Vijay and Sangeetha | అనిరుధ్, కావ్య గ్రాండ్ రిసెప్షన్.. వేర్వేరుగా వచ్చి జంటను ఆశీర్వదించిన సీఎం విజయ్, సంగీత!

సంగీత దర్శకుడు అనిరుధ్ రవిచందర్, సన్రైజర్స్ హైదరాబాద్ సీఈఓ కావ్య మారన్ల వివాహ రిసెప్షన్ వేడుక శనివారం చెన్నైలోని ఐటీసీ గ్రాండ్ చోళా హోటల్లో అత్యంత వైభవంగా జరిగింది. సినీ, రాజకీయ, క్రీడా రంగాలకు చెందిన ప్రముఖులు హాజరైన ఈ వేడుకలో తమిళనాడు ముఖ్యమంత్రి, అగ్ర నటుడు విజయ్ మరియు ఆయన భార్య సంగీత ప్రత్యేక ఆకర్షణగా నిలిచారు. అయితే, ఇటీవల విడాకుల పిటిషన్ ఉపసంహరణ వార్తల నేపథ్యంలో వీరిద్దరూ ఒకే వేడుకకు హాజరైనప్పటికీ, విడివిడిగా రావడం అందరి దృష్టిని ఆకర్షించింది.
ముందుగా సంప్రదాయ దుస్తుల్లో వేడుకకు ఒంటరిగా విచ్చేసిన ముఖ్యమంత్రి విజయ్, నూతన వధూవరులు అనిరుధ్, కావ్య మారన్లకు పుష్పగుచ్ఛం అందించి శుభాకాంక్షలు తెలిపారు. వేదికపై సూపర్ స్టార్ రజనీకాంత్, మాజీ ముఖ్యమంత్రి ఎంకే స్టాలిన్, సన్ గ్రూప్ అధినేత కళానిధి మారన్లతో విజయ్ ఆప్యాయంగా ముచ్చటిస్తూ ఫొటోలకు ఫోజులిచ్చారు.
ఇక విజయ్ వచ్చి వెళ్లిన కొద్దిసేపటికి ఆయన భార్య సంగీత వేడుకకు విచ్చేశారు. పసుపు రంగు చుడీదార్లో ఎంతో ఉత్సాహంగా కనిపించిన సంగీత, వేడుకలో బంధుమిత్రులను పలకరించడంతో పాటు నూతన దంపతులు అనిరుధ్, కావ్య మారన్లతో కలిసి చిరునవ్వులతో ఫొటోలు దిగారు. కొద్ది నెలల క్రితం తన కుమారుడు జేసన్ సంజయ్ దర్శకుడిగా పరిచయమైన సమయంలో కనిపించిన తర్వాత, సంగీత మళ్లీ ఇప్పుడే బహిరంగ వేడుకలో కనిపించడం గమనార్హం.
ఈ ఏడాది ఫిబ్రవరిలో విజయ్ నుంచి విడాకులు కోరుతూ సంగీత చెంగల్పట్టు కోర్టులో పిటిషన్ దాఖలు చేయడం అప్పట్లో సంచలనం సృష్టించింది. ఇటీవలే ఆ విడాకుల పిటిషన్ను ఉపసంహరించుకున్నట్లు వార్తలు వచ్చిన నేపథ్యంలో, వీరిద్దరూ కలిసి వస్తారని అభిమానులు భావించారు. కానీ ఇద్దరూ వేర్వేరు సమయాల్లో వేడుకకు హాజరయ్యారు.
Comments (0)