Srinivas Goud | ఇచ్చిన హామీల గురించి నిలదీస్తే ఉద్యోగులను సస్పెండ్‌ చేస్తారా ? దమ్ముంటే చేయండి : మాజీ మంత్రి శ్రీనివాస్‌ గౌడ్‌ 

17 November 2026 - 17:30
0 0
Srinivas Goud | ఇచ్చిన హామీల గురించి నిలదీస్తే ఉద్యోగులను సస్పెండ్‌ చేస్తారా ? దమ్ముంటే చేయండి : మాజీ మంత్రి శ్రీనివాస్‌ గౌడ్‌ 
S Goud

హైదరాబాద్‌ : ప్రజలకు, రైతాంగానికి, ఉద్యోగులకు ( Employees  ) ఇచ్చిన హామీల గురించి ఆందోళన చేస్తుంటే వారిపై దౌర్జన్యాలకు పాల్పడుతుందని మాజీ మంత్రి శ్రీనివాస్‌ గౌడ్‌ ( Srinivas Goud) ఆరోపించారు. సీపీఎస్‌ గురించి ఉద్యోగులు సెలవులు పెట్టి ధర్నాలు చేస్తుంటే వారిని సస్పెండ్‌ ( Suspended ) చేస్తామని ముఖ్యమంత్రి హెచ్చరించడాన్ని ఆయన తీవ్రంగా ఖండించారు.

మంగళవారం తెలంగాణ భవన్‌లో ఏర్పాటు చేసిన మీడియా సమావేశంలో మాట్లాడారు. ఉద్యోగులను సస్పెండ్‌ చేసే దమ్ము ప్రభుత్వానికి ఉందా ? అంటూ హెచ్చరించారు. అశోక్ నగర్ లైబ్రరీకి వెళ్లి నిరుద్యోగులతో కలిసి రాహుల్ ఎందుకు చాయ్ తాగలేదని పేర్కొన్నారు. రెండు లక్షల ఉద్యోగాలు ఇస్తామని చెప్పారు. ఇవ్వకపోతే ముఖ్యమంత్రులైనా సరే మారుస్తాం కాని ఉద్యోగాలు ఇచ్చి తీరుతామని హామీ ఇచ్చిన రాహుల్‌ గాంధీ హైదరాబాద్‌లో పర్యటించిన సందర్భంగా తెలంగాణ ప్రజలకు ఇచ్చిన హామీలు గుర్తులేవా? అంటూ ప్రశ్నించారు.

కాంగ్రెస్ పార్టీ లాగా ప్రజలను ఇంతగా మోసం చేసిన పార్టీ దేశంలోనే కాదు, ప్రపంచంలోనే మరొకటి లేదేమోనని అనుమానం వ్యక్తం చేశారు. తెలంగాణ ప్రజలు కాంగ్రెస్ మేనిఫెస్టోను చింపి చెత్తబుట్టలో వేయాలని కోరుకుంటున్నారు. ఆ పార్టీని ప్రజలు చీత్కరిస్తున్నారని వెల్లడించారు. ఎన్నికలకు ముందు కర్ణాటక సీఎం సిద్దరామయ్యతో బీసీ డిక్లరేషన్‌ విడుదల చేయించారని, కాని బీసీలకు కాంగ్రెస్‌ ప్రభుత్వం అధికారంలోకి వచ్చిన తరువాత ఏం చేయలేదని విమర్శించారు. ఉన్న రిజర్వేషన్లు కోర్టు కొట్టివేసిందని పేర్కొన్నారు. బీసీలకు బడ్జెట్‌లో రూ.20 వేల కోట్లు కేటాయిస్తామని చెప్పి మొండిచేయి చూపించిందని విమర్శించారు.

Comments (0)

User