Watch: దంపతులు టీవీ చూస్తుండగా ఇంట్లోకి ప్రవేశించిన చిరుత.. తర్వాత ఏం జరిగిందంటే?

బెంగళూరు: భార్యాభర్తలు తమ ఇంట్లో టీవీ చూస్తున్నారు. రాత్రి వేళ ఆ ఇంట్లోకి చిరుత పులి ప్రవేశించింది. దానిని చూసి ఆ దంపతులు భయాందోళన చెందారు. ఆ గది నుంచి బయటకు పరుగెత్తారు. ఆ రూమ్‌కు గడియపెట్టి చిరుతను లోపల బంధించారు. అయితే భయాందోళనతో ఆ మహిళ స్పృహ తప్పింది. (Leopard enters Karnataka home) కర్ణాటకలోని తుమకూరు జిల్లాలో ఈ సంఘటన జరిగింది. బండిగౌడనపాళ్య గ్రామంలో చిరుత సంచరించింది. తొలుత రాత్రి వేళ చిక్కమరియప్ప ఇంటి బయట కట్టేసిన మేక పిల్లను అది ఎత్తుకెళ్లింది. ఆ తర్వాత ఆ చిరుత నేరుగా వారి ఇంట్లోకి ప్రవేశించింది.

కాగా, ఆ సమయంలో చిక్కమరియప్ప, ఆయన భార్య నరసమ్మ ఇంట్లో టీవీ చూస్తున్నారు. అకస్మాత్తుగా చిరుత వారి ఇంట్లోకి రావడంతో తీవ్ర భయాందోళన చెందారు. పరుగున ఆ గది నుంచి వారు బయటపడ్డారు. ఆ చిరుతను ఇంట్లో బంధించారు. అయితే ఇంట్లో చిరుతపులిని చూసిన భయంతో నరసమ్మ స్పృహ తప్పి పడిపోయింది.

మరోవైపు ఈ విషయం తెలుసుకున్న గ్రామస్తులు కూడా భయాందోళన చెందారు. పోలీసులు, అటవీ శాఖకు సమాచారం అందించారు. దీంతో చిక్కమరియప్ప ఇంటికి వారు చేరుకున్నారు. ఆ ఇంట్లో బంధీగా ఉన్న చిరుతను పట్టుకునేందుకు ఆరు గంటల పాటు శ్రమించారు. అటవీ శాఖ సిబ్బంది చివరకు దానిని సురక్షితంగా పట్టుకుని బోనులో బంధించి తమ వెంట తీసుకెళ్లారు. అయితే ఆ ఇంట్లోకి చిరుత ప్రవేశించిన వీడియో క్లిప్‌ సోషల్‌ మీడియాలో వైరల్‌ అయ్యింది.

#Karnataka A leopard accidentally enters a house in #Kunigal escapes back to forest #watch @NewIndianXpress @XpressBengaluru @KannadaPrabha @NammaBengaluroo @aranya_kfd https://t.co/g3MXEzEP05

— Amit Upadhye (@AmitSUpadhye) November 11, 2026