రైతులు ప్రత్యామ్నాయ పంటల సాగుపై దృష్టి పెట్టాలి : హాలియా ఏడీఏ సరిత

గుర్రంపోడ్, నవంబర్ 09 : ఎల్‌ నినో ప్రభావం వల్ల రైతులు ప్రత్యామ్నాయ పంటల సాగుపై దృష్టి పెట్టాలని హాలియా ఏడీఏ సరిత అన్నారు. సోమవారం గుర్రంపోడ్‌ మండలంలోని రైతు వేదికలో రైతులకు అవగాహన కల్పించి మాట్లాడారు. రానున్న వ్యవసాయ సీజన్‌లో ఎల్‌నినో ప్రభావం వల్ల వర్షపాతం తగ్గడం, ఉష్ణోగ్రతలు పెరగడం, నీటి లభ్యతపై ఏర్పడే ప్రభావాల గురించి రైతులకు వివరించారు. ఎల్‌నినో పరిస్థితులను దృష్టిలో ఉంచుకుని రైతులు పంటల సాగు ప్రణాళికను ముందుగానే సిద్ధం చేసుకోవాలని సూచించారు. తక్కువ నీటి అవసరం కలిగిన ఆరుతడి పంటలైన కంది, పెసర, మినుము, జొన్న, సజ్జ, కొర్ర వంటి పంటలను సాగు చేయాలని సూచించారు. పంటల ఎంపికలో స్థానిక వాతావరణ పరిస్థితులు, నేల స్వభావం మరియు నీటి లభ్యతను పరిగణనలోకి తీసుకోవాలని తెలిపారు.

అలాగే వరి పంట కోత అనంతరం పంట అవశేషాలను (వరి గడ్డిని) పొలాల్లో తగులబెట్టవద్దని రైతులకు సూచించారు. పంట అవశేషాలను కాల్చడం వల్ల నేలలోని ఉపయోగకరమైన సూక్ష్మజీవులు నశించడంతో పాటు పర్యావరణ కాలుష్యం ఏర్పడుతుందని వివరించారు. వరి గడ్డిని తగులబెట్టకుండా పొలంలోనే కలియదున్నడం లేదా ఇతర సేంద్రీయ పద్ధతుల్లో వినియోగించుకోవాలని సూచించారు. నీటి పొదుపు పద్ధతులు పాటిస్తూ, అనుకూలమైన పంటలను ఎంపిక చేసుకొని ఎల్‌నినో ప్రభావాన్ని అధిగమించే విధంగా రైతులు వ్యవసాయ ప్రణాళికలు రూపొందించుకోవాలని ఏడీఏ రైతులకు సూచించారు.ఈ కార్యక్రమంలో మండల వ్యవసాయ అధికారి కంచర్ల మాధవరెడ్డి, వ్యవసాయ విస్తరణ అధికారులు రామాంజనేయులు, గౌతమి, భాగీరథ, హఫీదా, జ్యోత్స్న, ధరణి, నేతాజీ, ప్రజా ప్రతినిధులు, రైతులు పాల్గొన్నారు.