School Education | బదిలీకి రూ.4.5 లక్షలు.. డిప్యుటేషన్‌కు రెండు లక్షలు.. పాఠశాల విద్యాశాఖలో వసూళ్ల పర్వం..

School Education | హైదరాబాద్‌, ఆగస్టు 13 (నమస్తే తెలంగాణ) : ‘నేను సార్‌ పక్కనే ఉంటా.. ఆయనకు ఎంత చెబితే అంత.. నాలుగున్నర లక్షలిస్తే బదిలీ చేయిస్తా. డిప్యుటేషన్‌ కావాలంటే రెండు లక్షలు. ఔట్‌సోర్సింగ్‌ ఉద్యోగం కావాలన్నా పెట్టిస్తా. అయితే కాస్త ఖర్చవుతుంది,.. ఇది పాఠశాల విద్యాశాఖ డైరెక్టర్‌ పేషీలోని ఓ ఉద్యోగి నడుపుతున్న దందా. పాఠశాల విద్యాశాఖ డైరెక్టరేట్‌లో ఇలాంటి అక్రమ వసూళ్ల ఆరోపణలు సంచలనం సృష్టించాయి. బదిలీలు, డిప్యుటేషన్లు, ఔట్‌ సోర్సింగ్‌ ఉద్యోగాలంటూ కొందరి నుంచి భారీగా వసూలు చేసినట్టు ఆరోపణలు వెల్లువెత్తుతున్నాయి. ఈ వ్యక్తి మాటలు నమ్మి కొందరు డబ్బులిచ్చి మోసపోయారు.

నెలలు గడిచినా ఎంతకు పనులు కాకపోవడంతో తాము మోసపోయామని గుర్తించారు. పెద్ద మొత్తంలో ఇవ్వడంతో కలవరపడ్డ బాధితులు వసూలు చేసుకునేందుకు ఒత్తిడి పెంచారు. ఇటీవల కొందరు పాఠశాల విద్యాశాఖ డైరెక్టరేట్‌కు వచ్చి గొడవకు దిగినట్టు సమాచారం. దీంతో సదరు వసూల్‌ రాజా విధులకు గైర్హాజరయ్యారు. కనీసం ఆఫీసు వైపునకు కూడా రావడంలేదు. ఫోన్లు కూడా ఎత్తడంలేదట. బ్లాక్‌ లిస్ట్‌లో పెట్టినట్టు బాధితులు ఆరోపిస్తున్నారు.పాఠశాల విద్యాశాఖలో అవినీతి పెచ్చుమీరిందని సాక్షాత్తు అదే శాఖకు చెందిన ఓ ఉద్యోగి వాట్సాప్‌లో పోస్టుపెట్టడం. స్టేటస్‌లు పెట్టుకోవడం ఇటీవల సంచలనం సృష్టించింది.

రెవెన్యూశాఖ కంటే అధ్వానంగా పాఠశాల విద్యాశాఖ తయారయ్యిందని, కొందరు అధికారులు, సిబ్బంది లంచాలు పుచ్చుకోవడమే ధ్యేయంగా పనిచేస్తున్నారంటూ సోషల్‌మీడియాలో పెట్టడం తీవ్ర కలకలం సృష్టించింది. కొందరు అధికారులను లక్ష్యంగా చేసుకుని పోస్టు పెట్టగా, విషయం తెలుసుకుని అధికారులు ఒత్తిడి తెచ్చి పోస్టులు డిలీట్‌ చేయించారట. ఇదిలా ఉంటే ప్రైవేట్‌ స్కూళ్లకు అనుమతులు, సీబీఎస్‌ఈ స్కూళ్లకు ఎన్‌వోసీల జారీ, మెడికల్‌ బిల్లులు, పెండింగ్‌ ఫిక్సేషన్‌, లాంగ్‌ లీవ్‌ తర్వాత మళ్లీ విధుల్లో చేరేందుకు, పెన్షన్‌ ఫైళ్ల క్లియరెన్స్‌ దందా నడుస్తున్నట్టు ఉపాధ్యాయ సంఘాల నేతలు ఆరోపిస్తున్నారు.

కొంతకాలం డైరెక్టరేట్‌ కార్యాలయంలోని ఉద్యోగిపై ఏసీబీ దాడి చేసి రెడ్‌హ్యాండెడ్‌గా పట్టుకున్నది. ముఖ్యంగా జీవో-317 అమలు విషయంలో భారీ దందా నడిచినట్టు ఉపాధ్యాయ సంఘాల నేతలు ఆరోపిస్తున్నారు. తమకు అనుకూలంగా ఉన్న కొందరు కోర్టును ఆశ్రయించాలని అధికారులే పురమాయించి, ఉత్తర్వులు రాగానే కోర్టు ఆదేశాల పేరిట అమలు చేశారట. మరికొందరు కోర్టు నుంచి ఉత్తర్వులు తెచ్చుకున్నా అమలు చేయలేదట. కోర్టుధిక్కరణ కేసులు వేసినా కూడా ఖాతరు చేయలేదట. దీని వెనుక కూడా భారీ తతంగమే జరిగినట్టు ఉపాధ్యాయ సంఘాల నేతలు అంటున్నారు.

కొన్ని ఉదాహరణలు

• ఓ టీచర్‌ బదిలీ కోసం నాలుగు లక్షలకు పైగా ముట్టజెప్పారట. బదిలీ కాకపోవడంతో తమ డబ్బులు తమకు ఇవ్వాలని డిమాండ్‌ చేస్తే కొంత ఇచ్చినట్టు తెలిసింది. మిగిలిన నగదు కోసం ప్రయత్నిస్తే వాయిదాల మీద వాయిదాలు పెడుతున్నారట.
• ఔట్‌ సోర్సింగ్‌ ఉద్యోగాలు పెట్టిస్తానంటూ కొందరి నుంచి భారీగా వసూలు చేసినట్టు ఆరోపణలున్నాయి. బాధితులు గట్టిగా నిలదీయడంతో నేనొక్కడినే కాదు. ఇంకో వ్యక్తికి కూడా ఇచ్చిన. ఆయన ఇవ్వడంలేదంటూ బెదిరింపులకు దిగారట.
• డైరెక్టరేట్‌లో వివిధ పనుల కోసం వచ్చే వారిని సదరు వ్యక్తి డబ్బుల కోసం పీడిస్తున్నారట. ఇబ్బందులు పెడుతున్నారట. సార్‌ ఏం లేదా..? అంటూ బహిరంగంగానే అడుగుతున్నారట.
• సామాన్యులెవరైనా ఆఫీసుకు వస్తే విజిటింగ్‌ అవర్స్‌లోనే కలువాలి. అంతవరకు ఆగండి. ఇప్పుడు కలువాలంటే మాత్రం కాస్త ఇచ్చుకోవాలంటూ బేరాలకు దిగుతున్నారట.
• ఒక ఫైల్‌ పని కోసం పెద్ద మొత్తంలో ఇచ్చిన ఒకరు విసిగి వేసారిపోయి పోలీసులను ఆశ్రయించి కేసు పెట్టేందుకు సిద్ధం అయ్యారట.
• డైరెక్టరేట్‌లో మరో ఉద్యోగి సందర్శకులతో దురుసుగా ప్రవర్తిస్తున్నారట. ఎక్కడెక్కడి నుంచో వచ్చిన వారు నొచ్చుకుంటున్నారట. మర్యాదగా ప్రవర్తించాల్సిన వారే అసహనంగా ప్రవర్తిస్తున్నారని బాధితులు వాపోతున్నారు.