Sakshi Dhoni | ‘కొన్ని అధ్యాయాలు ముగియాల్సిందే’.. ధోనీ రిటైర్మెంట్‌పై సాక్షి ఎమోషనల్ పోస్ట్.. !

18 November 2026 - 12:00
0 0
Sakshi Dhoni | ‘కొన్ని అధ్యాయాలు ముగియాల్సిందే’.. ధోనీ రిటైర్మెంట్‌పై సాక్షి ఎమోషనల్ పోస్ట్.. !
Sakshi Dhoni

Sakshi Dhoni | భారత క్రికెట్ దిగ్గజం మహేంద్ర సింగ్ ధోనీ ఐపీఎల్‌కు వీడ్కోలు పలకడంతో అభిమానులు భావోద్వేగానికి గురవుతున్నారు. ఈ నేపథ్యంలో ఆయన భార్య సాక్షి సింగ్ ధోనీ సోషల్ మీడియాలో చేసిన ఓ పోస్టు ఇప్పుడు అందరి దృష్టిని ఆకర్షిస్తోంది. ‘కొన్ని అధ్యాయాలు ముగిస్తేనే అందమైన కొత్త అధ్యాయాలు ప్రారంభమవుతాయి’ అంటూ మహీకి ప్రత్యేకంగా సందేశం ఇచ్చారు.

సాక్షి తన ఇన్‌స్టాగ్రామ్ ఖాతాలో చేసిన పోస్టులో.. ‘కొన్ని అందమైన కొత్త అధ్యాయాలు ప్రారంభం కావాలంటే కొన్ని అధ్యాయాలు ముగియాల్సి ఉంటుంది. ఇన్నేళ్లుగా మహీని ప్రేమించి, మద్దతుగా నిలిచి, నమ్మిన ప్రతి ఒక్కరికీ హృదయపూర్వక ధన్యవాదాలు. మాకు వ్యక్తిగతంగా తెలిసినా, తెలియకపోయినా మీ అందరి ప్రేమకు ఎప్పటికీ రుణపడి ఉంటాం. ఈ ప్రేమకు ఎంతో కృతజ్ఞతలు. కొత్త ప్రారంభాలు, కొత్త ప్రయాణాలు, మరెన్నో మధురమైన జ్ఞాపకాలకు స్వాగతం. నీ గురించి ఎంతో గర్వంగా ఉంది మహీ’ అంటూ రాసుకొచ్చారు.

ఈ పోస్టుతో పాటు సాక్షి ఓ ప్రత్యేకమైన ఫొటోను కూడా పంచుకున్నారు. అందులో ధోనీ ఓ అందమైన పర్వత ప్రాంతంలో ప్రకృతి అందాలను వీక్షిస్తున్నట్లు కనిపిస్తున్నారు. చుట్టూ పచ్చని కొండలు, దూరంగా మంచుతో కప్పుకున్న పర్వత శ్రేణులు, ఆహ్లాదకరమైన వాతావరణం మధ్య మహీ నిలబడి ఉన్న ఈ ఫొటో అభిమానులను ఆకట్టుకుంటోంది. ఎలాంటి హడావుడి లేకుండా ప్రశాంతంగా ప్రకృతిని ఆస్వాదిస్తున్న ధోనీ చిత్రాన్ని సాక్షి తన భావోద్వేగ సందేశంతో పంచుకోవడం ప్రత్యేకంగా నిలిచింది.

స్పందించిన సీఎస్‌కే

సాక్షి పోస్టుపై అభిమానులు పెద్ద ఎత్తున స్పందిస్తున్నారు. ఈ పోస్టుకు ఇప్పటికే లక్షలాది లైక్స్ వచ్చాయి. ధోనీకి సన్నిహితులైన పలువురు కూడా తమ స్పందనను తెలియజేశారు. సీఎస్కే అధికారిక ఇన్‌స్టాగ్రామ్ ఖాతా సైతం ‘నీ గురించి ఎంతో గర్వంగా ఉంది మహీ.. ఎప్పటికీ’ అంటూ సాక్షి సందేశంలోని మాటలను పంచుకుంది. మరోవైపు ధోనీ అభిమానులు కొత్త ప్రయాణానికి శుభాకాంక్షలు తెలుపుతున్నారు.

ఐపీఎల్‌కు ధోనీ వీడ్కోలు

ప్రొఫెషనల్‌ క్రికెట్‌లో, ఇండియన్‌ ప్రీమియర్‌ లీగ్‌ (ఐపీఎల్‌)లో ఓ సువర్ణాధ్యాయం ముగిసింది. మెగా లీగ్‌ లో సీఎస్కేను విజయవంతమైన జట్టుగా తీర్చిదిద్ది.. ముంబైతో సమానంగా ఆ జట్టుకు ఐదు టైటిళ్లు అందించిన ఎంఎస్‌ ధోనీ తన ఆటకు పూర్తిగా తెరదించాడు. 2020 ఆగస్టులో ఇన్‌స్ట్రాగామ్‌ పోస్ట్‌ ద్వారా అంతర్జాతీయ క్రికెట్‌కు వీడ్కోలు పలికిన మహీ ఐపీఎల్‌ రిటైర్మెంట్‌ నిర్ణయాన్ని కూడా అంతే అనూహ్యంగా.. అంతే శాంతంగా ప్రకటించాడు. శనివారం జరిగిన సీఎస్కే టీమ్‌ మేనేజ్‌ మెంట్‌ వీడియో కాల్‌లో ఈ నిర్ణయం వెల్లడించాడని జట్టు సహ యజమాని రూప గురునాథ్‌ తెలిపారు.

‘ఈ రోజు (శనివారం) మేమంతా వీడియో కాల్‌లో వచ్చే సీజన్‌ వ్యూహాలు, వేలంలో తీసుకోవాల్సిన ఆటగాళ్లు, రిలీజ్‌ చేయాల్సిన ఆటగాళ్ల జాబితాపై సుదీర్ఘంగా చర్చించాం. చివర్లో మా సీఈఓ కాశీ విశ్వనాథన్‌ రిలీజ్‌ చేసే ఆటగాళ్ల జాబితా చదువుతుండగా.. “బహుశా అందులో నా పేరు కూడా చేర్చాల్సి ఉంటుందేమో” అని ధోనీ చాలా నెమ్మదిగా అన్నారు. ఆ మాట వినగానే వీడియో కాల్‌ ఒక్కసారిగా కట్‌ అయిపోయింది. మళ్లీ కాల్‌ చేసి..మీరు ఆడరన్న విషయాన్ని ఇంటర్నెట్‌ కూడా తట్టుకోలేకపోయిందని అని చెప్పాను.

జట్టుకు 200 శాతం న్యాయం చేయలేనని భావిస్తే ధోనీ అస్సలు ఆడరు’ అని రూప భావోద్వేగంతో పేర్కొన్నారు. 2008లో సీఎస్కేలో చేరినప్పటి నుంచి ఆ జట్టుకు కెప్టెన్‌ గా ఉన్న ధోనీ ఐదు ఐపీఎల్‌ టైటిళ్లు, రెండు చాంపియన్స్‌ లీగ్‌ టీ20 ట్రోఫీ అందించాడు. తన నాయకత్వంలో సీఎస్కే ఏకంగా పది సార్లు ఫైనల్‌, 12 సార్లు ప్లే ఆఫ్స్‌ చేరింది. మెగా లీగ్‌ లో మొత్తంగా 278 మ్యాచ్‌లు ఆడిన మహీ 5,439 పరుగులు సాధించాడు.

Comments (0)

User