నవ్వుల విందుకు సిద్ధం

ఎన్టీఆర్‌ అంటేనే యాక్షన్‌ పవర్‌హౌస్‌, ఇక దర్శకుడు అనిల్‌ రావిపూడి తనదైన కామెడీతో ప్రేక్షకుల్ని కడుపుబ్బా నవ్విస్తాడు. ఈ ఇద్దరు కలిస్తే ఎలా ఉంటుంది? ఇప్పుడీ అరుదైన కలయికకు రంగం సిద్ధమైంది. ఎన్టీఆర్‌ కథానాయకుడిగా అనిల్‌ రావిపూడి దర్శకత్వంలో కొత్త సినిమా ప్రకటన వెలువడింది. ఈ విషయాన్ని తెలియజేస్తూ ఎన్టీఆర్‌ తన ఎక్స్‌ఖాతాలో అనిల్‌ రావిపూడితో దిగిన ఫొటోలను పంచుకున్నారు.

‘నవ్వుల విందుకు సిద్ధమవుతోంది’ అంటూ ఫొటోకు క్యాప్షన్‌ను జోడించారు. ఎన్టీఆర్‌ ఆర్ట్స్‌ పతాకంపై నందమూరి కల్యాణ్‌రామ్‌ ఈ చిత్రాన్ని నిర్మించనున్నారు. ‘మన కాంబినేషన్‌ ఎప్పటి నుంచో బాకీ ఉంది తారక్‌ సర్‌. పూర్తిస్థాయి కామెడీ సినిమా రాబోతున్నది. త్వరలో రోలింగ్‌..’ అంటూ అనిల్‌ రావిపూడి తన సోషల్‌మీడియా ద్వారా ఆనందం వ్యక్తం చేశారు. ప్రస్తుతం ఎన్టీఆర్‌ ‘డ్రాగన్‌’ చిత్రంలో నటిస్తున్నారు.

ప్రశాంత్‌నీల్‌ దర్శకత్వంలో రూపొందుతున్న ఈ చిత్రం జూన్‌ 11న విడుదలకానుంది. ఈ సినిమా తర్వాత ఎన్టీఆర్‌-త్రివిక్రమ్‌ కాంబోలో మైథలాజికల్‌ ‘గాడ్‌ ఆఫ్‌ వార్‌’ తెరకెక్కాల్సి ఉంది. అయితే ఈ సినిమా ప్రీపొడక్షన్‌ పనులకు ఎక్కువ సమయం పట్టే అవకాశం ఉండటంతో ఈలోగా అనిల్‌ రావిపూడితో సినిమాకు సిద్ధమయ్యారు ఎన్టీఆర్‌. ఏదిఏమైనా ఎన్టీఆర్‌-అనిల్‌ రావిపూడి సినిమా తాలూకు అనూహ్య ప్రకటన అందరిని సర్‌ప్రైజ్‌ చేసింది.