Presidents Bodyguard: రాష్ట్ర‌ప‌తి బాడీగార్డ్ యూనిట్‌లోని జ‌వాన్‌పై కాల్పులు

మీర‌ట్: ఎలైట్ ప్రెసిడెంట్స్ బాడీగార్డ్(Presidents Bodyguard) రెజిమెంట్‌లో జ‌వానుగా చేస్తున్న వ్య‌క్తిపై కాల్పులు జ‌రిగాయి. దివాళీ రాత్రి భాగ్‌పాత్ జిల్లాలో ఈ ఘ‌ట‌న జ‌రిగింది. బాధితుడిని 28 ఏళ్ల సౌర‌భ్ తోమ‌ర్‌గా గుర్తించారు. అయితే స్వంత గ్రామానికి చెందిన పాత శ‌త్రువులే ఆ ఫైరింగ్ చేసిన‌ట్లు తెలుస్తోంది. ఆ దాడిలో అత‌ని సోద‌రుడు కూడా గాయ‌ప‌డ్డారు. అయితే జ‌వాను సౌర‌భ్ తోమ‌ర్ ప్ర‌స్తుతం ఆస్ప‌త్రిలో కోలుకుంటున్నాడు. ఇద్ద‌రు నిందితుల‌పై హ‌త్యాయ‌త్నం కేసు బుక్ చేశారు. ఆ ఇద్ద‌రూ ప‌రారీలో ఉన్నారు.

ఢిల్లీలోని రాష్ట్ర‌పతి భ‌వ‌న్‌లో ప్రెసిడెంట్స్ బాడీగార్డ్ బృందం విధులు నిర్వ‌ర్తిస్తుంటుంది. దీపావ‌ళి పండుగ కోసం బాధిత జ‌వాను తోమ‌ర్ త‌న స్వ‌గ్రామం గోపాల్‌పుర్ ఖాదానాకు వెళ్లారు. ఇంటి బ‌య‌ట నిలుచున్న‌స‌మ‌యంలో నిందితులు ధీర‌జ్, మోనూలు కాల్పులు జ‌రిపారు. తోమ‌ర్ తండ్రి జ‌న‌క‌రాజ్ ఫిర్యాదు ఆధారంగా కేసు బుక్ చేశారు. బీఎన్ఎస్‌లోని 109(1), 115(2), 352, 351(3) సెక్ష‌న్ల కింద కేసు న‌మోదు చేశారు. 2021లో సౌర‌భ్ తోమ‌ర్ రాష్ట్ర‌ప‌తి బాడీగార్డు రెజిమెంట్‌లో చేరారు. 6 అడుగుల 3 ఇంచుల ఎత్తు ఉన్న సౌర‌భ్ ఎలైట్ యూనిట్‌కు క్వాలిఫై అయిన‌ట్లు కుటుంబ‌స‌భ్యులు తెలిపారు. భార‌త రాష్ట్ర‌ప‌తికి ప్రెసిడెంట్స్ బాడీగార్డ్ యూనిట్ సెక్యూర్టీ విధుల‌ను నిర్వ‌ర్తిస్తుంది.