ఉత్కంఠగొలిపే మార్మిక ప్రయాణం

యువసామ్రాట్ నాగచైతన్య నటిస్తున్న మైథలాజికల్ మిస్టికల్ థ్రిల్లర్ ‘వృషకర్మ’. మీనాక్షి చౌదరి కథానాయిక. కార్తీక్ దండు దర్శకత్వంలో బీవీఎస్ఎన్ ప్రసాద్, సుకుమార్.బి నిర్మిస్తున్న ఈచిత్రం డిసెంబర్ 4న ప్రపంచవ్యాప్తంగా విడుదల కానున్నది. ప్రమోషన్లో భాగంగా ఈ నెల 25న ఈ సినిమా ట్రైలర్ను విడుదల చేయనున్నట్టు ఆదివారం ఓ ప్రకటన ద్వారా మేకర్స్ తెలియజేశారు. నెల్లూరులోని ఎస్వీ ఇంజనీరింగ్ కాలేజ్లో జరిగే గ్రాండ్ ఈవెంట్లో ట్రైలర్ను విడుదల చేస్తామని ప్రకటనలో వారు పేర్కొన్నారు. ఈ సందర్భంగా విడుదల చేసిన ట్రైలర్ అనౌన్స్మెంట్ పోస్టర్ సినిమాపై ఆసక్తిని రేకెత్తిస్తున్నది. ఎదురుగా కనిపిస్తున్న ప్రమాదాన్ని చేత్తో తాకబోతూ ఇంటెన్స్ లుక్తో నాగచైతన్య ఈ పోస్టర్లో కనిపిస్తున్నారు.
ఆయన పక్కనే భయంకరమైనే నిజాన్ని చూస్తున్న ఎక్స్ప్రెషన్తో జయరామ్, మీనాక్షి చౌదరి కనిపిస్తున్నారు. వారున్న ప్రదేశం ప్రమాదకరమైన చీకటి గుహను తలపిస్తున్నది. సినిమాపై మరింత ఆసక్తిని పెంచేలా ఈ పోస్టర్ని డిజైన్ చేశారు. పురాతన కాలాన్ని గుర్తుచేసే వృత్తాకార చిహ్నాలు, మిస్టీరియస్గా చుట్టూ రెడ్ స్మోక్ ఈ పోస్టర్కు ప్రత్యేక ఆకర్షణగా నిలిచాయి. ఎవరికీ తెలియని ఓ కొత్త ప్రపంచాన్ని ఈ సినిమా ఆవిష్కరించబోతున్నదని ఈ పోస్టర్ చెబుతున్నది. స్పర్శ్ శ్రీవాస్తవ విలన్గా నటిస్తున్న ఈ చిత్రంలో కియారా ఖన్నా, సత్య కీలక పాత్రధారులు. ఈ చిత్రానికి కెమెరా: రఘుల్ డి.హెరియన్, సంగీతం: అజనీష్ బి.లోకనాథ్, నిర్మాణం: శ్రీవెంకటేశ్వర సినీచిత్ర, సుకుమార్ రైటింగ్స్.
Comments (0)