కాంగ్రెస్‌ రాష్ట్ర ఇన్‌చార్జిగా అశోక్‌ గెహ్లాట్‌!

హైదరాబాద్‌, నవంబర్‌ 13 (నమస్తే తెలంగాణ): రాష్ట్రంలో సీఎం రేవంత్‌ – మహేశ్‌గౌడ్‌ ప్రభుత్వం, పార్టీ వ్యవహారాలను ముందుండి నడిపిస్తున్నారు. కానీ ఇటీవల రాష్ట్రంలో జరుగుతున్న కొన్ని పరిణామాలను వారు పరిష్కరించలేక చేతులెత్తేశారు. దీంతో వైరి వర్గాలు పార్టీ అధిష్ఠానం వద్దకు పరుగులు పెడుతున్నాయి. త్వరలో తెలంగాణలో ఖైరతాబాద్‌ ఉప ఎన్నికలతోపాటు గ్రేటర్‌ ఎన్నికలు, పరిషత్‌, ఎమ్మెల్సీ ఎన్నికలు జరుగనున్నాయి. ఇలాంటి సమయంలో రాష్ట్రంలో పార్టీని మరింత బలోపేతం చేయడం కోసం కసరత్తు కొనసాగుతున్నది.

ప్రస్తుత రాష్ర ్ట ఏఐసీసీ ఇన్‌చార్జి మీనాక్షి నటరాజన్‌ను మారుస్తారని ప్రచారం జరుగుతున్న నేపథ్యంలో తర్వాత ఇన్‌చార్జిగా ఎవరిని నియమించాలనే అంశంపై ఏఐసీసీ తీవ్రంగా కసరత్తు చేసినట్టు తెలిసింది. అందులో భాగంగా రాజస్థాన్‌ మాజీ సీఎం, సీనియర్‌ నేత అశోక్‌ గెహ్లాట్‌కు తెలంగాణ బాధ్యతలు అప్పగించాలని పార్టీ అధిష్ఠానం నిర్ణయించినట్టు తెలిసింది. డిసెంబర్‌ 7వ తేదీకి రాష్ట్రంలో కాంగ్రెస్‌ ప్రభుత్వం ఏర్పడి మూడేండ్లు పూర్తికానున్నది. కొత్త ఇన్‌చార్జి పేరును ఆ రోజు అధికారికంగా ప్రకటించే అవకాశం ఉన్నట్టు పార్టీ సీనియర్‌ నేతలు చెప్తున్నారు.