బీమా లేకుండా టోల్ దాటితే మొబైల్కు అలర్ట్

- పైలట్ ప్రాజెక్ట్ ప్రారంభించిన ఎన్హెచ్ఏఐ
న్యూఢిల్లీ: జాతీయ రహదారుల టోల్ ప్లాజాల వద్ద చెల్లుబాటులో ఉన్న థర్డ్ పార్టీ బీమా లేని వాహన యజమానులకు ఎస్ఎంఎస్ హెచ్చరికలు పంపే పైలట్ ప్రాజెక్ట్ ను భారత జాతీయ రహదారుల ప్రాధికార సంస్థ(ఎన్హెచ్ఏఐ) ప్రారంభించింది. తప్పనిసరి అయిన థర్డ్ పార్టీ బీమా చెల్లుబాటులో లేకుంటే, జాతీయ రహదారిపై టోల్ ప్లాజా దాటిన కొన్ని నిమిషాల్లోనే వాహన యజమానికి ఎస్ఎంఎస్ హెచ్చరిక అందనున్నది. ఢిల్లీలోని యూఈఆర్-2పై ఉన్న ముండ్కా టోల్ ప్లాజాలో ఈ ప్రాజెక్టును ప్రారంభించారు. దీన్ని త్వరలో దేశవ్యాప్తంగా విస్తరించనున్నారు. సకాలంలో బీమాను పునరుద్ధరించేలా వాహన యజమానులను ప్రోత్సహించడమే లక్ష్యంగా వ్యవస్థను స్థిరీకరించేందుకు ఈ ట్రయల్ను నిర్వహించనున్నట్లు సమాచారం.
‘పాలసీ గడువు ముగిసినా లేదా వాహనానికి బీమా లేకపోయినా, రిజిస్ట్రేషన్ నంబర్, టోల్ ప్లాజా దాటిన సమయం, బీమా గడువు ముగిసిన వివరాలతో యజమానికి ఎస్ఎంఎస్ వెళ్తుంది. గడువు తేదీని కూడా అందులో పేర్కొని, మోటారు వాహనాల చట్టం కింద జరిమానాను తప్పించుకోవడానికి బీమాను పునరుద్ధరించుకోవాలని సూచిస్తారు’ అని ఒక అధికారి తెలిపారు. బీమా లేని వాహనాలు రోడ్డు ప్రమాదాల్లో చిక్కినప్పుడు బాధితులకు పరిహారం పొందే అవకాశాలు పరిమితమవుతున్నందున, వాహన యజమానులు సమయానికి బీమాను పునరుద్ధరించుకునేలా ఈ చర్య చేపట్టారు. ప్రస్తుత చట్టం ప్రకారం, బీమా లేని వాహనానికి తొలిసారి నిబంధన ఉల్లంఘన జరిగినప్పుడు మూల ప్రీమియానికి మూడు రెట్లు లేదా రూ.5 వేలు, ఏది ఎక్కువైతే అది చెల్లించాల్సి ఉంటుంది. రెండోసారి బీమా నిబంధనను ఉల్లంఘిస్తే మూల ప్రీమియానికి ఐదు రెట్లు లేదా రూ.10 వేలు, ఏది ఎక్కువైతే అది జరిమానాగా విధిస్తారు.
Comments (0)