ఇన్నారుల్లా!

22 November 2026 - 02:00
0 0
ఇన్నారుల్లా!
Co3

రైతన్నకు చుక్కలు.. సర్కారుకు కోట్లు!

రైతులకు యూరియా యాప్‌తో చుక్కలు చూపించిన రాష్ట్ర ప్రభుత్వానికి కేంద్రం రూ.665 కోట్ల ప్రోత్సాహకం ఇచ్చిందట. అంతే.. వ్యవసాయ రంగంలో సంస్కరణలకు జాతీయ స్థాయి గుర్తింపు వచ్చిందని చెప్పుకొంటున్న మంత్రి మురిపెం మామూలుగా లేదు. కాగితాల మీద లెక్కలు చూస్తే కాకి పిల్ల కాకికి ముద్దే! కానీ క్షేత్రస్థాయిలో రైతుల కష్టాలు మాత్రం కొండంత. యూరియా బుకింగ్‌ కోసం నిద్ర మానుకొని, పనులు వదులుకొని, ఫోన్‌ పట్టుకొని పడిగాపులు కాసిన రైతన్నల గోస ఎవరికి కనిపిస్తున్నది? సరైన సమయంలో ఎరువు అందక పోవడం తో పంట దిగుబడి తగ్గినా, తెగుళ్లు సోకినా నష్టాన్ని భరించేది రైతే కదా! అలాంటప్పుడు కూడా రైతు గుండె నిబ్బరం చేసుకుంటాడు. కానీ తనకు వచ్చిన నష్టం వల్ల ప్రభుత్వానికి బహుమతులు వచ్చినాయంటే ఎలా ఉంటుంది? ‘చెప్పేవాడికి వినేవాడు లోకువ’ అన్నట్టు పాలకులు యాప్‌ విజయాల లెక్కలు చెప్పుకోవడం కాదు, రైతుకు చాలినంత ఎరువు దొరికినప్పుడే సంస్కరణలకు అసలైన సార్థకత. కేంద్రం ఇచ్చిన నిధులతో రాష్ట్ర ప్రభుత్వ పెద్దలు మురిసిపోవడం.. ఆ నిధుల వెనుకనున్న రైతన్నల కన్నీళ్లను గుర్తించకపోవడం అర్థరహితం, అమానవీయం.

గ్లోబల్‌ సమ్మిట్లు.. ఆఫీసుల లొల్లులు!

Co2

హైదరాబాద్‌ ఐటీ కారిడార్‌లో జాతీయ పార్టీల తీరు చూస్తుంటే ‘చెట్టు పేరు చెప్పి కాయలమ్ముకున్నట్టు’ ఉన్నది. ఒకవైపు గ్లోబల్‌ సమ్మిట్లు పెట్టి ప్రపంచ స్థాయి కంపెనీలను రమ్మని పిలుస్తూనే, మరోవైపు ఉన్న ఐటీ సంస్థల ఆఫీసుల ముందు రాజకీయ రచ్చ చేయడం ఇచ్ఛంత్రంగా ఉన్నది. తమ నాయకుల సోషల్‌ మీడియా ఖాతాలను సస్పెండ్‌ చేశారనే కోపంతో గచ్చిబౌలిలోని మెటా (ఫేస్‌బుక్‌) ఆఫీస్‌ వద్ద యూత్‌ కాంగ్రెస్‌ నాయకులు హంగామా సృష్టించడం, దాడికి దిగడం చర్చనీయాంశమైంది. మరోవైపు టీసీఎస్‌ వద్ద బీజేపీ శ్రేణులు నిరసనల పేరుతో ఆందోళన చేపట్టాయి. ఇలా రెండు జాతీయ పార్టీలు తమ రాజకీయ ప్రయోజనాల కోసం కార్పొరేట్‌ సంస్థలను టార్గెట్‌ చేయడం పట్ల సాఫ్ట్‌వేర్‌ ఉద్యోగులు, విశ్లేషకులు ఆందోళన వ్యక్తం చేస్తున్నారు. అంతర్జాతీయ ఐటీ దిగ్గజం ఆఫీస్‌ వద్ద జరిగిన ఘటనపై మేధావులు, మీడియా వర్గాలు.. మౌనంగా ఉండటంలో ఆంతర్యం అర్థమవుతూనే ఉన్నది. సామాన్యుల సోషల్‌ మీడియా పోస్టులపై కేసులు పెట్టించే పాలకులు, తమ ఖాతాలపై చర్యలు తీసుకుంటే సహించలేకపోవడం ద్వంద్వ నీతికి నిదర్శనం. ఐటీ రంగానికి భద్రత కల్పించడంపై ప్రభుత్వం దృష్టి సారించాలి. పెట్టుబడిదారుల్లో నమ్మకం కలిగించి, యువతకు ఉపాధి అవకాశాలు పెంచే దిశగా బాధ్యతాయుతంగా వ్యవహరించాలి.

ఎవరినో.. ఎర్రి కుక్క కరిచిందట..!

Co1

ప్రతిపక్షం ప్రశ్నిస్తే అధికారపక్షం సమాధానం చెప్పాలె. సొంత పార్టీ నేతలు గొంతెత్తితే సంజాయిషీ ఇవ్వాలె. కానీ సీఎం రేవంత్‌రెడ్డి మాత్రం ప్రశ్నలకు ప్రష్టేషన్‌.. విమర్శలకు ఇరిటేషన్‌ ఫీలైతున్నరు. తాగు, సాగునీటి సరఫరాలో లోపాలు, భూకబ్జాలు, అడ్డగోలు కేటాయింపులపై బీఆర్‌ఎస్‌ నేతలు సంధిస్తున్న ప్రశ్నలకు జవాబివ్వలేక సర్కార్‌ పెద్దలు సతమతమవుతున్నరు. అధికారపార్టీ ఎమ్మెల్యేలు రాజగోపాల్‌రెడ్డి, అనిరుధ్‌రెడ్డి కూడా ప్రభుత్వాన్ని నిలదీస్తున్నరు. అధికారులు పైసలిస్తేనే పనులు చేస్తున్నరని ఒకరు.. మూడేండ్ల పాలనపై ప్రజల్లో ఆగ్రహం నెలకొన్నదని మరొకరు కుండబద్దలు కొట్టారు. సరే ఆ సంగతులు అలా ఉంటే, సిద్దిపేట సభలో రేవంత్‌రెడ్డి మాట్లాడుతూ తమ పార్టీ వాళ్లలో ఎవరినో ఎర్రికుక్క కరిచిందని అన్నారు. ఇదంతా చూస్తున్న జనాలకు ఏమీ అర్థం కాలేదు. ఎర్రికుక్క ఎవరిని కరిచింది? ఎవరు ఎందుకు మొరుగుతున్నరు? అసలేం జరిగింది? అని అంతా ఆశ్చర్యంగా ఆలోచనలో పడ్డారు. మొఖం సక్కకలేక అద్దం నేలకు కొడితే ఎట్లా అని జనం గుసగులు ఆడుకుంటున్నరు… ఎవరి గురించో ఏమో మరి..! తమకు కావాల్సింది మైకుల్లో అరిచే నేతలు కాదు, పనిచేసే నాయకులు అని ప్రజలు అంటున్నరు. ప్రశ్నలు అడగడం పిచ్చి అయితే పాలకుల పని ఏంటో మరి..!

లెక్కలు పాతవి, వసూళ్లు కొత్తవి!

Co

పాత కరెంట్‌ బిల్లులు వినియోగదారుల నెత్తిన పడ్డయి. మొదట నవంబర్‌లో యూనిట్‌కు 30 పైసలు వసూలు చేసినయి, డిసెంబర్‌ నుంచి యూనిట్‌కు 50 పైసలు వసూలు చేయడానికి తయారైనయి. జనానికి ఈ ట్రూఅప్‌ వడ్డన రెండేండ్లపాటు తప్పేటట్టు లేదు. గతంలో కేసీఆర్‌ సర్కార్‌ ఈ భారాన్ని ప్రజలకు మినహాయించింది. ఇప్పుడు రేవంత్‌ సర్కార్‌ జనం మీదనే వేస్తున్నది. అద్దె ఇండ్లకు సంబంధించి ఇదొక విచిత్రమైన వ్యవహారం. గతంలో ఆ ఇంట్లో ఎవరో అద్దెకు ఉండి వినియోగించిన విద్యుత్తుకు ఇప్పుడు ఆ ఇంట్లో కిరాయికి ఉన్న వాళ్లు బిల్లులు చెల్లించాలని అనడం దారుణం. పాత బిల్లుల పుణ్యమా అని యజమానులు, కిరాయిదార్ల మధ్య కిరికిరి మొదలైంది. పాత బిల్లులు కట్టే బాధ్యత మీదంటే మీదేనని గొడవలు పడుతున్నరు. ఉత్సవాలకు, ఆర్భాటాలకు, విదేశీ పర్యటనలకు కోట్లు ఖర్చు పెట్టే సర్కార్‌.. సామాన్యుల కరెంట్‌ బిల్లుల వసూలు విషయంలో మాత్రం మొండిగా వ్యవహరించడం ఏంటో..! పాత లెక్కల భారాన్ని ప్రజల పాలిట శాపంగా మార్చకుండా, ప్రభుత్వమే భరిస్తే పేదలకు ఊరట కలుగుతుంది.

-దాము నర్మాల

Comments (0)

User