Cop Cancels Wedding | డిమాండ్ చేసిన కారు కనిపించకపోవడంతో.. పెళ్లి రద్దు చేసిన పోలీస్ అధికారి

న్యూఢిల్లీ: ఒక పోలీస్ అధికారికి పెళ్లి సంబంధం కుదిరింది. అయితే కట్నకానుకలుగా రూ.13 లక్షల విలువైన ‘మారుతి బ్రెజ్జా’ కారు కావాలని డిమాండ్ చేశాడు. పెళ్లి మండపం వద్ద ఆ కొత్త కారు కనిపించకపోవడంతో వధువు కుటుంబ సభ్యులతో గొడవ పడి పెళ్లి రద్దు చేశాడు. (Cop Cancels Wedding) దీంతో వారు పోలీసులకు ఫిర్యాదు చేశారు. ఢిల్లీ పోలీస్ విభాగంలో పోలీస్ అధికారిగా కుల్దీప్ పనిచేస్తున్నాడు. హర్యానాలోని సోనిపట్కు చెందిన సుభాష్ కుమార్తె హీనాతో ఆరు నెలల కిందట ఆయన వివాహం నిశ్చయమైంది. నవంబర్ 20న వీరిద్దరికి పెళ్లి జరుగాల్సి ఉన్నది.
కాగా, పెళ్లి సంబంధం ఖరారైనప్పటి నుంచి కారు, బంగారు నగలు కావాలని వరుడి కుటుంబం డిమాండ్ చేసినట్లు వధువు తండ్రి సుభాష్ ఆరోపించారు. వరుడి కోసం రూ. 9.5 లక్షల విలువైన కారును బుక్ చేసినట్లు చెప్పారు. అయితే వివాహానికి ఒక రోజు ముందు కుల్దీప్కు ఆ కారు నచ్చలేదని, దానికి బదులుగా ‘మారుతి బ్రెజా’ కావాలని మధ్యవర్తుల ద్వారా తెలిసిందన్నారు. దీంతో ముందుగా బుక్ చేసిన కారును రద్దు చేసి, బ్రెజా కారు బుకింగ్ కోసం ప్రయత్నించినా నిర్ణీత సమయానికి ఏర్పాటు చేయడం సాధ్యం కాలేదని ఆయన వివరించారు.
మరోవైపు వరుడి కోసం రెండు తులాల బంగారు గొలుసు, అతడి తల్లి కోసం నాలుగు తులాల బంగారు చెవిపోగులు, వెండి పట్టీలు ఇచ్చేందుకు తమ కుటుంబం అంగీకరించిందని సుభాష్ తెలిపారు. అయితే వరుడి అన్నయ్య, వదినకు కూడా ఆభరణాలు కావాలని డిమాండ్ చేయడంతో వాటి కోసం కూడా ఆర్డర్లు ఇచ్చినట్లు చెప్పారు. వీటితో పాటు రూ.1.32 లక్షల విలువైన ఫర్నిచర్, ఇతర గృహోపకరణాలను కూడా కొనుగోలు చేసినట్లు వివరించారు.
అయితే నవంబర్ 20న పెళ్లి రోజన వివాహ వేదిక వద్దకు పెళ్లి ఊరేగింపుతో రావడానికి బదులుగా, వరుడు కుల్దీప్ తన తల్లితో కలిసి సాధారణ దుస్తుల్లో అక్కడికి చేరుకుని ‘బ్రెజా’ కారు కోసం వెతికినట్లు వధువు తండ్రి సుభాష్ తెలిపారు. బుకింగ్ చేసిన ఆ కారు ఇంకా సమకూరకపోవడంతో ఇరు కుటుంబాల మధ్య వాగ్వాదం జరిగినట్లు చెప్పారు. వరుడు తమ కుటుంబ సభ్యులను దూషించడంతో పాటు వధువు హీనా సోదరుడు సాహిల్తో గొడవకు దిగాడని సుభాష్ ఆరోపించారు. చేతులు జోడించి, వివాహ తంతును పూర్తి చేయమని కుల్దీప్ను, అతడి తల్లిని తమ బంధువులు వేడుకున్నప్పటికీ వారు వినకుండా అక్కడి నుంచి వెళ్లి పోయినట్లు ఆరోపించారు. వధువు హీనా పెళ్లి దుస్తుల్లో మండపం వద్ద కూర్చుని ఎదురుచూస్తూ ఉండిపోయిందని వాపోయారు.
కాగా, వివాహ ఏర్పాట్ల కోసం సుమారు రూ. 30 లక్షల వరకు తాను ఖర్చు చేశానని వధువు తండ్రి సుభాష్ తెలిపారు. అయితే పెళ్లి సమయానికి ‘మారుతి బ్రెజ్జా’ కారు అందుబాటులో లేకపోవడంతో వరుడు కుల్దీప్ పెళ్లిని రద్దు చేసినట్లు ఆయన ఆరోపించారు. కుల్దీప్, అతడి కుటుంబంపై చర్యలు తీసుకోవాలని డిమాండ్ చేస్తూ పోలీసులకు ఆయన ఫిర్యాదు చేశారు. అయితే వరుడు కుల్దీప్ కుటుంబం కూడా ప్రతిగా ఫిర్యాదు చేసింది. ఈ నేపథ్యంలో ఇరు కుటుంబాల ఫిర్యాదులపై పోలీసులు దర్యాప్తు చేస్తున్నారు.
Comments (0)