ్ముతో కాంగ్రెస్‌ సదస్సుపై విమర్శలు

హైదరాబాద్‌, నవంబర్‌ 12 (నమస్తే తెలంగాణ): కార్మికుల చెమట చుకలతో పోగుపడిన సంక్షేమ నిధులను రాష్ట్ర ప్రభుత్వం భారత్‌ సమ్మిట్‌ పేరిట నిర్వహిస్తున్న కాంగ్రెస్‌ పార్టీ కార్యక్రమం కోసం వెచ్చిస్తున్నదన్న విమర్శలు వస్తున్నాయి. రాష్ట్ర ప్రభుత్వంతోపాటు కాంగ్రెస్‌ పార్టీ రాజకీయ విస్తరణ కోసం పనిచేస్తున్న సమృద్ధ భారత ఫౌండేషన్‌ సంయుక్తంగా ఈ సమ్మిట్‌ను నిర్వహిస్తున్న నేపథ్యంలోనే ఈ అనుమానాలు వ్యక్తమవుతున్నాయి. గత ఏడాది కూడా నిర్వహించిన ఈ సదస్సు అనంతరం ఎటువంటి పెట్టుబడి ప్రతిపాదనలు రాష్ర్టానికి రాకపోగా సుమారు రూ.30 కోట్లు ఖర్చయ్యాయన్న ఆరోపణలు వినిపిస్తున్నాయి. ఈ సారి రూ.50 కోట్ల వరకు ఈ సదస్సు కోసం వెచ్చిస్తుండగా.. ఇందులో మేజర్‌ వాటాను కార్మిక సంక్షేమ బోర్డు నుంచి కేటాయించనున్నట్టు తెలుస్తున్నది.

సుమారు 70 దేశాల నుంచి వెయ్యి మందికి పైగా విదేశీ ప్రతినిధులు, కాంగ్రెస్‌ జాతీయ నాయకులు, మేధావులు, వివిధ రంగాల ప్రముఖులు హాజరవుతున్న ఈ కార్యక్రమానికి స్టార్‌ హోటళ్లలో బస, ఖరీదైన వాహనాలు, ఆతిథ్యం, ఇతర ఏర్పాట్ల కోసం ప్రభుత్వంలోని పలు శాఖలు నిధులు సమకూరుస్తున్నట్టు ప్రచారం జరుగుతున్నది. కార్మికశాఖ బోర్డు నుంచి ఏటీసీ నిర్వహణ ఉత్తర్వులతో ఈ నిధులు గుంజుతున్నట్టు విశ్వసనీయంగా తెలిసింది. అంతర్జాతీయ వేదికపై తెలంగాణ ప్రతిష్ఠను పెంచడమే లక్ష్యమని చెబుతున్న ప్రభుత్వం.. ఆ ప్రతిష్ఠ కోసం వెచ్చిస్తున్న ప్రజాధనం ఎంత? అందులో కార్మికుల వాటా ఎంత? సమ్మిట్‌ వల్ల రాష్ట్రానికి వచ్చే ప్రత్యక్ష ప్రయోజనం ఏమిటి? అనే వివరాల వెల్లడిలో మౌనం వహిస్తున్నది.

నిరుటి సదస్సుతో జరిగిన ప్రయోజనమేంది?

హైదరాబాద్‌లోని హైటెక్స్‌లో ఈ నెల 14 వరకు జరుగనున్న భారత్‌ సమ్మిట్‌ గురువారం ప్రారంభమైంది. ప్రపంచ రాజకీయ పరిణామాలు, ప్రజాస్వామ్యం, అంతర్జాతీయ సంబంధాలు, సహకార సమాఖ్య విధానం, ఎన్నికల సమగ్రత తదితర అంశాలపై చర్చించేందుకు ఈ వేదికను ఏర్పాటు చేసినట్టు కాంగ్రెస్‌ నాయకులు చెప్తున్నారు. అంతర్జాతీయ స్థాయి మేధావులు, విధాన రూపకర్తలు, రాజకీయ నాయకులు ఒకే వేదికపైకి రావడం వల్ల తెలంగాణకు ప్రయోజనం చేకూరుతుందని ప్రభుత్వం వాదిస్తున్నది.

గత ఏడాది జరిగిన మొదటి భారత్‌ సమ్మిట్‌కు సుమారు రూ.30 కోట్లు ఖర్చయినట్టు తెలిసింది. హైదరాబాద్‌లోని స్టార్‌ హోటళ్లలో విదేశీ ప్రతినిధులకు బస, భోజన సదుపాయాలు, రవాణా, ఇతర ఏర్పాట్ల కోసం పెద్ద మొత్తంలో ఖర్చు చేసినట్టు కథనాలు వెలువడ్డాయి. విదేశీ పెట్టుబడులను ఆకర్షించడం, అంతర్జాతీయ సంస్థలతో సంబంధాలు పెంపొందించడం, పెట్టుబడుల గమ్యస్థానంగా నిలపడం వంటి లక్ష్యాలను అప్పట్లో ప్రభుత్వం ప్రచారం చేసింది. సదస్సు ముగిసిన తర్వాత ఎన్ని పెట్టుబడి ప్రతిపాదనలు వచ్చాయి? ఎన్ని సంస్థలు పెట్టుబడులు పెట్టేందుకు ముందుకొచ్చాయి? ఎన్ని ఒప్పందాలు కార్యరూపం దాల్చాయి? అనే అంశాలపై సమగ్ర నివేదికను ప్రభుత్వం ఇప్పటివరకు విడుదల చేయలేదు.

ఇప్పుడు రెండో ఎడిషన్‌ సమ్మిట్‌ కోసం అంతకంటే ఎకువ మొత్తాన్ని ఖర్చు చేసేందుకు సిద్ధపడుతున్నది. సుమారు రూ.50 కోట్లు ఖర్చు చేస్తున్నట్టు చెప్తున్నారు. ఇందులో మేజర్‌ వాటా కార్మిక సంక్షేమ బోర్డు నుంచి సేకరించినట్టు తెలిసింది. అడ్వాన్స్‌డ్‌ టెక్నాలజీ సెంటర్ల నిర్వహణ పేరుతో నిధులు సమీకరించినట్టు ప్రచారం జరుగుతున్నది. మిగిలిన నిధులు జీహెచ్‌ఎంసీ, ట్రాన్స్‌పోర్టు, టూరిజం, మున్సిపల్‌ శాఖల నుంచి సేకరిస్తున్నట్టు తెలిసింది.

ఒక్కో ప్రతినిధికి రూ.8 లక్షల ఖర్చు!

ఈ సమ్మిట్‌లో పాల్గొనే ఒక్కో ప్రతినిధి కోసం రూ.3 లక్షల నుంచి రూ.8 లక్షల వరకు ఖర్చు చేస్తున్నట్టు ప్రచారం జరుగుతున్నది. హైదరాబాద్‌లోని ప్రముఖ స్టార్‌ హోటళ్లలో గదులను ముందుగానే బుక్‌ చేసినట్టు సమాచారం. రవాణా శాఖ సుమారు 400 కార్లు, 100 ఏసీ బస్సులు సమకూర్చినట్టు తెలిసింది. రాహుల్‌, ఏఐసీసీ అధ్యక్షుడు ఖర్గే సహా కాంగ్రెస్‌ అగ్రనేతలు హాజరయ్యే ఈ కార్యక్రమానికి రాజభోగాలు ఏర్పాటు చేస్తున్నారనే విమర్శలు వినిపిస్తున్నాయి.

విదేశాల నుంచి మేధావి వర్గం పేరుతో వస్తున్న వారిలో అధికశాతం కాంగ్రెస్‌ సానుభూతిపరులు, ఆ పార్టీ కోసం పనిచేసే థింక్‌ ట్యాంకర్లే ఉన్నారని రాజకీయ వర్గాల్లో చర్చ జరుగుతున్నది. వీరి రాక వల్ల తెలంగాణ రాష్ట్రానికి ఒక రూపాయి పెట్టుబడి కానీ రాదని విమర్శకులు అభిప్రాయపడుతున్నారు. నిరుడు కూడా విదేశీ ప్రతినిధులతో పెట్టుబడులపై చర్చలు అంటూ ప్రభుత్వం ప్రచారం చేసి నా, క్షేత్రస్థాయిలో ఎలాంటి ఫలితాలు కనిపించలేదని పారిశ్రామికవర్గాలు గుర్తుచేస్తున్నాయి.

సదస్సు నిర్వహణకు కర్ణాటక విముఖత

భారత్‌ సమ్మిట్‌ రెండో ఎడిషన్‌ను కాంగ్రెస్‌ అధికారంలో ఉన్న కర్ణాటక, కేరళ, అరుణాచల్‌ప్రదేశ్‌ రాష్ట్రాల్లో ఏదో ఒకచోట నిర్వహించాలని తొలుత భావించినట్టు తెలిసింది. నిరుడు తెలంగాణలో నిర్వహించినందున ఈసారి ఇతర రాష్ట్రాల్లో ముఖ్యంగా బెంగళూరులో నిర్వహించాలని కాంగ్రెస్‌ అధినాయకత్వం సూచించినట్టు సమాచారం. కర్ణాటక సీఎం డీకే శివకుమార్‌ ఆర్థిక ఇబ్బందుల కారణంగా పార్టీ పరంగా అంత భారీ కార్యక్రమాన్ని నిర్వహించేందుకు ఆసక్తి చూపలేదని తెలిసింది. అయితే సీఎం రేవంత్‌రెడ్డి ప్రభుత్వ సహకారంతో నిర్వహణకు ముందుకొచ్చారని చెప్పుకొంటున్నారు.