Surprise Inspections | కొత్తగూడెంలో తూనికలు, కొలతల శాఖ ఆకస్మిక తనిఖీలు

చుంచుపల్లి : వినియోగదారులకు నిర్ణీత పరిమాణం కంటే తక్కువ తూకంతో ( Defraud consumers ) సరుకులు విక్రయిస్తూ మోసాలకు పాల్పడితే చట్టప్రకారం కఠిన చర్యలు తీసుకుంటామని భద్రాద్రి కొత్తగూడెం జిల్లా తూనికలు, కొలతల శాఖ ( Legal Metrology) అధికారి కూచన మనోహర్ హెచ్చరించారు. సివిల్ సప్లై కమిషనర్ స్టీఫెన్ రవీంద్ర ఆదేశాల మేరకు శుక్రవారం కొత్తగూడెం పట్టణంలోని బాబుక్యాంప్, పెద్దబజార్ ప్రాంతాల్లో అధికారులు విస్తృతంగా ఆకస్మిక తనిఖీలు ( Surprise Inspections ) నిర్వహించారు.

​పట్టణంలోని పలు బియ్యం దుకాణాలు, కిరాణా, జనరల్ స్టోర్లలో తనిఖీలు చేపట్టారు. ప్యాక్ చేసిన బియ్యం బస్తాలను పరిశీలించి, బయట 26 కిలోల బరువుగా ముద్రించిన బస్తాలను ఎలక్ట్రానిక్ కాంటాపై తూకం వేయగా, వాటిలో కేవలం 25 కిలోల బియ్యం మాత్రమే ఉన్నట్లు గుర్తించారు. ఒక్కో బస్తాపై కిలో చొప్పున కోత పెడుతూ ప్యాకేజ్డ్ కమోడిటీస్ నిబంధనలను ఉల్లంఘించినట్లు నిర్ధారించిన అధికారులు, సంబంధిత ఆరు వ్యాపార సంస్థలపై కేసులు నమోదు చేశారు.

​అనంతరం అధికారి కూచన మనోహర్ మాట్లాడుతూ.. వ్యాపారులు విక్రయించే ప్రతి ప్యాకింగ్ సరుకుపై నికర బరువును స్పష్టంగా ముద్రించాలని, బ్యాగుపై ఎంత బరువు పేర్కొంటే కచ్చితంగా అంతే పరిమాణంలో సరుకు ఉండాలని ఆదేశించారు. తూకాల్లో తేడాలు వచ్చినా, ముద్రణ నిబంధనలు పాటించకపోయినా ఉపేక్షించేది లేదని స్పష్టం చేశారు. వినియోగదారులు సైతం నిత్యావసరాలు, ప్యాక్ చేసిన సరుకులు కొనుగోలు చేసే సమయంలో ప్యాకెట్ పై ముద్రించిన వివరాలను, నికర బరువును సరిచూసుకోవాలని సూచించారు.