Shah Rukh Khan | ‘100 గ్రేటెస్ట్ మూవీ స్టార్స్’ జాబితాలో షారుఖ్ ఖాన్.. టాప్-3లో నిలిచిన దిగ్గజాలు వీరే!

ప్రముఖ అంతర్జాతీయ ఎంటర్టైన్మెంట్ మ్యాగజీన్ ‘వెరైటీ’ (Variety) విడుదల చేసిన ‘ది 100 గ్రేటెస్ట్ మూవీ స్టార్స్ ఆఫ్ ఆల్టైమ్’ (The 100 Greatest Movie Stars of All Time) ప్రతిష్ఠాత్మక జాబితాలో బాలీవుడ్ బాద్షా షారుఖ్ ఖాన్ చోటు సంపాదించుకున్నారు. ఈ జాబితాలో ఆయన 92వ స్థానాన్ని సొంతం చేసుకున్నట్లు వెరైటీ తెలిపింది. ఇక షారుఖ్ ఈ జాబితాలో నిలిచిన ఏకైక భారతీయ నటుడు కావడం విశేషం. ప్రపంచ సినిమా చరిత్రలో అత్యంత ప్రభావశీలమైన, గొప్ప తారల సరసన ఆయన నిలవడం భారత సినీ అభిమానుల్లో ఆనందాన్ని నింపుతోంది. మూడు దశాబ్దాలకు పైగా సినీ ప్రస్థానంలో ఎన్నో చిరస్మరణీయ చిత్రాలతో ప్రేక్షకులను అలరించిన షారుఖ్ ఖాన్, అంతర్జాతీయ స్థాయిలోనూ తనదైన స్టార్డమ్ను కొనసాగిస్తున్నారు. హాలీవుడ్ దిగ్గజ తారలతో పాటు ఈ జాబితాలో ఆయన పేరు కనిపించడం విశేషం. రొమాంటిక్ డ్రామాలు, యాక్షన్ థ్రిల్లర్లు, భావోద్వేగ చిత్రాల ద్వారా కోట్లాది మంది అభిమానుల మనసులను గెలుచుకున్న షారుఖ్, కేవలం నటనతోనే కాకుండా తన మాట తీరు, వ్యక్తిత్వంతోనూ గ్లోబల్ ఐకాన్గా ఎదిగారు.
ఇక ఈ జాబితాలో 1950ల నాటి గ్లామరస్ తార మార్లిన్ మన్రోకు తొలి స్థానం దక్కింది. రెండో స్థానంలో అలనాటి ప్రముఖ నటుడు హమ్ఫ్రీ బొగర్ట్, మూడో స్థానంలో సుప్రసిద్ధ హాస్య నటుడు చార్లీ చాప్లిన్ నిలిచారు.ఈ అరుదైన ఘనతపై షారుఖ్ ఖాన్ అభిమానులు సోషల్ మీడియాలో హర్షం వ్యక్తం చేస్తూ శుభాకాంక్షలు తెలుపుతున్నారు. ‘కింగ్ ఆఫ్ బాలీవుడ్’కు ఇది మరో గర్వకారణమైన క్షణమని పోస్టులు పెడుతున్నారు. ప్రపంచ సినిమా దిగ్గజాల జాబితాలో 92వ స్థానంతో షారుఖ్ ఖాన్కు చోటు దక్కడం భారత సినిమా కీర్తిని మరోసారి అంతర్జాతీయ వేదికపై నిలబెట్టింది.
Comments (0)