IPL 2027 | ఇంపాక్ట్ ప్లేయర్ రూల్‌పై కీలక నిర్ణయం.. ధోనికి షాక్ తప్పదా?

IPL 2027 | ఐపీఎల్‌లో గత కొన్ని సీజన్లుగా కొనసాగుతున్న ఇంపాక్ట్ ప్లేయర్ నిబంధనపై మరోసారి చర్చ మొదలైంది. ఐపీఎల్‌ 2027 సీజన్‌లో ఈ రూల్‌ను కొనసాగించాలా? లేక పూర్తిగా తొలగించాలా? అనే అంశంపై బీసీసీఐ అన్ని ఫ్రాంచైజీల అభిప్రాయాలను కోరినట్లు తెలుస్తోంది. తమ అభిప్రాయాలను తెలియజేయడానికి ఫ్రాంచైజీలకు ఆగస్టు 31 వరకు గడువు ఇచ్చినట్లు సమాచారం. ఇంపాక్ట్ ప్లేయర్ నిబంధనతో మ్యాచ్‌ల్లో వ్యూహాలు మరింత ఆసక్తికరంగా మారాయి. అయితే ఈ రూల్‌పై క్రికెటర్ల నుంచి భిన్నాభిప్రాయాలు వ్యక్తమవుతున్నాయి. ముఖ్యంగా ఆల్‌రౌండర్ల ప్రాధాన్యత తగ్గిపోతోందనే విమర్శలు ఉన్నాయి.ఈ నేపథ్యంలో ఐపీఎల్ 2027 సీజన్‌కు సంబంధించి ఇంపాక్ట్ ప్లేయర్ రూల్‌పై ఫ్రాంచైజీల అభిప్రాయాలను బీసీసీఐ తెలుసుకుంటున్నట్లు సమాచారం. పది జట్ల నుంచి వచ్చే అభిప్రాయాలను పరిశీలించిన అనంతరం ఈ నిబంధనపై తుది నిర్ణయం తీసుకునే అవకాశం ఉంది.

ఇంపాక్ట్ ప్లేయర్ రూల్‌తో పాటు ఐపీఎల్‌కు సంబంధించిన మరికొన్ని అంశాలపై కూడా బీసీసీఐ ఫ్రాంచైజీలను సంప్రదించినట్లు తెలుస్తోంది. ప్లేయర్లు, మ్యాచ్ అధికారుల ప్రాంతాలకు సంబంధించిన నిబంధనలు, కమ్యూనికేషన్ కోసం ఫోన్ల వినియోగంపై ఉన్న ఆంక్షలు కొనసాగించాలా? అనే అంశాలపైనా అభిప్రాయాలు కోరినట్లు సమాచారం.సెప్టెంబర్‌లో జరగనున్న బీసీసీఐ వార్షిక సర్వసభ్య సమావేశంలో ఇంపాక్ట్ ప్లేయర్ రూల్‌పై కీలక నిర్ణయం తీసుకునే అవకాశం ఉందని తెలుస్తోంది. వాస్తవానికి ఐపీఎల్ 2027లో కూడా ఇంపాక్ట్ ప్లేయర్ రూల్‌ను కొనసాగించాలని బీసీసీఐ గతంలో భావించినట్లు వార్తలు వచ్చాయి. అయితే పలువురు కెప్టెన్లు, స్టార్ క్రికెటర్లు ఈ నిబంధనపై అభ్యంతరాలు వ్యక్తం చేశారు. విరాట్ కోహ్లీ, రోహిత్ శర్మ వంటి స్టార్ ఆటగాళ్లు కూడా ఈ రూల్‌పై తమ అసంతృప్తిని వ్యక్తం చేసిన సందర్భాలున్నాయి. ఇంపాక్ట్ ప్లేయర్ నిబంధన కారణంగా ఆల్‌రౌండర్ల అవసరం తగ్గుతోందని, ఒక జట్టు 11 మందికి బదులుగా 12 మంది ఆటగాళ్లతో ఆడుతున్నట్లుగా అనిపిస్తోందని వారు అభిప్రాయపడ్డారు. దీంతో ఈ నిబంధనను మరోసారి సమీక్షిస్తామని బీసీసీఐ గతంలో పేర్కొంది.

ఇంపాక్ట్ ప్లేయర్ రూల్ కొనసాగుతుందా లేదా అనే అంశం మహేంద్ర సింగ్ ధోని అభిమానుల్లోనూ ఆసక్తిని పెంచుతోంది. ఐపీఎల్ 2027 సీజన్ నాటికి ధోని 45 ఏళ్ల వయసులో ఉంటారు. గత కొంతకాలంగా గాయాలు, ఫిట్‌నెస్ సమస్యల కారణంగా ఆయన ఆటతీరుపై చర్చ జరుగుతోంది. గత సీజన్‌లో గాయం కారణంగా ధోని ఒక్క మ్యాచ్ కూడా ఆడలేకపోయారు. అంతకుముందు కొన్ని సీజన్లలో ఇంపాక్ట్ ప్లేయర్‌గా బరిలోకి దిగుతూ జట్టుకు సేవలందించారు. దీంతో ఇంపాక్ట్ ప్లేయర్ నిబంధన కొనసాగితే ధోని మరోసారి ఆ విధానంలో మ్యాచ్‌లు ఆడే అవకాశం ఉంటుందని అభిమానులు ఆశిస్తున్నారు.అయితే ఇంపాక్ట్ ప్లేయర్ రూల్‌ను పూర్తిగా తొలగిస్తే ధోని ఐపీఎల్‌లో కొనసాగడం మరింత కష్టమవుతుందా? అనే చర్చ కూడా మొదలైంది. ముఖ్యంగా ధోని పూర్తి స్థాయి ప్లేయర్‌గా మ్యాచ్‌లు ఆడేందుకు అవసరమైన ఫిట్‌నెస్, పాత్ర వంటి అంశాలు కీలకంగా మారనున్నాయి.