తుంగ‌తుర్తిలో న‌లుగురికి కుష్టు వ్యాధి నిర్ధార‌ణ‌

తుంగ‌తుర్తి, న‌వంబ‌ర్ 13 : కుష్టు వ్యాధి నిర్మూలనకు ప్రతి ఒక్కరు కృషి చేయాలని వైద్యాధికారి డాక్టర్ లింగమూర్తి తెలిపారు. శనివారం తుంగ‌తుర్తి మండల పరిధిలోని రావులపల్లి ప్రాథమిక ఆరోగ్య కేంద్రం ఆధ్వర్యంలో సిబ్బంది గుర్తించిన 44 మంది అనుమానితులకు వైద్య పరీక్షలు నిర్వహించి, తదుపరి నిర్ధారణ కోసం ప్రత్యేక వైద్య శిబిరాన్ని ఏర్పాటు చేయడం జరిగిందన్నారు. డాక్టర్ లింగమూర్తి ఆధ్వర్యంలో అనుమానితులకు పరీక్షలు నిర్వహించగా, నలుగురికి కుష్టు వ్యాధి ఉన్నట్లు నిర్ధారణ కావడం జరిగింది. కుష్టు వ్యాధిని ప్రారంభ దశలోనే గుర్తించి వైద్యుల సూచనల మేరకు పూర్తిస్థాయి చికిత్స తీసుకుంటే వ్యాధిని పూర్తిగా నయం చేయవచ్చని తెలిపారు. తద్వారా శారీరక వైకల్యాలను నివారించవచ్చని పేర్కొన్నారు. ప్రభుత్వ ఆరోగ్య కేంద్రాల్లో కుష్టు వ్యాధికి ఉచితంగా పరీక్షలు అలాగే చికిత్స అందుబాటులో ఉన్నాయని తెలిపారు. ఈ కార్యక్రమంలో డిప్యూటీ పారామెడికల్ ఆఫీసర్ సురేష్ కుమార్, ప్రాథమిక ఆరోగ్య కేంద్రం రావులపల్లి లెప్రసీ నోడల్ పర్సన్ గాజుల సోమన్న, ఆశా కార్యకర్తలు, ఇతర ఆరోగ్య సిబ్బంది పాల్గొన్నారు.