PM Modi | ప్రెస్ రిలీజ్‌ల కాలం పోయింది.. ఇప్పుడంతా ఇన్‌స్టా రీల్స్‌..!

PM Modi : మీడియాతో తనకు సుదీర్ఘ కాలంగా అనుబంధం ఉందని ప్రధాని (Prime Minister) న‌రేంద్ర‌ మోదీ (Narendra Modi) అన్నారు. మీడియా ప్రపంచంలో సాధ్యం కానిదంటూ ఏదీ లేదని ఆయ‌న‌ చెప్పారు. విపత్తులు, సంక్షోభాల సమయంలో క్షేత్రస్థాయి రిపోర్టర్‌లు కథనాల కోసం ఎంతదూరమైనా వెళ్తారని ప్రశంసించారు. ఢిల్లీలోని బీజేపీ ప్రధాన కార్యాలయం (BJP Headquarters) లో జర్నలిస్టుల (Journalists) కోసం దీపావళి మిలన్‌ (Diwali Milan) పేరుతో ప్రత్యేక కార్యక్రమం నిర్వహించారు. ఈ కార్య‌క్ర‌మంలో ప్ర‌ధాని మోదీ ప్రసంగించారు.

విలేకరులతో త‌న‌కు సుదీర్ఘకాల అనుబంధం ఉన్న‌ద‌ని, బీజేపీలో చేరిన తొలినాళ్లలో మీడియా ఈవెంట్ల కోసం కుర్చీలువేసే బాధ్యత త‌న‌దే ఉండేద‌ని, అప్ప‌ట్లో తాను విలేక‌రుల‌తో చాలా విష‌యాలు మాట్లాడేవాడిన‌ని ప్ర‌ధాని తెలిపారు. గడిచిన కొన్నేళ్లలో జర్నలిజంలో ఎన్నో మార్పులు వచ్చాయని, సాంకేతికంగా ఎంతో అభివృద్ధి జరిగిందని అన్నారు. ఒకప్పుడు మీడియా సమావేశాల ప్రసారం కోసం అవుట్‌సైడ్‌ బ్రాడ్‌కాస్ట్‌ వ్యాన్లను ఉపయోగించేవారని, ఇప్పుడు మొబైల్‌ ఫోనే బ్రాడ్‌కాస్ట్‌ వాహనంగా మారిపోయిందని చెప్పారు.

గతంలో ఏదైనా కార్య‌క్ర‌మం జ‌రిగితే పత్రికా ప్రకటనలు ఇచ్చేవారని, ఇప్పుడు సామాజిక మాధ్యమాల విస్తృతితో అన్నీ ఇన్‌స్టా రీల్స్‌లోనే తెలిసిపోతున్నాయని మోదీ అన్నారు. ఈ సందర్భంగా దేశాభివృద్ధి కోసం తమ ప్రభుత్వం చేపట్టిన కార్యక్రమాలను ప్రధాని వివరించారు. పేదరిక నిర్మూలన కోసం కృషి చేసినట్లు పేర్కొన్నారు. ఒకప్పుడు గరీబీ హఠావో వంటి నినాదాలు వినిపించేవని, కానీ త‌మ‌ ప్రభుత్వం గత 12 ఏళ్లలో 50 కోట్ల మందిని దారిద్ర్య‌ రేఖ నుంచి బయటపడేసింద‌ని చెప్పారు. దేశంలో అసాధారణ విజయాలు సాధించినవారు ఎంతోమంది ఉన్నారని, వారి విజయ గాథలను ప్రపంచానికి తెలియజేయాలని విలేకరులను కోరారు.