రెండుమూడేళ్లలో దర్శకత్వం

• పదేళ్లు మాత్రమే నటుడిగా కొనసాగుతా

ఇటీవలే ‘రామాయణ’ చిత్రంతో ప్రేక్షకుల ముందుకొచ్చారు బాలీవుడ్‌ అగ్ర హీరో రణబీర్‌కపూర్‌. శ్రీరాముడి పాత్రలో ఆయన అభినయానికి ప్రశంసలు దక్కుతున్నాయి. ఈ నేపథ్యంలో ఇచ్చిన తాజా ఇంటర్వ్యూలో ఆయన సినీ కెరీర్‌ గురించి ఆసక్తికరమైన విషయాలను వెల్లడించారు. మరో పదేళ్లపాటు మాత్రమే నటుడిగా కొనసాగుతానని, రాబోయే రెండుమూడేళ్లలో దర్శకుడిగా తన కలను నెరవేర్చుకుంటానని ఆయన స్పష్టం చేశారు. ఇప్పటికే దర్శకత్వం కోసం కథలు రాయడం ప్రారంభించానని తెలిపారు.

‘రెండు నెలల క్రితమే కథ రాయడం మొదలుపెట్టా. ఈ క్రమంలో రచయితలపై ఎంతో గౌరవం పెరిగింది. ఒక కథను సృష్టించడం అంత సులభం కాదని అర్థమైంది. స్వరకర్తల తర్వాత అంత గొప్ప సృజనాత్మక సంతృప్తి అనుభవించేది దర్శకుడే అనుకుంటున్నా. దర్శకుడిగా తొలిప్రయత్నంలో ఫీల్‌గుడ్‌ ఫ్యామిలీ డ్రామాను తెరకెక్కించాలనుకుంటున్నా’ అని రణబీర్‌కపూర్‌ చెప్పారు. నటుడిగా రాబోవు దశాబ్దం తనకు చివరిదని, ఏడాదిలో కేవలం వందరోజులు మాత్రమే సినిమాలకు కేటాయిస్తానని, మిగతా సమయాన్ని కథలు రాసుకునేందుకు కేటాయిస్తానని రణబీర్‌కపూర్‌ పేర్కొన్నారు. ప్రస్తుతం ఈ ఇంటర్వ్యూ సోషల్‌మీడియాలో వైరల్‌గా మారింది.