అనుమతులిచ్చి అడ్డుకున్నారు!

• 115 మంది విదేశీ ప్రతినిధులకు నోఎంట్రీ భారత్‌ సమ్మిట్‌ చుట్టూ ముసిరిన వివాదాలు

హైదరాబాద్‌ : తెలంగాణలోని హైదరాబాద్‌లో జరుగుతున్న భారత్‌ సమ్మిట్‌ చుట్టూ వీసాల వివాదం ముసురుకుంది. విదేశాంగ శాఖ(ఎంఈఏ) నుంచి ముందస్తు అనుమతులు పొందినప్పటికీ 315 మంది విదేశీ వక్తల్లో 115 మందికి భారత్‌లోకి ప్రవేశాన్ని నిరాకరించారని కాంగ్రెస్‌ ఎంపీ శశిథరూర్‌ ఆరోపించారు. మరికొందరి వీసాలను రద్దు చేసినట్లు తెలిపారు. కేంద్ర హోంశాఖ ఆదేశాల మేరకే ఈ పరిణామాలు జరిగినట్లు తెలుస్తున్నది. ఈ వివాదంలో నార్వేకు చెందిన 29 ఏండ్ల జర్నలిస్ట్‌ హెల్లె లింగ్‌ స్వెండర్స్‌ వ్యవహారం చర్చనీయాంశమైంది.

నార్వే వార్తా పత్రిక ‘డాగ్సావిజన్‌’లో పనిచేస్తున్న ఆమెకు భారత్‌లో పర్యటించేందుకు వీసాతో పాటు రాజకీయ అనుమతులు కూడా లభించాయి. ఆమె భారత్‌ సమ్మిట్‌లో జర్నలిజం భవిష్యత్తుపై జరిగే చర్చలో పాల్గొనాల్సి ఉంది. అయితే ఓస్లోలోని భారత రాయబార కార్యాలయం ఆమె విమానాశ్రయానికి బయలుదేరడానికి కేవలం 10 నిమిషాల ముందు ప్రయాణం చేయవద్దని సమాచారం ఇచ్చింది. అనంతరం ఆమె వీసా రద్దు చేసినట్లు వెల్లడైంది.