‘రోగుల‌కు అందుబాటులో ఉంటూ మెరుగైన సేవ‌లు అందించాలి’

– డీసీహెచ్ఎస్ సూర్య శ్రీ రావు

రామన్నపేట, నవంబర్ 12 : ప్రభుత్వ ఆస్ప‌త్రిలో సాధారణ కాన్పుల సంఖ్యను పెంచేందుకు వైద్యులు, సిబ్బంది ప్రత్యేక దృష్టి సారించాలని డీసీహెచ్ఎస్ వై.సూర్య శ్రీ రావు సూచించారు. గురువారం రామన్నపేట ప్రభుత్వ ఆస్ప‌త్రిని ఆమె ఆకస్మికంగా తనిఖీ చేశారు. హాజరు రిజిస్టర్ల‌ను పరిశీలించారు. వార్డులలో, ఓపి విభాగంలో తిరిగి రోగులకు అందుతున్న వైద్య సేవల గురించి అడిగి తెలుసుకున్నారు. వైద్య సేవలు, ప్రసవాల పరిస్థితిపై వైద్యులతో సమావేశం ఏర్పాటు చేసి పలు సూచనలు చేశారు. గురువారం ఒక్కరోజే ఆస్పత్రిలో ఐదు కాన్పులు నిర్వహించడం పట్ల వైద్యులను అభినందించారు. రోగులకు అందుబాటులో ఉంటూ ఇంకా మెరుగైన మంచి సేవలు అందించాలని వైద్యులకు సూచించారు. ఆస్ప‌త్రిలో పారిశుధ్యం, మందుల లభ్యత, రోగులకు అందుతున్న సేవలపై సంతృప్తి వ్యక్తం చేశారు. రేడియాలజిస్ట్ లేకపోవడం వల్ల స్కానింగ్ కు గర్భిణీ స్త్రీలు ఇబ్బంది పడుతున్నారని వైద్యులు ఆమె దృష్టికి తీసుకురాగా త్వరలోనే రేడియాలజిస్టును నియమిస్తామని తెలిపారు.