పండుగవేళ వసూళ్ల బాగోతం..!

• ముగ్గురు ఖాకీలపై బెదిరింపుల కేసు..

సిటీబ్యూరో, నవంబర్‌ 9 ( నమస్తే తెలంగాణ): ఫిల్మ్‌నగర్‌లో పోలీసుల బెదిరింపుల పర్వం మరవకముందే ఖాకీల మరో బెదిరింపుల వ్యవహారం వెలుగు చూసింది. సామాన్యుడి నుంచి డబ్బులు డిమాండ్‌ చేసిన ఆరోపణలతో ఇద్దరు కానిస్టేబుళ్లు, ఒక హోంగార్డుపై ఎక్స్‌టార్షన్‌ కేసు నమోదైంది.వివరాల్లోకి వెళ్తే సనత్‌నగర్‌ పోలీసు స్టేషన్‌ పరిధిలో ఆదివారం సాయంత్రం విధుల్లో ఉన్న ఇద్దరు కానిస్టేబుళ్లు, ఒక హోంగార్డు ఓ వాహనదారుడితో గొడవకు దిగారు.ఈ క్రమంలో అతనితో పాటు బైక్‌ను కూడా పోలీసు స్టేషన్‌కు తీసుకెళ్లారు. దీంతో ఆందోళనకు గురైన బాధితుడు తన వాహనాన్ని తనకు తిరిగి ఇవ్వాలని బతిమలాడాడు. కానీ బైక్‌ ఇవ్వాలంటే రూ.2వేలు ఇవ్వాలని ముగ్గురు పోలీసులు డిమాండ్‌ చేసినట్లు బాధితుడు చెప్పాడు.

దీంతో బాధితుడు రూ.1000 ఇస్తానని చెప్పి ఆ మొత్తాన్ని వారికి ఇచ్చి తన బైకును తీసుకుని వెళ్లిపోయాడు. పోలీసులకు తాను లంచం ఇచ్చి బయటపడ్డానంటూ బాధితుడు ఈ ఘటనను సోషల్‌మీడియాలో పోస్టు చేయడంతో విషయం బయటకు వచ్చింది. హరికృష్ణ అనే వ్యక్తి తన ఇన్‌స్టాగ్రామ్‌ ఖాతాలో పోలీసులతో తనకు జరిగిన వివాదాన్ని, తాను డబ్బులు ఇచ్చిన వైనాన్ని చెబుతూ వీడియో చేసి పోస్టు చేశారు.

ఈ విషయం ఉన్నతాధికారుల దృష్టికి వెళ్లడంతో అతనిని పిలిచి వివరాలు సేకరించారు. అతని నుంచి లిఖిత పూర్వక ఫిర్యాదు తీసుకున్న తర్వాత సోమవారం సనత్‌నగర్‌ పీఎస్‌లో కేసు నమోదు చేసి విచారణ చేపట్టారు.ఆరోపణలు ఎదుర్కొంటున్న ఇద్దరు కానిస్టేబుళ్లతో పాటు హోంగార్డుపై చర్యలు తీసుకోనున్నట్లు తెలిసింది.