UP Assembly Polls: 2027 యూపీ అసెంబ్లీ ఎన్నిక‌ల్లో.. క‌లిసి పోటీ చేయ‌నున్న ఓవైసీ-ఆజాద్

న్యూఢిల్లీ: వ‌చ్చే ఏడాది ఉత్త‌ర‌ప్ర‌దేశ్‌లో అసెంబ్లీ(UP Assembly Polls) ఎన్నిక‌లు జ‌ర‌గ‌నున్న విష‌యం తెలిసిందే. ఈ నేప‌థ్యంలో హైద‌రాబాద్ ఎంపీ, ఐఎంఐ నేత అస‌దుద్దీన్ ఓవైసీ ఇవాళ కీల‌క ప్ర‌ట‌న చేశారు. అసెంబ్లీ ఎన్నిక‌ల్లో నగినా ఎంపీ చంద్ర‌శేఖ‌ర్ ఆజాద్‌కు చెందిన ఆజాద్ స‌మాజ్ పార్టీతో క‌లిసి పోటీ చేయ‌నున్న‌ట్లు అస‌దుద్దీన్ వెల్ల‌డించారు. ల‌క్నోలో జ‌రిగిన సంయుక్త మీడియా స‌మావేశంలో ఇద్ద‌రూ ప్ర‌క‌ట‌న చేశారు. అయితే ఇండియా కూట‌మిలో చేరేందుకు ఎంపీ అస‌దుద్దీన్ నిరాక‌రించారు. సీట్ల పంప‌కం అంశంలో ఇండియా బ్లాక్‌తో ఆయ‌న విబేధించారు. స‌మాజ్‌వాదీ పార్టీ కానీ, కాంగ్రెస్ పార్టీ కానీ ఎంఐఎంతో జ‌త‌క‌ట్టేందుకు సుముఖ‌త వ్య‌క్తం చేయ‌లేదు. దీంతో ఆజాద్ స‌మాజ్ పార్టీతో ఓవైసీ చేతులు క‌లిపారు.

యూపీలో ఓవైసీ పార్టీకి మైనార్టీల్లో కొంత ఫాలోయింగ్ ఉన్న‌ది. ఇక ద‌ళిత ఓట‌ర్ల‌ను ఆజాద్ పార్టీ ఆక‌ర్షిస్తున్న‌ది. యూపీలో యోగి నేతృత్వంలోని బీజేపీ స‌ర్కారు మూడోసారి రాజ్యాధికారంపై క‌న్నేయ‌గా, మూడో కూట‌మి రూపంలో ఓవైసీ-ఆజాద్ పార్టీ పోటీలో నిల‌వ‌డం గ‌మ‌నార్హం. చంద్ర‌శేఖ‌ర్ ఆజాద్ యూపీ సీఎం అభ్య‌ర్థిగా పోటీ చేయ‌నున్న‌ట్లు చెప్పారు. 12వ త‌ర‌గ‌తి వ‌ర‌కు ఉచిత విద్య‌, ఉత్త‌మ వైద్య స‌దుపాయం, యువ‌త‌కు ఉద్యోగాలు క‌ల్పించ‌నున్న‌ట్లు ఆజాద్ తెలిపారు.