‘కాంగ్రెస్ 420 హామీలు తక్షణమే అమలు చేయాలి’

17 November 2026 - 23:00
0 0
‘కాంగ్రెస్ 420 హామీలు తక్షణమే అమలు చేయాలి’
'కాంగ్రెస్ 420 హామీలు తక్షణమే అమలు చేయాలి'

బూర్గంపహాడ్, నవంబర్ 17 : కాంగ్రెస్ ఎన్నికలకు ముందు, తర్వాత ఇచ్చిన 420 హామీలను తక్షణమే అమలు చేయాలని లేనిపక్షంలో గ్రామాల్లో బీఆర్ఎస్ ఆధ్వర్యంలో పోరుబాట తప్పదని ఆ పార్టీ సారపాక పట్టణ అధ్యక్షుడు కొనకంచి శ్రీనివాస్ హెచ్చరించారు. మంగళవారం సారపాకలో మండల, పట్టణ నాయకులతో కలిసి విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ.. కాంగ్రెస్ ఎన్నికల సమయంలో ప్రజలకు ఎన్నో అలివిగాని హామీలు ఇచ్చి మాయమాటలు చెప్పి అధికారంలోకి వచ్చిందని విమర్శించారు. ఎన్నికలకు ముందు ఇచ్చిన హామీలను అధికారంలోకి వచ్చాక ప్రభుత్వం విస్మరించడం ప్రజలను మోసం చేయడమేనని మండిపడ్డారు. రైతులు, మహిళలు, యువత, నిరుద్యోగులు, పేదప్రజలు ఇలా అన్నివర్గాల వారిని కాంగ్రెస్ నమ్మించి నట్టేట ముంచిందని, ప్రజల ఓటర్లతో అధికారంలోకి వచ్చిన ప్రభుత్వం ప్రజలకు జవాబుదారీగా ఉండాలని, హామీల అమలుపై ఇప్పటికైనా స్పష్టమైన కార్యాచరణ ప్రకటించాలని డిమాండ్ చేశారు.

కాంగ్రెస్ తన వైఖరిని మార్చుకుని ఇచ్చిన హామీలను అమలుచేయాలని, లేనిపక్షంలో రానున్న రోజుల్లో బీఆర్ఎస్ ఆధ్వర్యంలో ప్రభుత్వ ప్రజావ్యతిరేక నిర్ణయాలు, హామీల అమలుపై పెద్ద ఎత్తున ఆందోళనలు, నిరసనలు చేపడతామని హెచ్చరించారు. ఈ సమావేశంలో పట్టణ ప్రధాన కార్యదర్శి, 11వ వార్డు సభ్యులు తిరుపతి ఏసోబు, మాజీ వైస్ ఎంపీపీ, 12వ వార్డు సభ్యురాలు బసంతిదేవి, మాజీ ఎంపీటీసీ దాసరి వెంకటరమణ, యువజన అధ్యక్షుడు సోము లక్ష్మిచైతన్యరెడ్డి, మండల వైస్ ప్రెసిడెంట్ బండారి లక్ష్మినారాయణ, మైనార్టీ మండల ప్రధాన కార్యదర్శి గుల్మహ్మద్, సీనియర్ నాయకులు కర్రి నాగేశ్వరరావు, బెజ్జంకి కనకాచారి, మాజీ మార్కెట్ కమిటీ డైరెక్టర్ బానోతు శ్రీను, యువజన నాయకులు పంగి సురేష్, మూడ్ మణికంఠ, గుగులోత్ అశోక్‌ పాల్గొన్నారు.

Comments (0)

User