12.29 శాతానికి టోకు ద్రవ్యోల్బణం

17 November 2026 - 03:30
0 0
12.29 శాతానికి టోకు ద్రవ్యోల్బణం
01
  • అక్టోబర్‌లో ధరల మోత
  • ఆహార ద్రవ్యోల్బణం 8.26శాతానికి చేరిక

న్యూఢిల్లీ, నవంబర్‌ 16 : గత నెల అక్టోబర్‌లో టోకు ధరల సూచీ (డబ్ల్యూపీఐ) ఆధారిత ద్రవ్యోల్బణం 12.29 శాతంగా నమోదైందని కేంద్ర వాణిజ్య, పరిశ్రమల మంత్రిత్వ శాఖ సోమవారం తెలిపింది. 2022-23ను ప్రాతిపదికగా తీసుకున్న కొత్త డబ్ల్యూపీఐ సిరీస్‌లో ఇదే అత్యధికం కావడం గమనార్హం. ఇంధనం, విద్యుత్తు, ఆహారేతర వస్తువుల ధరలు పెరుగడం ఇందుకు ప్రధాన కారణమని అధికారిక గణాంకాల్లో తేలింది. కాగా, అంతకుముందు నెల సెప్టెంబర్‌లో ఇది 11.39 శాతంగా ఉన్నది. ఇక ఆహారోత్పత్తుల ద్రవ్యోల్బణం సెప్టెంబర్‌లో 8.14 శాతం ఉంటే, అక్టోబర్‌లో 8.26 శాతానికి చేరింది. ఆహారేతర వస్తువుల్లో ఇది 10.28 శాతం నుంచి 11.69 శాతానికి పెరిగింది. అలాగే ఖనిజాల ధరల పెరుగుదల 9.51 శాతం నుంచి 12.64 శాతానికి ఎగబాకింది. ఖనిజ నూనెలు, పెట్రోలియం ఉత్పత్తులు, ముడి చమురు, సహజవాయువు, విద్యుత్తు, ఆహార వస్తువులు, ప్రాథమిక లోహాల తయారీ, రసాయనాలు, రసాయన ఉత్పత్తుల తయారీ, ఆహార ఉత్పత్తుల తయారీ, ఆహారేతర వస్తువుల విభాగాలు అక్టోబర్‌ ద్రవ్యోల్బణాన్ని పెంచాయని సదరు మంత్రిత్వ శాఖ పేర్కొంది. వస్ర్తాలు, రబ్బరు, ప్లాస్టిక్‌ ఉత్పత్తుల తయారీ కూడా డబ్ల్యూపీఐని ఎగదోశాయి.

ఇకపై తగ్గొచ్చు..!

ప్రపంచవ్యాప్తంగా ఇంధన ధరలు తగ్గుముఖం పట్టడం వల్ల నవంబర్‌లో టోకు ద్రవ్యోల్బణం తగ్గే అవకాశం ఉన్నదని పలువురు ఆర్థికవేత్తలు అంచనా వేస్తున్నారు. ఈ నెలాఖరుదాకా డాలర్‌తో పోలిస్తే రూపాయి మారకం విలువ పెరుగుతూపోతే, ముడి చమురు ధరలు బలహీనపడితే టోకు ద్రవ్యోల్బణం సుమారు 11.5 శాతానికి తగ్గవచ్చని అంటున్నారు. ‘అక్టోబర్‌ గరిష్ఠ స్థాయితో పోలిస్తే నవంబర్‌లో ఇప్పటివరకు ప్రపంచ ఇంధన ధరలు తగ్గాయి. దీంతో రానున్న నెలల్లో డబ్ల్యూపీఐ ద్రవ్యోల్బణ వేగం తగ్గవచ్చు’ అని బార్క్‌లేస్‌ అన్నది. కాగా, ఈ ఆర్థిక సంవత్సరం (2026-27) మూడో త్రైమాసికంలో సీపీఐ ద్రవ్యోల్బణం సుమారు 6 శాతం వద్ద గరిష్ఠానికి చేరి ఆ తర్వాత తగ్గుతుందని బ్రిక్‌వర్క్‌ అంచనా వేస్తున్నది. అయితే ఏడాది పొడవునా ఆర్బీఐ నిర్దేశించిన 4 శాతం లక్ష్యానికి మించి ఉండే అవకాశమే ఉన్నదంటున్నది.

బ్రెంట్‌ ముడి చమురు ధర బ్యారెల్‌కు సుమారు 20 డాలర్లు తగ్గడంతో కొంత ఉపశమనం కనిపిస్తున్నది. ఇది కొనసాగితే పండుగల అనంతర కాలంలో టోకు ధరలపై ఒత్తిడి తగ్గుతుంది. ముడిసరుకు, రవాణా ఖర్చులు తగ్గడం వల్ల కొంత ఆలస్యంగానైనా వినియోగదారుల ధరల సూచీ (సీపీఐ) ఆధారిత ద్రవ్యోల్బణం కూడా పడిపోతుంది.

-ప్రాంజల్‌ ఘాటే, బ్రిక్‌వర్క్‌ రేటింగ్స్‌ ఆర్థికవేత్త

సుదీర్ఘంగా కొనసాగుతున్న పశ్చిమాసియా సంక్షోభం.. ఇంధనం, విద్యుత్తు ద్రవ్యోల్బణాన్ని మరింత పెంచుతున్నది. సంక్షోభం పరిష్కారమయ్యే వరకు ఇది అధికంగానే ఉండే అవకాశం ఉన్నది.

-దేవేంద్ర పంత్‌, ఇండియా రేటింగ్స్‌ అండ్‌ రిసెర్చ్‌ ప్రధాన ఆర్థికవేత్త

Comments (0)

User