Marri Janardhan Reddy | కాంగ్రెస్ మూడేళ్ల సంబరాలు కాదు.. హామీల సమాధానం కావాలి : మాజీ ఎమ్మెల్యే మర్రి జనార్దన్ రెడ్డి డిమాండ్

నాగర్ కర్నూల్ : తెలంగాణలో అధికారంలోకి రావడానికి 420 హామీలు( Promises ) ఇచ్చారు. మూడేళ్లలో ప్రజలకు మోసాలే చూపించారని మాజీ ఎమ్మెల్యే మర్రి జనార్దన్ రెడ్డి (Marri Janardhan Reddy) కాంగ్రెస్ ( Congress ) పై మండిపడ్డారు. ఆరు గ్యారెంటీల పేరుతో ఆరు దిక్కులా ప్రచారం చేసి ప్రజల జీవితాల్లో మాత్రం మార్పు తీసుకురాలేకపోయారని విమర్శించారు.
కాంగ్రెస్ మేనిఫెస్టో ( Manifesto )చూసి ప్రజలు తెలంగాణ స్వర్గధామం అవుతుందని అనుకున్నారు. అధికారంలోకి వచ్చాక చూస్తే అది కేవలం ఎన్నికల మాయాజాలమని, మోసపోయామని ప్రజలు గ్రహించారని తెలిపారు. ఎన్నికల ముందు హామీల వర్షం కురిపించి ,అధికారంలోకి వచ్చాక తీవ్ర కరువు తీసుకొచ్చారని విమర్శించారు. 2023 నవంబర్ 17న హైదరాబాద్లో కాంగ్రెస్ జాతీయ అధ్యక్షుడు మల్లికార్జున ఖర్గే సమక్షంలో ‘అభయహస్తం’ పేరుతో మేనిఫెస్టో విడుదల చేశారని, వందరోజుల్లో హామీలు అమలు చేస్తామని భరోసా ఇచ్చి ఏ ఒక్కదానినీ పూర్తిస్థాయిలో అమలు చేయలేకపోయారని తీవ్ర స్థాయిలో విమర్శించారు.
మహాలక్ష్మి, రైతు భరోసా, గృహజ్యోతి, ఇందిరమ్మ ఇండ్లు, యువ వికాసం, చేయూత పేరుతో ఆరు గ్యారెంటీలు ప్రకటించి ప్రజలను నమ్మించారని ఆరోపించారు. రైతులు, మహిళలు, వృద్ధులు, వితంతువులు, వికలాంగులకు అన్యాయం చేశారని పేర్కొన్నారు. నిరుద్యోగ యువతకు, విద్యార్థులకు, ఉద్యోగులకు తీరని అన్యాయం చేశారని తెలిపారు.
బీసీలకు 42 శాతం రిజర్వేషన్లు, కులవృత్తుల అభివృద్ధి, ఎస్సీ, ఎస్టీలకు ప్రత్యేక ఆర్థిక సహాయం, మైనారిటీల సంక్షేమం వంటి హామీలపై ప్రభుత్వం పూర్తిస్థాయి కార్యాచరణ ప్రకటించాలని డిమాండ్ చేశారు. నాగర్కర్నూల్ పట్టణంలో ఇంటిగ్రేటెడ్ మార్కెట్ పనులను వెంటనే పూర్తి చేయాలని, అండర్గ్రౌండ్ డ్రైనేజీ, సీసీ రోడ్లు, ఇతర మౌలిక వసతుల పనులను పూర్తి చేయాలని డిమాండ్ చేశారు. పాడి రైతుల కోసం పట్టణంలో పశువైద్యశాలను ఏర్పాటు చేయాలన్నారు.
ప్రజలకు కావాల్సింది మాటల ప్రభుత్వం కాదని, చేతల ప్రభుత్వమని అన్నారు.
Comments (0)