Vera Dijkmans | అమెరికా అధికారుల అదుపులో ప్ర‌పంచ మోస్ట్ వాంటెడ్ గ‌ర్ల్‌ఫ్రెండ్ వెరా డిజ్క్‌మాన్స్..!

17 November 2026 - 17:30
0 0
Vera Dijkmans | అమెరికా అధికారుల అదుపులో ప్ర‌పంచ మోస్ట్ వాంటెడ్ గ‌ర్ల్‌ఫ్రెండ్ వెరా డిజ్క్‌మాన్స్..!
Vera Dijkman

Vera Dijkmans : త‌న‌ను తాను ‘ప్ర‌పంచ మోస్ట్‌వాంటెడ్‌ గర్ల్‌ఫ్రెండ్ (Worlds most wanted girlfriend)’ గా చెప్పుకున్న డచ్‌ మోడల్‌ వెరా డిజ్క్‌మాన్స్‌ (Vera Dijkmans) ను అమెరికాకు చెందిన ‘ఇమ్మిగ్రేష‌న్ అండ్ క‌స్ట‌మ్స్ ఎన్‌ఫోర్స్‌మెంట్ (ICE)’ అధికారులు అదుపులోకి తీసుకున్నారు. మాడిసన్‌ స్క్వేర్‌ గార్డెన్‌లో ఓ కార్యక్రమానికి హాజరుకావడానికి వెళ్తుండగా విమానంలోనే పోలీసులు అరెస్ట్ చేశారు. వెరా డిజ్క్‌మాన్స్ ఈ ఘ‌ట‌న‌కు సంబంధించి వీడియోను విడుదల చేశారు. అదుపులోకి తీసుకున్న అనంత‌రం డెలానీ హాల్ నిర్బంధ కేంద్రం (Delaney Hall Detention Facility) లో తనను బంధించినట్లు ఆమె తెలిపారు.

ఐసీఈ అధికారులు తనను అపరిశుభ్రమైన ప్రదేశంలో ఉంచారని, నాసిరకమైన ఆహారం పెడుతున్నారని వెరా ఫిర్యాదు చేశారు. ఈ ఘ‌ట‌న‌పై వెరా కుటుంబసభ్యులు స్పందిస్తూ.. ఆమెను ఎందుకు నిర్బంధించారనే విషయాన్ని కూడా అధికారులు వెల్లడించలేదని చెప్పారు. ప్రస్తుతం ఆమె టూరిస్ట్ వీసాపై అమెరికాలో ఉంద‌ని తెలిపారు. అయితే డిజ్క్‌మాన్స్‌ ఇటీవల తన గ్రీన్ కార్డ్ దరఖాస్తు కోసం ఇమిగ్రేషన్ అధికారులు ఇచ్చిన అపాయింట్‌మెంట్‌కు హాజరుకాలేదని ఆమె తల్లి తెలిపారు. అందువల్లే ఆమెను అధికారులు బంధించి ఉంటారని అనుమానం వ్యక్తంచేశారు.

అమెరికాలోని డచ్‌ రాయబార కార్యాలయాన్ని సంప్రదించినప్పటికీ తమకు సాయం అందలేదని వెరా త‌ల్లి చెప్పారు. దీనిపై డచ్ రాయబార కార్యాలయ ప్రతినిధి మాట్లాడుతూ.. ఈ ఘ‌ట‌న‌పై నెదర్లాండ్స్ ప్రభుత్వానికి అవగాహన ఉందని, ఆమెకు తగిన సాయాన్ని అందించడానికి ప్రయత్నిస్తున్నామ‌ని చెప్పారు. గోప్యతా కారణాల దృష్ట్యా మరిన్ని వివరాలు వెల్లడించలేకపోతున్నామ‌ని తెలిపారు. అయితే టూరిస్ట్‌ వీసాపై అమెరికా వెళ్లినవారు అక్కడ డబ్బు సంపాదించే ఎలాంటి కార్యక్రమాల్లో పాల్గొనకూడదనే రూల్ ఉంది. ఈ రూల్‌ను అతిక్ర‌మించినందుకునే వెరాను అదుపులోకి తీసుకున్నారా..? అనే విషయం తెలియాల్సి ఉంది.

కాగా, వెరా డిజ్క్‌మాన్స్‌కు ఇన్‌స్టాలో 60 లక్షల మంది ఫాలోవర్లు ఉన్నారు. ఈ క్ర‌మంలో గత ఏడాది ఆమె ఓ కార్యక్రమంలో మాట్లాడుతూ తనకు 5,000 మంది నుంచి డేటింగ్ అప్లికేషన్‌లు వచ్చినట్లు చెప్పారు. తనను తాను ‘ప్ర‌పంచంలోనే మోస్ట్‌వాంటెడ్‌ గర్ల్‌ఫ్రెండ్‌’ గా ప్రకటించుకున్నారు. దాంతో ఆమె వార్తల్లో నిలిచారు.

Comments (0)

User