సాస్‌ ఐటవర్‌పై రెరా కొత్త నాటకం!

20 November 2026 - 05:30
0 0
సాస్‌ ఐటవర్‌పై రెరా కొత్త నాటకం!
Rera
  • ఒకే ప్రాజెక్టును రెండుగా విభజించేందుకు భారీ కుట్ర
  • రెరా చట్టానికి అధికారులే గండి
  • టవర్‌-బీని కొత్త ప్రాజెక్టుగా చేయాలంటూ సాస్‌ ఇన్‌ఫ్రా దరఖాస్తు
  • కొనుగోలుదారుల అభ్యంతరాలపై రెరా బహిరంగ నోటీసు జారీ
  • వాస్తవ ప్లాన్‌లో టవర్‌-బీలో హిల్టన్‌ హోటల్‌ నిర్మాణానికి నిర్ణయం
  • దాని స్థానంలో వాణిజ్య భవన నిర్మాణంతో కొత్త ప్రాజెక్టుగా చిత్రీకరణ
  • ఏ, సీ టవర్లలోని కొనుగోలుదార్లకు పలు రకాలుగా తీవ్ర నష్టం
  • కొనుగోలుదారులకు భారీగా తగ్గనున్న పార్కింగ్‌, యూడీఎస్‌ విస్తీర్ణం
  • గతంలో సవరణ నిర్మాణ అనుమతులకు కొనుగోలుదారుల అనుమతి ఏది?

సిటీబ్యూరో ప్రధాన ప్రతినిధి, నవంబర్‌ 19 (నమస్తే తెలంగాణ): రెండు రోజులుగా హైదరాబాద్‌ మహా నగర పరిధిలోని అనేక నిర్మాణ కంపెనీలు నిబంధనల్ని ఉల్లంఘిస్తున్నాయంటూ తెలంగాణ రెరా (రియల్‌ ఎస్టేట్‌ రెగ్యులేషన్‌, డెవలప్‌మెంట్‌ అథారిటీ) కొరడా ఝుళిపిస్తున్నది. దాదాపు 13 కంపెనీలకు నోటీసులు జారీ చేసి జరిమానాలు విధించింది. మరి.. ఇదే దూకుడు అన్ని నిర్మాణ కంపెనీలపైనా ఉండాలి కదా! కానీ ఖాజాగూడలోని సాస్‌ ఇన్‌ఫ్రా చేపట్టిన సాస్‌ ఐటవర్‌పై మాత్రం రెరా అధికారులు వల్లమాలిన అభిమానాన్ని చాటుకుంటున్నారు. సర్కారు పెద్దల తెర వెనుక ఆదేశాలతో ఆ కంపెనీ అక్రమాలకు దన్నుగా నిలుస్తూ పునీతం అవుతున్నారు. అవును ఇది నిజం.. సాస్‌ ఐటవర్‌ ప్రాజెక్టుపై తాజాగా రెరా అధికారులు జారీ చేసిన బహిరంగ నోటీసును చూస్తే ఇవన్నీ అక్షర సత్యాలు అనే నిర్ధారణ వస్తుంది. పురపాలక శాఖ, రెరా నిబంధనల్ని తుంగలో తొక్కి సాస్‌ ఇన్‌ఫ్రా ఆడిందే ఆటగా..

పాడిందే పాటగా వ్యవహరిస్తున్న క్రమంలో రెరా అధికారులు మరో సరికొత్త నాటకానికి తెర లేపారనే విమర్శలు వినిపిస్తున్నాయి. వాస్తవానికి ఏ-బీ-సీ బ్లాకులతో ఒకే ప్రాజెక్టుగా మొదలైన సాస్‌ ఐటవర్‌లో బీ బ్లాకును ప్రత్యేక ప్రాజెక్టుగా చిత్రీకరించేందుకు కుట్ర మొదలైంది. ఈ మేరకు సదరు కంపెనీ దరఖాస్తు చేసుకుందే తడవుగా రెరా అధికారులు గురువారం బహిరంగ నోటీసు జారీ చేశారు. కొనుగోలుదారులకు దీనిపై అభ్యంతరాలుంటే వ్యక్తం చేయాలంటూ అందులో సూచించారు. కానీ కొనుగోలుదారుల అభ్యంతరాలను స్వీకరించే ముందు అసలు సాస్‌ ఐటవర్‌ ప్రస్థానాన్ని సమగ్రంగా పరిశీలించాల్సిన రెరా అధికారులు వాటిని గాలికొదిలి దాదాపు 1400 మంది కొనుగోలుదారులకు (ఇన్వెస్టర్లు) తీవ్ర నష్టాన్ని కలిగించే కుట్రను అమలు చేసేందుకు సిద్ధం కావడంపై తీవ్రస్థాయిలో ఆరోపణలు వినిపిస్తున్నాయి. రంగారెడ్డి జిల్లా శేరిలింగంపల్లి మండలం ఖాజాగూడ గ్రామ పరిధిలోని సర్వేనంబరు 19లో బెంగళూరుకు చెందిన సాస్‌ ఇన్‌ఫ్రా నిర్మాణ కంపెనీ సాస్‌ ఐటవర్‌ ప్రాజెక్టును చేపట్టిన విషయం తెలిసిందే. సర్కారు పెద్దలతో కలిసి సుమారు రూ.680 కోట్ల విలువైన 3.17 ఎకరాల ప్రభుత్వ భూమిని కైంకర్యం చేయడం ఇటీవల వెలుగులోకి రావడంతో సాస్‌ ఇన్‌ఫ్రా పేరు మరింత ప్రాచుర్యంలోకి వచ్చింది.

ఈ నేపథ్యంలో తాజాగా ఆ నిర్మాణ కంపెనీ అన్నిరకాల నిబంధనలను పరిహసిస్తూ రెరాతో కలిసి కొత్త నాటకానికి శ్రీకారం చుట్టింది. వాస్తవానికి 2019లో సాస్‌ ఐటవర్‌కు జీహెచ్‌ఎంసీ జీ+36 అంతస్తులతో అనుమతి ఇచ్చింది. సాస్‌ ఇన్‌ఫ్రా ఇందులోనే టవర్‌-ఏను వాణిజ్య భవనంగా, టవర్‌-బీ కింద హిల్టన్‌ హోటల్‌గా, టవర్‌-సీను మరో వాణిజ్య భవనంగా నిర్మించేలా ప్లాన్‌, అనుమతులు తీసుకుంది. ముందస్తు ఒప్పందం ప్రకారం 2021లోనే ప్రాజెక్టు పూర్తయి కొనుగోలుదారులకు అప్పగించాల్సి ఉండగా.. నేటికి ఒక్క చదరపు అడుగు కూడా ఎవరికీ అప్పగించలేదు. కొరడా ఝుళిపించాల్సిన రెరా గతంలోనే రెండు కేసులు నమోదైనప్పటికి వాటి జోలికి పోకుండా గడువును పొడగిస్తూ సాస్‌ సేవలో తరించిపోతుంది. ఈ క్రమంలో 2026లో సాస్‌ ఇన్‌ఫ్రా నిబంధనల్ని తుంగలో తొక్కి, మున్సిపల్‌ అధికారుల అండతో సవరణ నిర్మాణ అనుమతులు తీసుకోవడంపై గతంలోనే ‘నమస్తే తెలంగాణ’ పలు కథనాలు ప్రచురించింది. వాస్తవానికి ఈ సవరణ నిర్మాణ అనుమతులు తీసుకునే సమయంలోనే అప్పటికే అందులో కోట్ల రూపాయలు వెచ్చించి ఇన్వెస్టర్లుగా మారిన సుమారు 1400 మంది కొనుగోలుదారుల అనుమతి తీసుకోవాలి.

పాత ప్లాన్‌లో ఏమైనా మార్పులు చేయాలనుకుంటే రెరా చట్టంలోని సెక్షన్‌ 14(2)(ii) నిబంధనల్లో స్పష్టంగా ‘కొనుగోలుదారుల్లో మూడింట రెండొంతుల మెజార్టీతో అంగీకారం ఉండాలి’ అని ఉంది. కానీ అటు సవరణ నిర్మాణ అనుమతులు ఇచ్చిన సైబరాబాద్‌ మున్సిపల్‌ కార్పొరేషన్‌ గానీ ఇటు చట్టాన్ని అమలు చేయాల్సిన రెరా అధికారులు గానీ కనీసంగా కొనుగోలుదారుల అనుమతులు తీసుకోలేదు. సాస్‌ కంపెనీ ఇప్పుడు టవర్‌-బీను ప్రత్యేక ప్రాజెక్టుగా గుర్తించాలంటూ రెరాకు దరఖాస్తు చేసుకుంటే ఆ సంస్థ అధికారులు కిమ్మనకుండా గురువారం ఒక పత్రికలో బహిరంగ నోటీసు జారీ చేశారు. ఏడు రోజుల్లో అభ్యంతరాలుంటే తెలపాలంటూ కొనుగోలుదారులకు సూచించారు.

కుట్రపూరితంగా కొనుగోలుదారులకు నష్టం…

సాస్‌ ఐటవర్‌ మొదటి ప్లాన్‌ ప్రకారం టవర్‌-ఏ, సీ వాణిజ్య భవనాలు కాగా, బీ టవర్‌ హోటల్‌. టవర్‌-ఏను జీ+36 అంతస్తులతో అనుమతి ఇచ్చారు. కానీ సదరు కంపెనీ కుట్రపూరితంగా సవరణ నిర్మాణ అనుమతుల కింద మరో అంతస్తును పెంచింది. దీంతో పాటు ఒక అంతస్తులో మెసనైజ్డ్‌ (డూప్లెక్స్‌) తరహా అనుమతి తీసుకుంది. అంటే ఒకే దానిలో రెండు అంతస్తులు ఉంటాయి. తద్వారా టవర్‌-ఏ జీ+38గా మారింది. తద్వారా అందుబాటులోకి వచ్చిన ఎక్కువ నిర్మాణ విస్తీర్ణాన్ని కంపెనీ అమ్ముకుంది. దీంతో కొనుగోలుదారులకు వాస్తవంగా రావాల్సిన యూఎస్‌డీ (అవిభాజ్య భూ వాటా) తగ్గిపోయింది. ప్రతి వెయ్యి చదరపు అడుగులకు 10 చదరపు గజాల యూఎస్‌డీ రావాల్సి ఉండగా.. దానిని ప్రతి వెయ్యి చదరపు అడుగులకు ఏడు చదరపు గజాల చొప్పున కుదించారంటూ ఒక వినియోగదారుడు గతంలో హైకోర్టును ఆశ్రయించారు. ఆ సందర్భంగా సాస్‌ ఇన్‌ఫ్రా హైకోర్టుకు సమర్పించిన అఫిడవిట్‌లో తాము ప్రతి వెయ్యి చదరపు అడుగులకు ఏడు చదరపు గజాల యూఎస్‌డీ మాత్రమే ఇస్తామని, మున్ముందు ప్లాన్‌లో ఎలాంటి మార్పులు చేయమని స్పష్టంగా హామీ ఇచ్చింది. కానీ అందుకు భిన్నంగా 2026లో సవరణ నిర్మాణ అనుమతులు తీసుకొని ప్లాన్‌లో మార్పులు తీసుకువచ్చింది.

అయితే రెరా చట్టం ప్రకారం కొనుగోలుదారుల అనుమతి లేకుండా సవరణ నిర్మాణ అనుమతులు తీసుకోవడంపై రెరా అధికారులు ఇప్పటికీ నోరు విప్పకపోవడం ‘దాల్‌మే కుచ్‌ కాలాహై!’ అనేందుకు బలమైన ఆధారం. సవరణ నిర్మాణ అనుమతులతో కొనుగోలుదారులకు ఢోకా ఇచ్చిన సాస్‌ ఇన్‌ఫ్రా ఇప్పుడు మరో అడుగు ముందుకేసింది. ఏకంగా టవర్‌-బీని కొత్త ప్రాజెక్టుగా చూపేందుకు పావులు కదుపుతుండగా.. అందుకు రెరా అధికారులు గుడ్డిగా మద్దతునిచ్చి అండగా నిలుస్తున్నారు. సాధారణంగా నివాస టవర్‌ నిర్మాణంలో కామన్‌ ఏరియాను సుమారు 20-25 శాతంగా, వాణిజ్య టవర్‌కు 25-30 శాతం, హోటల్‌లాంటి టవర్లకు ఏకంగా 45 శాతంగా పరిగణిస్తారు.

తొలుత ప్లాన్‌లో టవర్‌-బీ హోటల్‌ అని చూపడంతో ఆ ప్రాజెక్టులో 11వేల చదరపు అడుగులు కొనుగోలు చేసిన ఇన్వెస్టర్‌కు 7,040 చదరపు అడుగుల కార్పెట్‌ ఏరియా వచ్చింది. కానీ ఇప్పుడు దానిని వాణిజ్య భవనంగా మార్చి, ప్రత్యేక ప్రాజెక్టుగా చూపేందుకు కుట్ర జరుగుతుంది. ఒకవేళ ముందుగానే టవర్‌-బీని హోటల్‌ కాకుండా వాణిజ్య భవనంగా చూపితే కామన్‌ ఏరియా తగ్గి..అదే 11వేల చదరపు అడుగులు కొనుగోలు చేసిన ఇన్వెస్టర్‌కు కార్పెట్‌ ఏరియా 8500-9వేల చదరపు అడుగులకు పెరిగేది. దీంతోపాటు టవర్‌ -ఏ,సీల్లోని కొనుగోలుదారుల పార్కింగ్‌ విస్తీర్ణానికి భారీగా గండిపడనుందని ఇన్వెస్టర్లు ఆవేదన చెందుతున్నారు.

రెరా చట్టానికి సంస్థ అధికారులే గండి…

రెరా చట్టం ప్రకారం ఒకే ప్రాజెక్టు.. ఒకే సర్వేనంబరులోని భూమి.. పైగా ఒకే అనుమతి.. అలాంటిది సుమారు ఏడేండ్ల తర్వాత అందులోని ఒక టవర్‌ నిర్మాణాన్ని ప్రత్యేక ప్రాజెక్టుగా చూపేందుకు రెరా అధికారులు సాస్‌ ఇన్‌ఫ్రాతో కలిసి ముందుకు పోతున్నారంటే కొనుగోలుదారుల యూఎస్‌డీతో పాటు కామన్‌ ఏరియా, పార్కింగ్‌ ఏరియాలపై తీవ్ర ప్రభావాన్ని చూపుతుందనే వాస్తవాన్ని ఎందుకు విస్మరిస్తున్నారో అనేది అనుమానాలకు తావిస్తున్నది.

పైగా హోటల్‌ కట్టాల్సిన చోట కొత్తగా లక్షల చదరపు అడుగుల్లో వాణిజ్య నిర్మాణాన్ని చేపట్టి దానిని విక్రయించడం ద్వారా కోట్లాది రూపాయల్ని ఆర్జించాలనే డెవలపర్‌ స్వార్ధానికి కొనుగోలుదారులు నష్టపోతున్నా రెరా పట్టించుకోకపోవడంపై ఆగ్రహం వ్యక్తమవుతుంది. కాగా టవర్‌-ఏ,బీలకు ఒకే ఫౌండేషన్‌ (రాఫ్ట్‌) ఉందని పలువురు కొనుగోలుదారులు చెబుతున్నారు. ఇవన్నీ ఒక ఎత్తయితే… అసలు టవర్‌-ఏ నిర్మాణం పూర్తయిందని, దానికి హెచ్‌ఎండీఏ నుంచి ఆక్యుపెన్సీ సర్టిఫికెట్‌ వచ్చిందని సాస్‌ యాజమాన్యం గతంలో ‘నమస్తే తెలంగాణ’కు ఇచ్చిన ప్రకటనలో ఉంది. నిజానికి ఈ కోణంలో రెరా అధికారులు విచారణ జరిపి, తామే గతంలో సుమోటాగా నమోదు చేసిన కేసును పరిశీలించాల్సిందిబోయి డెవలపర్‌ తెచ్చే సరికొత్త ప్రతిపాదనలపై మాత్రమే హడావిడి చేయడం గమనార్హం. దీంతో అసలు రెరా సామాన్య కొనుగోలుదారుల రక్షణ కోసం ఉందా? డెవలపర్స్‌ ఆర్జనకు మార్గం సుగమం చేసేందుకు పని చేస్తుందా? అనే తీవ్ర ఆరోపణలు వినిపిస్తున్నాయి

Comments (0)

User