‘సింగరేణి పరిరక్షణకు త్వరలో టిబిజికెఎస్ ఆధ్వర్యంలో యాత్ర’

– కార్మిక హక్కుల సాధన కోసం ఉద్యమ కార్యాచరణ
– టిబిజికెఎస్ అధ్యక్షుడు మిర్యాల రాజిరెడ్డి
గోదావరి ఖని, నవంబర్ 17 : సింగరేణి సంస్థ పరిరక్షణతో పాటు కార్మికుల హక్కుల సాధన కోసం త్వరలోనే టిబిజికెఎస్ (TBGKS) ఆధ్వర్యంలో సింగరేణి పరిరక్షణ యాత్ర చేపట్టనున్నట్లు టిబిజికెఎస్ అధ్యక్షుడు మిర్యాల రాజిరెడ్డి వెల్లడించారు. గోదావరిఖనిలోని టిబిజికెఎస్ కేంద్ర కార్యాలయంలో నిర్వహించిన కేంద్ర కమిటీ సమావేశంలో ఆయన ఈ ప్రకటన చేశారు. ఈ సమావేశానికి సింగరేణిలోని అన్ని ఏరియాలకు చెందిన కేంద్ర కమిటీ నాయకులు హాజరయ్యారు. ఈ సందర్భంగా మిర్యాల రాజిరెడ్డి మాట్లాడుతూ గుర్తింపు, ప్రాతినిధ్య సంఘాల వైఫల్యం కారణంగా సింగరేణి కార్మికులు అనేక హక్కులను కోల్పోయే పరిస్థితి ఏర్పడిందని ఆవేదన వ్యక్తం చేశారు. కార్మికులకు ఉత్పత్తికి అవసరమైన కనీస పనిముట్లు, పరికరాలు, రక్షణ సామగ్రిని సైతం అందించలేని పరిస్థితి నెలకొందని, దీంతో బొగ్గు ఉత్పత్తి కుంటుపడటంతో పాటు నిత్యం ప్రమాదాలు చోటుచేసుకుంటున్నాయన్నారు.
కొత్త హక్కులు సాధించడం దేవుడెరుగు, కార్మికులకు ఇప్పటికే ఉన్న హక్కులు ఒక్కొక్కటిగా దూరమవుతున్నాయని విమర్శించారు. సింగరేణికి కొత్త బొగ్గు గనులు కేటాయించకపోవడం, ఉన్న గనులు మూతపడుతుండటంతో సంస్థ భవిష్యత్తు ప్రశ్నార్థకంగా మారుతోందన్నారు. యాజమాన్యంతో పోరాడాల్సిన గుర్తింపు, ప్రాతినిధ్య సంఘాలు కార్మిక సమస్యలను పక్కనపెట్టి పైరవీలకే పరిమితమవుతున్నాయని ఆరోపించారు. గుర్తింపు కాలపరిమితి పూర్తయినా ఎన్నికలకు వెళ్లకుండా అధికార పీఠాన్ని అంటిపెట్టుకుని ఉండేందుకు ప్రయత్నిస్తున్నారని, గుర్తింపు సంఘాల నాయకులు కార్మికుల సమస్యలపై గళమెత్తడం లేదని విమర్శించారు. పోరాటాల ద్వారానే కార్మిక హక్కులు సాధించుకోగలమని టిబిజికెఎస్ విశ్వసిస్తోందని, అందులో భాగంగానే త్వరలో సింగరేణి పరిరక్షణ యాత్రతో పాటు పలు ఉద్యమ కార్యక్రమాలు చేపట్టనున్నట్లు తెలిపారు. ఈ కార్యక్రమాల్లో కార్మికులందరూ భాగస్వాములు కావాలని పిలుపునిచ్చారు.
కేంద్ర కమిటీ సమావేశంలో పలు కీలక తీర్మానాలు
– సింగరేణి సంస్థకు జెన్కో, ట్రాన్స్కో నుండి రావాల్సిన రూ.60 వేల కోట్ల బకాయిలను వెంటనే చెల్లించాలి
– 12వ వేజ్బోర్డు కమిటీని తక్షణమే ఏర్పాటు చేయాలి. వేజ్బోర్డు ఒప్పందం జరిగే వరకు కార్మికులకు 40 శాతం ఐఆర్ చెల్లించాలి
– వేలం విధానంతో సంబంధం లేకుండా సింగరేణికి నేరుగా బొగ్గు గనులను కేటాయించాలి
– సింగరేణి ఆసుపత్రుల్లో కార్మికులకు నాణ్యమైన వైద్య సేవలు అందించాలి
– ప్రభుత్వ హామీ మేరకు కార్మికులకు 250 గజాల ఇంటి స్థలం కేటాయించాలి
– కార్మికులకు రూ.20 లక్షల వడ్డీలేని రుణం అందించాలి
– 2019 నుంచి డిస్మిస్ అయిన కార్మికులందరినీ ఎలాంటి షరతులు లేకుండా తిరిగి విధుల్లోకి తీసుకోవాలి. 2026లో డిస్మిస్ అయిన వారిని కూడా ఈ పరిధిలోకి తీసుకోవాలి
– మారుపేర్ల సమస్యను వెంటనే పరిష్కరించాలి
– వెయిటింగ్లో ఉన్న 300 మంది డిపెండెంట్లకు తక్షణమే నియామక పత్రాలు అందించాలి
-. సింగరేణిలో కొరతగా ఉన్న పనిముట్లు, స్పేర్ పార్ట్స్ను వెంటనే కొనుగోలు చేయాలి
– ప్రతి నెలా మెడికల్ బోర్డు నిర్వహించి, బోర్డుకు హాజరైన కార్మికుల అన్ఫిట్ సమస్యలను పరిష్కరించాలి
– సింగరేణి కార్మిక వాడల్లో మౌలిక సదుపాయాలను మెరుగుపరచడంతో పాటు క్వార్టర్ల నిర్వహణను పటిష్టం చేయాలి
– పెండింగ్లో ఉన్న ప్రమోషన్లు, ఇంటర్నల్ క్లరికల్ తదితర పరీక్షలను వెంటనే నిర్వహించాలి.
అనంతరం వివిధ ఏరియాల్లో కార్మికులు ఎదుర్కొంటున్న సమస్యలపై కేంద్ర కమిటీ నాయకులు విస్తృతంగా చర్చించారు. కార్మికుల సమస్యల పరిష్కారానికి భవిష్యత్తులో చేపట్టాల్సిన ఉద్యమ కార్యాచరణపై అభిప్రాయాలను పంచుకున్నారు. ఈ సమావేశంలో టిబిజికెఎస్ ప్రధాన కార్యదర్శులు కాపు కృష్ణ, కేతిరెడ్డి సురేందర్ రెడ్డి, వర్కింగ్ ప్రెసిడెంట్ మాదాసు రామ్మూర్తి, సీనియర్ వైస్ ప్రెసిడెంట్ నూనె కొమరయ్య, పర్లపల్లి రవి, మంగిలాల్, చెల్పూరి సతీష్, బడికెల సంపత్, ప్రభాకర్ రెడ్డి, గడప రాజయ్య, నాగెళ్ల వెంకటేశ్వర్లు, తుమ్మ శ్రీనివాసరావు, కాగితం విజయ్ కుమార్, ఎంటెక్ మహేందర్తో పాటు అన్ని ఏరియాల కేంద్ర కమిటీ నాయకులు పాల్గొన్నారు.
Comments (0)