ఆ క్షణంలో కన్నీళ్లు ఆగలేదు!

నటీనటులకు కొన్ని పాత్రలు కేవలం గొప్ప జ్ఞాపకాలను మాత్రమే కాకుండా అంతకుమించిన భావోద్వేగాలను మిగుల్చుతాయి. ముఖ్యంగా ప్రజలు దైవాలుగా కొలిచే పౌరాణిక పాత్రల్ని చేస్తున్నప్పుడు ఆ అనుభూతి చాలా ప్రత్యేకంగా ఉంటుంది. అలాంటి ఓ అరుదైన అనుభవమే అగ్ర కథానాయిక సాయిపల్లవికి ఎదురైంది. ఇటీవల విడుదలైన ‘రామాయణ: రైజ్‌ ఆఫ్‌ ఏ లెజెండ్‌’ చిత్రంలో సాయిపల్లవి సీత పాత్రలో నటించిన విషయం తెలిసిందే. షూటింగ్‌ సమయంలో ఓ సన్నివేశం పూర్తికాగానే డైలాగ్‌ కోచ్‌ వచ్చి తన పాదాలకు నమస్కరించారని, ఆ క్షణంలో తాను భావోద్వేగాన్ని ఆపుకోలేక కన్నీళ్లు పెట్టుకున్నానని సాయిపల్లవి తెలిపారు.

‘మనం ప్రతీ రోజు పూజించే పాత్రను ఎవరైనా పోషిస్తున్నప్పుడు ఆ పాత్ర మీద పూజ్యభావం కలుగుతుంది. ఆమె ఓ సాధారణ మహిళే కదా అనే విషయాన్ని పట్టించుకోం. మనసులో ఉన్న ఆరాధనను వ్యక్తం చేయాలనుకుంటాం. ఆమె నా పాదాలను తాకినప్పుడు తను ఏడవకముందే నేను ఏడ్చాను. ‘మీరు అసలు ఏం చేస్తున్నారు’ అని అడిగాను. అప్పుడే సీతమ్మ పాత్ర ఎంత మంది హృదయాల్లో కొలువై ఉందో అర్థమైంది. ఆమె నాపై చూపించిన ప్రేమకు ఎంతో వినయంగా, భావోద్వేగంతో స్పందించాను’ అని సాయిపల్లవి చెప్పింది. నితేష్‌ తివారి దర్శకత్వంలో రూపొందిన ‘రామాయణ’ చిత్రం ప్రపంచవ్యాప్తంగా వెయ్యికోట్లకుపైగా వసూళ్లతో దూసుకుపోతున్నది.