Road Accident | ఆగివున్న టిప్పర్ను ఢీకొట్టిన వ్యాన్.. ముగ్గురు దుర్మరణం..!

Road Accident : ఆగివున్న టిప్పర్ (Tipper) లారీని మహీంద్రా పికప్ వ్యాన్ (Mahindra Pickup Van) ఢీకొట్టిన ఘటనలో ముగ్గురు దుర్మరణం పాలయ్యారు. మరో 27 మందికి తీవ్ర గాయాలయ్యాయి. పంజాబ్ (Pujab) రాష్ట్రం లూథియానా (Ludhiana) జిల్లా మచ్చివారా (Machhiwara) ప్రాంతంలోని పవాత్ వంతెన సమీపంలో ఈ ఘటన చోటుచేసుకుంది. మంగళవారం మధ్యాహ్నం యాత్రికులతో వెళ్తున్న మహీంద్రా పికప్ వాహనం, ఆగి ఉన్న టిప్పర్ లారీని బలంగా ఢీకొట్టింది.
ఈ ప్రమాదంలో ఇద్దరు మైనర్లు సహా ముగ్గురు భక్తులు మరణించారు. మరో 27 మంది గాయపడ్డారు. బాధితులు మాతా నైనా దేవి ఆలయాన్ని దర్శించుకుని తిరిగి వస్తుండగా ఈ ప్రమాదం జరిగింది. ప్రాథమిక సమాచారం ప్రకారం.. వారంతా మచ్చివారా ప్రాంతంలోని వలస కార్మికుల కాలనీకి చెందినవారిగా తెలిసింది. మృతుల్లో 17 ఏళ్ల గౌరవ్, 14 ఏళ్ల మరో బాలుడు, 36 ఏళ్ల మహిళ ఉన్నారు. ప్రమాదం జరిగిన వెంటనే స్థానికులు ఘటనా స్థలానికి చేరుకుని సహాయక చర్యలు చేపట్టారు.
ప్రమాదానికి గురైన వాహనంలో చిక్కుకున్న క్షతగాత్రులను బయటకు తీసి మచ్చివారా, సమీప ప్రాంతాల్లోని ఆసుపత్రులకు తరలించారు. గాయపడిన వారిలో కొందరి పరిస్థితి విషమంగా ఉన్నట్లు సమాచారం. ఈ ప్రమాదంపై పోలీసులు దర్యాప్తు చేపట్టారు. ప్రమాదానికి కచ్చితమైన కారణాలు తెలియాల్సి ఉందన్నారు. ఈ ప్రమాదం మరోసారి రహదారి భద్రతపై ఆందోళనలను రేకెత్తించింది.
Comments (0)