‘ఇందిరమ్మ’ ఫైనల్‌ బిల్లులు ఎప్పుడిస్తరు?

• గృహ ప్రవేశాలు జరిగినా ఇవ్వరా?.. బీఆర్‌ఎస్‌ రాష్ట్ర ప్రధాన కార్యదర్శి జీవన్‌రెడ్డి

సారంగాపూర్‌, నవంబర్‌ 9 : ‘అప్పులు చేసి లబ్ధిదారులు ఇందిరమ్మ ఇండ్ల నిర్మాణాలు పూర్తి చేశారు.. ఫైనల్‌ బిల్లులు ఎప్పుడు ఇస్తారు. దీపావళి సంబురాలు కాదు.. పూర్తి బిల్లులు ఇవ్వండి’ అని బీఆర్‌ఎస్‌ రాష్ట్ర ప్రధాన కార్యదర్శి టీ జీవన్‌రెడ్డి డిమాండ్‌ చేశారు. సోమవారం ఆయన జగిత్యాల జిల్లా సారంగాపూర్‌ మండలం లక్ష్మీదేవిపల్లి, బట్టపల్లి, రేచపల్లి, బీర్‌పూర్‌ మండలంలోని పలు గ్రామాల్లో పర్యటించారు. లబ్ధిదారులతో మాట్లాడారు. ఆయా గ్రామాల్లో తమకు ఫైనల్‌ బిల్లులు రావడం లేదని పలువురు ఇందిరమ్మ లబ్ధిదారులు జీవన్‌రెడ్డి దృష్టికి తీసుకురాగా, ఈ సందర్భంగా ఆయన మీడియాతో మాట్లాడారు. గృహ ప్రవేశాలు పూర్తయిన ఇండ్లకు ఫైనల్‌ బిల్లులు ఎందుకు రావడం లేదని ప్రశ్నించారు.

‘ఒక వైపు దీపావళి సంబురాలు అని చెప్పుడు బాగానే ఉన్నది. కానీ, ఇండ్లకు ఫైనల్‌ బిల్లులు ఎప్పుడిస్తారు?’ అని నిలదీశారు. ఇల్లు పూర్తి కావాలంటే రూ.15 లక్షల వరకు ఖర్చవుతుందని, ప్రభుత్వం ఇస్తానన్న రూ.5 లక్షలు కూడా ఇవ్వకుండా రూ.1.50 లక్షలు ఆపి దీపావళి సంబురాలు చేసుకోవాలనడం సరికాదని అన్నారు. ఫైనల్‌ బిల్లులు ఇవ్వకపోతే అప్పులు చేసి కట్టుకున్నవారి పరిస్థితి ఏందని ప్రశ్నించారు. బీర్‌పూర్‌ మండల కేంద్రంలోని తెలంగాణ తల్లి విగ్రహం నుంచి సిర్‌పూర్‌ వైపు పంటలకు నీటి అవసరం ఉన్నని, మరొక తడి విడుదల చేయాలని కోరారు. ఇప్పుడు నీళ్లిస్తేనే పంటలకు ఉపయోగపడుతుందని అన్నారు.