Aakasamlo Oka Tara | ‘ఆకాశంలో ఒక తార’ మూవీ రివ్యూ.. దుల్క‌ర్ స‌ల్మాన్ కొత్త మూవీ ఎలా ఉందంటే!

20 November 2026 - 14:00
0 0
Aakasamlo Oka Tara | ‘ఆకాశంలో ఒక తార’ మూవీ రివ్యూ.. దుల్క‌ర్ స‌ల్మాన్ కొత్త మూవీ ఎలా ఉందంటే!
Aakashamlo Oka Tara

సినిమా పేరు: ఆకాశంలో ఒక తార
తారాగణం: దుల్కర్‌ సల్మాన్‌, సాత్విక వీరవల్లి, శ్రుతిహాసన్‌, రుహానీ శర్మ, స్వాసిక, ప్రవీణ్‌…
దర్శకత్వం: పవన్‌ సాదినేని
నిర్మాతలు: అల్లు అరవింద్‌, స్వప్నదత్‌, సందీప్‌ గుణ్ణం, రమ్య గుణ్ణం

మహానటి, సీతారామం, లక్కీభాస్కర్‌ విజయాలతో తెలుగు ప్రేక్షకులకు అభిమాన హీరోగా మారారు మలయాళ అగ్ర నటుడు దుల్కర్‌ సల్మాన్‌. ఆయన సినిమా వస్తుందంటే టాలీవుడ్‌లో అంచనాలు ఆటోమేటిగ్గా పెరిగిపోతున్నాయి. పైగా ప్రతిభావంతుడైన పవన్‌ సాదినేని దర్శకుడు కావడం, అభిరుచి గల నిర్మాతలు అల్లు అరవింద్‌, స్వప్నదత్‌, సందీప్‌ గుణ్ణం, రమ్య గుణ్ణం నిర్మాతలు కావడతో ‘ఆకాశంలో ఒక తార’ సినిమాపై ప్రారంభం నుంచి ఆడియన్స్‌కి ఓ పాజిటివ్‌ వైబ్స్‌ ఉన్నాయి. ఈ నేపథ్యంలో శుక్రవారం సినిమా విడుదలైంది. మరి ఈ సినిమా అందరి అంచనాలనూ అందుకున్నదా? అనే విషయం తెలియాలంటే ముందు కథలోకి వెళ్లాలి.

కథ
పల్లెటూరి అమ్మాయి కల్పన(సాత్విక వీరవల్లి)కు వ్యోమగామి కావడం లక్ష్యం. కల్పనా చావ్లాలా ఎప్పటికైనా అంతరిక్షంలోకి వెళ్లాలని కలలుకంటూ ఉంటుంది. కానీ ఆమె కుటుంబం పరిస్థితి వేరే. తండ్రి తాగుబోతు. తల్లినీ, తనను హింసించడం అతని దినచర్య. ఈ హింసలు భరిస్తూనే ఎలాగొలా పదవ తరగతి పూర్తి చేస్తుంది. పక్క ఊరి కుర్రాడు కృష్ణ(దుల్కర్‌)తో తనకు పెళ్లి ఖాయం చేస్తారు. అక్క సరస్వతి(స్వాసిక) మాట కాదనలేక కృష్ణ కూడా పెళ్లికి ఒప్పుకుంటాడు. కల్పన, కృష్ణల వివాహం జరుగుతుంది. పెళ్లయిన రాత్రే కల్పన కోరిక తెలుసుకుంటాడు కృష్ణ. ఆమె కలను నిజం చేయాలని నిశ్చయించుకుంటాడు. అందుకోసం కృష్ణ ఏం చేశాడు. కల్పనకు వదిలి తను గుజరాత్‌ ఎందుకు వెళ్లాడు? కల్పన, కృష్ణ జీవితాల్లోకి వచ్చిన రోహిణి(శ్రుతిహాసన్‌) ఎవరు? ఇంతకీ కల్పన కల నెరవేరిందా? ఈ ప్రశ్నలకు సమాధానమే మిగతా కథ

విశ్లేషణ
భావోద్వేగాలున్న కథకు సరైన కథనం, బలమైన నటీనటులు తోడైతే సినిమా విజయం తథ్యం. ‘ఆకాశంలో ఒక తార’ సినిమా విషయంలో అదే జరిగింది. ఆడపిల్ల తలచుకుంటే ఏమైనా సాధించగలదని రుజువు చేసే స్ఫూర్తిదాయకమైన కథ ఇది. ‘బేటీ బచావో బేటీ పడావో’ నినాదం స్ఫూర్తితో బాలికల విద్య ప్రాధాన్యాన్ని తెలియజెప్పడంతోపాటు, లక్ష్యం, బాధ్యత, ప్రేమాభిమానాలకు సరైన నిర్వచనం చెబుతూ దర్శకుడు పవన్‌ సాదినేని ఈ సినిమాను తెరకెక్కించారు. బస్‌ సౌకర్యం కూడా లేని ఓ పెల్లెటూరికి చెందిన అమ్మాయి, ఆకాశానికి నిచ్చెనెలా వేసిందో ఈ కథ చెబుతుంది. ఇది కుటుంబ నేపథ్యంతో కూడిన ఓ వ్యోమగామి కథ. భార్య లక్ష్య సాధనకు తోడై నిలిచిన భర్త కృష్ణగా దుల్కర్‌ సల్మాన్‌ నటన గురించి ఎంత చెప్పుకున్నా తక్కువే. అనుకోకుండా ప్రవేశించిన కొన్ని పాత్రలు కథను ఊహించని మలుపులు తిప్పడం, తద్వారా చోటు చేసుకున్న పరిణామాలు ఆసక్తిని రేకెతిస్తాయి. మొత్తంగా ప్రథమార్ధం ఆద్యంతం అద్భుతంగా సాగింది. కల్పన లక్ష్య సాధన కోసం చేసే ప్రయత్నాలతో ద్వితీయార్ధం కూడా అంతే ఆసక్తిగా సాగింది. భావోద్వేగాలకు తగ్గట్టు సంభాషణలు కూడా సాగాయి.

నటీనటులు
దుల్కర్‌ సల్మాన్‌ ఎప్పటిలాగే తన పాత్రకు వందశాతం న్యాయం చేశారు. కృష్ణగా ఆయన ఎక్కడా నటించలేదు. కేవలం బిహేవ్‌ చేశారు. తన నటనతో ప్రతి సన్నివేశానికీ సహజత్వాన్ని తెచ్చారు. ఇక కల్పనగా కొత్తమ్మాయి సాత్విక చక్కగా నటించింది.ఆమెలోని అమాయకత్వం, అందం ఆ పాత్రకు మరింత అందాన్ని తెచ్చాయి. ఇంకా రోహిణిగా శ్రుతిహాసన్‌, బిజిలీగా రుహానీ శర్మ, సరస్వతిగా స్వాసిక అద్భుతంగా నటించారు. మొత్తంగా తారాగణమంతా పరిధిమేర తమ పాత్రలను రక్తికట్టించారు.

సాంకేతికంగా
పవన్‌ సాదినేని, గుణ్ణం గంగరాజు కలిసి రాసిన కథనం ఈ సినిమాకు ప్రధాన బలం. అలాగే.. జీవి ప్రకాశ్‌కుమార్‌ అద్భుమైన సంగీతాన్నందించారు. పాటలన్నీ కథలో భాగంగానే ఉండటం విశేషం. సుజీత్‌ సారంగ్‌ కెమెరా పనితనం కూడా బావుంది. ఇది ఓ భావోద్వేగ ప్రయాణం. ప్రతి ఒక్కరూ తప్పక చూడాల్సిన సినిమా ఇది.

బలాలు
కథ, మాటలు, సంగీతం, నటీనటుల నటన..

బలహీనతలు
అక్కడక్కడ కాస్త నెమ్మదిగా సాగే సన్నివేశాలు

రేటింగ్ : 3/5

 

Comments (0)

User